12 September 2010

Vitima Masacre Bob-Uf Tumin Ejije Harii Museum kompleita ho seguransa

Setembru 2010 - Judisial System Monitoring Programme (JSMP) liu husi Unidade Programa Observasaun Parlamentu (POP) iha Quarta feira 25 Agostu 2010 liu bá, hala’ó Fokus Group Diskusaun (FGD) konabá Esbosu Lei Instituisaun Memoria no Esbosu Lei konabá Reparasaun iha fatin Masacre Bob-Uf Tumin, Suco Bobometo, Sub Distrito Oe-silo, Distrito Oe-Cusse.

Luis de Oliveira Sampaio Direitór JSMP hateten, objetivu husi FGD ne’e atu fahe informasaun no rona direitamente idea ka opiniaun husi vitima vulnerabel sira ne’ebè laos kategoria veteranus ka idozus  atu fo sira nia hanoin relasiona ho esbosu lei instituisaun memorial no esbosu lei reparasaun ne’ebé sei fo benefisiu ba sira.

Enkontru ne’ebè organiza husi JSMP ne’e, hetan entusiasmu makas husi vitima sira.  Maske fou-foun xefe suco Bobometo limite atu hili deit ema nain 30 wainhira JSMP to’o iha fatin FGD partisipantes barak liu hamutuk 78 mak hakarak partisipa hodi rona informasaun.

Fokus Group Diskusaun hamosu rekomendasaun lubuk husi vitima no familia vitima sira iha Masacre Bob-Uf Tumin hanesan tuir mai ne’e;

·         Vitima ejije ba Parlamentu Nasional atu tau matan ba ema sira ne’ebè lakon sira nia vida iha tinan 1999 liu-liu iha loron 8 to’o 9 fulan Setembro 1999.

·         Husu ba Parlamentu no Governu atu harii museum kompleita ho monumentu ida iha fatin Masacre hotu-hotu, liu-liu ba Tumin, atu nune bele haloot sasan faktus hanesan Kalsa, Kamiza, Tali, Sintu, Kadeli, vitima sira ne’ebé ema oho no oras ne’e sasan hirak ne’e sei rai deit iha kaixa Supermi.

·         Husu mos ba governu atu rekruta seguransa permanente iha fatin masacre hotu-hotu liu-liu ba Tumin atu nia responsabiliza hamoos no hein monumentu inklui museum ne’ebè atu tau sasan vitima sira nian ne’ebè konsidera hanesan memoria.

·         Husu ba Parlamentu atu hari’i escritoriu nasional ida ne’ebe independente inklui eskritoriu distrital ba vitima hotu-hotu inklui escritoriu ida iha Distrito Oe-Cusse atu nune’e bele implementa direitamente esbosu lei rua ne’e ba sira vitima iha futuru. 

·         Vitima sira mos husu ba Parlamentu no Governu wainhira Prezidente Repúblika promulga tiha lei rua ne’e tenke sosializa to’o iha vitima sira iha baze.

·         Vitima Bob-uf ka masacre Tumin rekomenda ba komisaun A Parlamentu Nasional no ba meja plenaria parlamentu atu hahu ona diskute konabà esbosu lei rua refere iha fulan Setembru ka Otobru 2010.

·         Vitima masacre Tumin mos ejije ba estado Indonesia atu kontribui mos fo reparasaun ba vitima sira iha Timor Leste.

·         Konabá justisa  vitima Masacre Tumin entrega responsabilidade tomak ba estado Timor Leste no Indonesia atu prosesa autor krime grave sira iha futuru.    

Direitór JSMP hein katak, hosi rekomendasaun ka ejijensia sira ne’ebè vitima Masacre Bob-Uf Tumin hato’o ne’e membru Parlamentu Nasional sira bele konsidera atu akumula sira nia hanoin iha esbosu lei Instituisaun memoria no esbosu lei reparasaun antes aprova hodi responde duni vitima sira nia preukupasaun.

Luis de Oliveira Sampaio mos reafirma nafatin JSMP nia pozisaun katak tenki iha justisa ba autor krime grave sira maske vitima sira hakarak entrega responsabilidade tomak ba estado Timor Leste ho Indonesia hodi prosesa autor krimes sira.

Atu hetan infórmasaun kle’an favor kontaktu: Luis de Oliveira Sampaio Direitor Ezekutivu JSMP
Diresaun e-mail: luis@jsmp.minihub.org Landline: 3323883

Note : halo favor ignora JSMP ninia publikasaun (Press Release) iha loron 7 Setembru 2010 kona bá “Vítima Masakre Bob-Uf Tumin Rekomenda atu Parlamentu rona sira nia idea” No konsidera Press ne’ebé ami haruka tuir mai ne’e mak hanesan versaun final.

No comments: