02 March 2010

Tribunal Distrital Baucau Absolve Akuzasaun ba Kazu Violasaun Seksual Tamba Laiha Evidensia

Due to a lack of funding, the reports by the East Timor Judicial System Monitoring Program are only available in Tetum. If anyone wishes to volunteer to translate these important reports on court proceedings in East Timor into English, please Contact Us at easttimorlegalnews@gmail.com

JSMP Komunikadu Imprensa Edisaun :Fevereiru 2010 TRIBUNAL DISTRITAL BAUCAU    ABSOLVE AKUZASAUN BA KAZU VIOLASAUN SEKSUAL TAMBA LAIHA EVIDENSIA

Husi loron 15  to’o 18 Fevereiru de 2010 Tribunal Distrital  Baucau hala’o julgamentu ba kazu ofensas korporais rua no violasaun seksual  ida. Kazu rua ne’e ho nia nomor prosesu 232/CRM-S/2009/TD.BC, no  260/CRM-S/2009/TD. Entre kazu hirak ne’e,   kazu ofensas korporais  mak la hala’o audensia julgamentu, tamba vitima no arguidu  sira rezolve ona liu husi mekanismu tradisional.

Iha parte seluk, julgamentu ba kazu violasaun seksual, Ministeriu Públiku  akuza arguido ho artigu 285 Kódigu Penal Indonesia. Maske nune’e, durante iha prosesu julgamentu, Ministeriu Publiku la konsegue aprejenta evidensia  ne’ebé mak hatudu katak arguido ho ameasa hodi halo violasaun seksual ba vitima. Tanba faktus ne`ebe mak la provadu durante julgamentu juiz nebe maka dirije audensia ne’e absolve tiha akuzasaun husi Ministeriu Publiku ne’e.

Natureza krimi violasaun seksual nu’udar krimi ida ne’ebe lori konsekuensia psikolojiku todan, traumatiku no lori tempu naruk tebes ba rekoperasaun psikolojiku no sosial. Rekoñese katak pratikamente, defisil tebes atu asegura evidensia ne’ebe adequadu ba kazu sira krimi ho karakter violensia seksual, maibe JSMP hanoin katak esforsu hot-hotu tenke halo hodi prevene situasaun ne’e sai posivel.

JSMP konsiente katak kuandu ita koalia kona-ba asuntu lei iha kontestu prosesual nian, signifika katak ita koalia kona-ba prova ka evidensia. Tanba ne’e sei ita lori kazu ruma ba tribunal ka nu’udar Ministeriu  Publiku ne’ebe kaer titular ba asaun krimi nian, persiza konsidera sirkumstansia hot-hotu husi kazu ida bainhira deside atu halo akuzasaun. Hodi nune’e bele evita situasaun sira iha leten.

 Refere ba situasaun hirak ne’e, JSMP husu ba Ministeriu Publiku nebe maka reprezenta vitima durante prosesu tomak, para bele prepara akuzasaun tuir regras no ejijensia prosesual hanesan evidensia nebe maka forte hodi nune’e bele kondena duni arguidu tuir hahalok ne`ebe nia komete.

JSMP  nota katak iha kazu nebe’e maka mensiona iha leten Ministériu Públiku ladun halo esforsu masimu , tanba  aprezenta akuzasaun la ho faktus ka evidensia ne’ebe mak adequadu.  JSMP  rekomenda atu autor tribunal sira, liu-liu Ministeriu publiku bele hala’o kna’ar ho diak bazea ba mandatu ne’ebe mak lei fo hodi garantia justisa ba vitima no hametin ita nia sistema tribunal nia funsionamentu

Atu hetan informasaun klaru, kontaktu: Luis de Oliveira Sampaio Diretur Eksekutivu JSMP Email: luis@jsmp.minihub.org Landline: 3323883    
Post a Comment
Related Posts Plugin for WordPress, Blogger...