14 February 2010

JSMP: JULGAMENTU KAZU 24 DE MAIO 2006 HAHU LOKE IHA TRIBUNAL DISTRITAL DILI

JULGAMENTU KAZU 24 DE MAIO 2006 HAHU LOKE IHA TRIBUNAL DISTRITAL DILI Janeiru 2009 - Iha loron 12 Janeiru 2010, Tribunal Distrital Dili kontinua julga kazu 2006 ida ho Numeru Prosesu 144/C.ord/09. Akuzasaun ne’ebe akuza ba arguidu sira mak hanesan krime hasoru ema ho ninia tipu; tiru, no estraga sasan ka danno no posse armas ilegalmente. Julgamentu refere prezide husi Juizes kolektivu mak hanesan Juiza Jacinta da Costa Correia, Guilhermino da Silva, no Maria Leonor Botelho (Juiz Internasional). Entertantu Ministeriu Publiku reprezenta husi Procurador Dr. José Luis Landim (Procurador Internasional), no arguidu sira akompaña husi Pedro Aparicio SH no Augusto Dos Santos Marques SH, hotu-hotu husi Advogadu Privadu.

Iha julgamentu ba kazu refere, arguidu sira ne’ebe tribunal identifika mak arguidu ho inisial FFJ ka OK ho ACB. Arguidu na’in rua ne’ebe mak marka prezensa iha julgamentu ne’e tuir julgamentu ho hakmatek. Julgamentu ne’e realiza sein prezensa lezado tamba sei halo hela tratamentu saude iha Jakarta, Indonesia. Tanba situasaun ne’e, tribunal deside atu adia julgamentu, maibe advogadu sira argumenta katak julgamentu la bele adia tamba arguidu sira mos iha direitu atu hetan julgamentu ne’ebe lalais, justo iha tribunal. Ba qestaun ne’e, Ministeriu Publiku mos marka nia pozisaun hanesan ho advogadu hodi konkorda atu hala’o julgamentu.

Iha akontesementu ne’e, Ministeriu Publiku konvensidu katak arguidu sira akuza ho Artigo 170 konaba (halo violensia hasoru ema ho sasan), junto Artigu 406 kona-ba krime dano husi Kodigu Penal Indonesia no Artigu 4 pontu 4, 7 husi Regulamentu UNTAET. Atu konvense tribunal ba akontesimentu ne’e, Ministeriu Publiku husu ba tribunal hodi loke Video ba kazu refere hodi nune’e tribunal bele hare diretamente aktus krime ne’ebe deskunfia komete husi arguidu sira..

Pedidu Ministeriu Publiku ne’e, bazeia ba Artigu 265, (3) junto Artigo 216 Kodigu Prosesu Penal, maibe parte defeza rezeita pedidu ne’e katak Video ne’e laos provas ida ne’ebe absoluta. Maske iha pro-kontra kona-ba pedidu ne’e, ikus mai tribunal foti desizaun hodi loke Video ne’e ba audensia hodi hare kronologia no faktu sira husi akontesimentu iha tempu ne’eba.

Tuir observasaun JSMP ba julgamentu durante prosesu ne’e nia laran iha primeiru julgamentu, tribunal seidauk konsegue lori testamuña sira atu mai fo sira ninia depoimentus. Tribunal foin mak bele aprezenta testamuña sira iha segundu julgamentu loron 13 de Janeiro 2010. Ba prosesu ne’e, tribunal notifika testemunha na’in lima maibe na’in haat deit mak marka sira nia prezensa.

JSMP mos observa katak, alende de ne’e, wainhira prosesu julgamentu la’o, ambiente prosesu julgamentu laduun hakmatek ka konfortavel, tanba ema ne’ebe mak mai partisipa julgamentu liu-liu ba sira ne’ebe hakarak mai hatudu sira nia solidaridade ba arguidu sira iha sala audensia la respeita ba prosesu julgamentu, tamba balun barallu no balun tama sai tribunal tuir sira ninia hakarak.

JSMP fiar katak situasaun hanesan ne’e, bele afeita no enkomoda konsentrasaun Juiz sira nian atu ho hakmatek halo avaliasaun ba faktu sira husi kazu ne’e, no bele mos hamosu impresaun katak audensia sira halo presaun ba Juiz ka prokuradores sira.

Tanba ne’e, JSMP husu ba tribunal wainhira hala’o julgamentu ne’ebe mak la favorese ba atór judisiariu atu halo julgamentu livre no hakmatek , tribunal bele uza nia kompetensia tomak atu adia julgamentu ka haruka hapara julgamentu provizoriamente to’o tribunal sente livre no hakmatek atu hala’o prosesu julgamentu. JSMP enkoraza atóres tribunal sira atu atua ho dignu, nune’e ema hotu bele respeita prosesu julgmentu no tribunal nia dignidade nu’udar instituisaun ka instrumentu ba justisa nian.

JSMP mos enkoraza tribunal atu iha sirkunstánsia sira ne’ebe nesesariu bele aplika Artigu 283 (1) Kódigu Penál kona-ba Koasaun ba Majistradu ne’ebe defini katak: Ema ne’ebe ho violénsia, ameasa ho mal importante ka ho meiu naran ida, impede juíz ka prokuradór públiku atu ezerse livremente nia funsaun sei hetan pena prizaun tinan 1 to’o tinan 4.

Atu hetan informasaun kle’an favor kontaktu: Luis de Oliveira Sampaio Direitor Ezekutivu JSMP Diresaun e-mail: luis@jsmp.minihub.org Landline: 3323883

No comments:

Related Posts Plugin for WordPress, Blogger...