14 February 2010

JSMP :KOMISÁRIU BA KAK ELEITU ONA LIU HUSI VOTASAUN IHA PLENARIA PARLAMENTU NASIONAL

Komunikado Imprensa Periodu: Fevereiru 2010 KOMISÁRIU BA KAK ELEITU ONA LIU HUSI VOTASAUN IHA PLENARIA PARLAMENTU NASIONAL - Komisaun Anti Korupsaun (KAK) harií liu husi Lei Nu. 08/2009. KAK harií ho objetivo atu kombate korupsaun iha nasaun laran. Bainhira KAK ne’e atu harii, iha antusiasmo maka’as tebes husi povu tomak. Antusiasmu no animu povu nian ne’e bele prova liu husi prosesu asesmentu no konsultasaun publiku ba planu estabelesimentu KAK ne’ebe hala’o husi ONG’s Nasional ka entidades kompetentes sira hodi husu povu nia hanoin kona-ba ejijensia no importansia husi Komisaun refere.

Realmente Timor Leste iha nesesidade sosial no politika atu harí duni Komisaun ba Anti Korupsaun hanesan KAK ne’e. Hodi nune’e, bele hapara ou pelomenuz atu elimina hahalok koruptor sira ne’ebe maka buka meus ka maneiras oi-oin hodi uza povu nia osan ba interese pesoal ka ba grupu ida nian.

Prosesu elisaun ba Komisáriu KAK ne’e marka ona sinal pozitivu ba mehi no espetativa nasional husi Povu Timor Leste nian relasiona ho komitmentu Estadu Timor Leste hodi kombate moras ka virus pratika Korupsaun, Kolusaun no Nepotismu (KKN) ne’ebe buras tebes iha institusoins Estadu sira nian..

Esforsu ne’e ultrapasa dezafius barak durante prosesu negoisasaun entre Bloku AMP no Bloku Partidu Opozisaun ba kandidatu ne’ebe mak merese no kualifikadu atu simu knar nudar Komisáriu. Iha diferensia ideas entre deputados sira konaba figura sé los maka iha kapasidade atu lidera komisaun ida ne’e. Maibe ikus mai iha inisiu Tinan 2010, diferensias ne’e hatudu mudansas no progresso positivo liu husi sira nia komitmentu no desizaun ne’ebe sira hatudu liu husi rezultadu plenaria Parlamentu Nasional, Ségunda Feira, dia 1/02/2010. Deputadus hotu-hotu hamutuk nain 63 halo votasaun ba kandidatu nain 3 ne’ebe maka propoin husi Governu AMP tuir kategoria no kriteria ne’ebe maka determina.

Tuir listas kandidatu nain tolu ne’e maka hanesan Dr. Aderito de Jesus, Dr. Sébastiao Dias Ximenes, Dr. Ivo Valente.

Liu husi prosesu votasaun ségredu ne’e hatudu katak maioria deputados hamutuk nain 40 maka vota ba Dr. Aderito de Jesus nudar Komisáriu KAK, no sira seluk fo sira nia votu ba Dr. Sébastiao Dias Ximenes (ho votu nain 19) no Dr. Ivo Valente (ho votu 3), no votu kategoria nolu (nain 1).

Eventu ne’e konsidera nudar eventu ida ne’ebe importante no konsidera nudar mos eventu históriku ida ba povu iha nasaun ida ne’e. Signifika, Estadu ida ne’e iha duni espíritu atu dezenvolve povu ida ne’e ho espíritu governasaun ne’ebe ses husi hahalok no pratika korupsaun ka livre husi jestaun administrasaun Estadu ne’ebe buras ho pratika KKN.

JSMP kongratula distintus membru Parlamentu Nasional, tantu husi Bloku APM no Opozisaun, tanba mesmu iha diferencia ka diversidade ideas no hanoin ba Komisariu KAK, Parlamentu Nasional konsegue duni hatudu sira nia maturidade komimentu politiku hodi hili Dr Aderito de Jesús nu’udar Komisáriu ba KAK ninian. JSMP mos kongratula ba Dr Aderito de Jesús ne’ebe eleitu nudar Komisariu KAK atu bele dedika ninia kapasidade tomak hodi kombate pratika korupsaun ne’ebe oras ne’e buras ba bebeik iha instituisaun sira governu nian. JSMP mos nakloke atu apoiu no kontribui ba servisu Komisariu ho nia equipa tomak atu luta no kombate pratika korupsaun iha nasaun ida ne’e.

Atu hetan informasaun kle’an favor kontaktu: Luis de Oliveira Sampaio Director ezekutivu JSMP Diresaun E-mail luis@jsmp.minihub.org Landline: 3323883

No comments:

Related Posts Plugin for WordPress, Blogger...