02 June 2010

Sumariu Julgamentu Kazu iha Tribunal Distrital Oe-Cusse

Sumariu Julgamentu Kazu iha Tribunal Distrital Oe-Cusse (Summary of Oe-Cusse Distict Court Judgements in May 2010) Maiu 2010

Julgamentu ba kazu krime rua iha médiu fulan Maiu 2010

Orariu julgamentu iha Tribunal Distrital Oe-Cusse la’o hanesan bai-bain. Iha segundu semana fulan Maiu tuir orariu julgamentu ne’ebé maka TDO hasai iha kazu krime lima (5) ne’ebé tama iha ajenda atu halo julgamentu.

Husi kazu sira ne’e hot-hotu klasifikadu nu’udar kazu krime ofensas ba integridade fíziku simples no furtos. Maske nune’e tribunal la konsegue realiza prosesu hotu-hotu tanbá iha kazu balun ne’ebé maka tenki adiadu tanbá razoins arguidu husi kazu balun la kumpri notifikasaun tribunal nian hodi la marka sira nia prezensa.

Tuir mai informasaun kompletu kona-ba prosesu sira ne’ebé maka hanesan tuir mai:

1. Prosesu Julagmentu ba kazu Nu.08/PCO/2010/TDO

Tribunal Distritu Oe-Cusse (TDO) iha loron 18 de Maiu lê akuzasaun ba arguidu JE no SA ba kazu krime Ofensa ba integridade fíziku ne’ebé arguidu sira komete.

Julgamentu ne’e hala’o bazeia ba akuzasaun ne’ebé Ministériu Públiku (MP) akuza argudiu nain rua ho krime ofensas ba intergridade fíziku ne’ebé maka sira halo hasoru vítima AS.

Iha konteudu akuzasaun haktuir katak iha dia 25 de Dezembru 2009, mais ou menus tuku 09.00 iha Jardim Oe-Cusse Vila, arguidu JE tuku dala barak hasoru vítima AS maibé kona deit dala ida iha ibun. Nune’é mos arguidu tebé dala ida iha vítima ninia hirus matan too monu ba rai.

Konsekuensi husi hahalok arguidu nian rezulta vítima hetan kanek iha ibun no ran. Motivu husi akontesementu ida ne’e tanbá vítima tolok no trata aat hasoru arguidu nia alin feto ne’ebé mos nu’udar vítima nia fén ne’ebé maka oras ne’e ho estatutu hela separadu ba malu (pisah ranjang).

Maske iha akuzasaun MP akuza arguidu nain rua, JE no SA maibé iha sentensa ne’ebé maka Juiz lê iha dia 19 de Maiu nu’udar desizaun final husi tribunal, tribunal so kondena deit arguidu JE ho pena kastigu durante fulan 3 tanbá arguidu maka nu’udar autór material iha kazu ida ne’e tuir artigu 145 (1) KP ne’ebé defini katak “sé maka ofende ema seluk nia isin ka saude sei hetan pena prizaun too tinan 3 ka multa”.

Tuir Juiz katak artigu aplikavel ne’e prova duni tanbá hahalok arguidu priense rekizitus . Faktus provadus ne’ebé maka produs maka hanesan arguidu rasik konfesa faktus sira katak akuzasaun ne’e loos. Deklarasaun husi vítima no depoimentus husi Testemuña AO ne’ebé mos reforsa akuzasaun MP nian refere.

Konkluzaun husi desizaun ida ne’e maka, tribunal aplika pena alternativu husi pena efetivu fulan tolu (3) ba arguidu hodi selu multa ho osan Dolar Amerikanu haat ($ 4) kada loron ida durante loron 90. Nune’é arguidu iha dever atu selu osan hamutuk $ 360,00 (Dolar Atus tolu neen nulu).

Entertantu ba arguidu tribunal konklui katak la iha faktus provadus ne’ebé produz iha julgamentu laran hodi justifika SA nia involvimentu iha kazu ne’e. Aleinde ne’e akuzasaun ne’ebé maka MP akuza hasoru arguidu SA la indika halo asaun ruma hasoru vítima iha mumentu akontesementu. Tanbá ne’e, tribunal hamonu sentensa absolutoriu ba arguidu SA husi akuzasaun Ministériu Públiku.

Aleinde julgamentu Prosesu No. 08/PCO/2010/TDO iha leten, kazu rua seluk ne’ebé maka tama agenda atu julga iha loron hanesan, 18 de Maiu maibé tribunal tenki deside adia tanbá arguidu na’in rua husi prosesu 03/PCO/2009/TDO no 52/PCO/2009/TDO la marka sira nia prezensa iha tribunal. Arguidu sira mos la aprezenta antes informasaun ba tribunal konabá sira nia difikuldades. Tanbá razaun sira ne’e tribunal deside atu kontinua julgamentu ba prosesu rua ne’e iha dia 13 de Jullu 2010.

2. Prosesu julgamentu ba kazu Nu. 52/PCO/2009/TDO

Julgamentu ba prosesu kazu ida ne’e mos la konsegue realiza tanbá arguidu la marka prezensa iha tribunal, nune’e tribunal fo xamada atensaun ba arguidu tanbá la kumpri notifikasaun tribunal nian dala 3 ona. Ba notifikasaun ikus ida ne’e maka arguidu la marka tan ninia prezensa, tribunal sei hasai mandadu kapturasaun hodi kaptura arguidu hodi hatan iha prizaun hodi halo fasilita prosesu julgamentu.

3. Prosesu julgamentu ba kazu Nu. 13/PCO/2010/TDO

Tribunal Distrital Oe-Cusse halo deit omologu ba kazu ne’e, tanbá parte vítima no arguidu halo ona akordu dame eskrita antes tribunal bolu atu julga sira nia kazu. Prosesu ida ne’e tama agenda dia 17 de Maiu nian ne’ebé adiadu no kontainua fali iha dia 18 tanbá tribunal rezeita deklarasaun ne’ebé maka partes rua halo.

Rezeitasaun tribunal ba deklarasaun partes rua nian ne’ebé maka nia konteudu laduun loos tanbá arguidu maka nu’udar parte vítima nia fatin.

Atu hetan informasaun kle’an favor kontaktu:
Luis de Oliveira Sampaio
Direitór Ezekutivu JSMP
Diresaun e-mail: luis@jsmp.minihub.org
Landline: 3323883

No comments: