28 June 2012

Tribunál Distrital de Díli halo prosesu julgamentu ba kazu violénsia doméstika ne'ebé akontese iha Suku Motael, Distritu Dili

22/06-2011 JSMP Komunikadu Imprensa Periódu: Juñu 2012 Edisaun: 22 Juñu 2012 - Tribunál Distrital de Díli halo prosesu julgamentu ba kazu violénsia doméstika ne’ebé akontese iha Suku Motael, Distritu Dili

Iha loron 19 fulan Juñu 2012 Tribunál Distritál de Díli halo prosesu julgamentu ba kazu ho natureza violénsia doméstika ho Númeru Prosesu; 262/TDD/2012. Kazu refere akontese iha Aldeia Palapasu, Suku Motael, Sub Distritu Vera Cruz, Distritu Díli. Arguidu ba kazu ne’e ho inisial AD ne’ebé prátika aktu krime hasoru nia kónjuje RCB.

Prosesu julgamentu ba kazu ne’e direje husi juiz singular Dr. Duarte Tilman Soares no parte Ministériu Públiku reprezenta husi Dr. Domingos Barreto. Aleinde ne’e arguidu rasik hetan asisténsia legál husi Dr. Cançio Xavier Defensór Públiku no Ofisial de Justisa Sr. Julio Martins.

Diretór Ezekutivu JSMP, Luis de Oliveira Sampaio haktuir katak, JSMP kontinua louva ba tribunál sira partikularmente Tribunál Distrital Díli ne’ebé kontinua hatudu pasu positivu, tanba julgamentu refere hetan kedas konkluzaun iha tempu hanesan. Prosesu ida ne’e refleta duni ba prinsipiu julgamentu ne’ebé lais, baratu, justu no kredivel ba parte sira ne’ebé hasoru justisa.

Tuir Ministériu Públiku nia akuzasaun haktuir katak, iha loron 2 fulan Abril tinan 2011, maiz ou menuz iha oras tuku 3 lorokraik, iha uma arguidu no lezada sira nian mosu duni dezintendimentu entre sira nain rua, bainhira arguidu mai iha uma ho kondisaun ne’ebé lanu.

Tanba ho kondisaun lanu, lezada hare no koalia barak too arguidu sente la satisfas ho lia fuan hirak ne’e. Arguidu fila basa lezada dala tolu iha lezada nia oin, tebe dala hat iha ain karuk, tuku dala lima iha lezada nia kotuk laran. Aktu hirak ne’e akontese no hamosu sofrimentu fíziku ba lezada rasik.

Iha tribunál arguidu rekoñese faktu sira ne’ebé Ministériu Públiku akuza ba arguidu. Aleinde ne’e iha parte seluk bainhira tribunál konfirma ba lezada konabá faktus hirak ne’e, lezada rasik deklara los duni aktu refere akontese duni hanesan saida mak deklara ona husi arguidu rasik.

Refere ba faktus hirak ne’e Ministériu Públiku kondena arguidu ho Lei Kontra Violénsia Doméstika artigu 35 junta ho artigu 145 Kódigu Penál Timor Leste ho pena prizaun tinan 3 ka multa.

Depoisde rona tiha deklarasaun husi arguidu no lezada, tanba laiha tan ona provas sira seluk hanesan prova testemuñal, nune’e, tribunál aproveita oportunidade hodi kontinua kedas ba alegasaun finál.

Iha alegasaun finál Ministériu Públiku kontinua defende katak aktu violénsia doméstika ne’e akontese duni. Maibé tanba arguidu ho lezada diak malu hodi hare sira nia oan, nune’e husu ba tribunál atu aplika pena suspensaun ba arguidu.

Iha parte seluk, defeza iha nia alegasaun konkorda ho buat ne`ebé mak Ministériu Públiku hato’o ona.

Desizaun tribunál, bázeia ba faktus hirak ne’e hotu tribunál imediatamente halo konkluzaun ba kazu refere ho lei no konviksaun juiz nian rasik, nune’e tribunál hamonu pena fulan 6 prizaun no suspende ba tinan 1 ba arguidu violénsia doméstika.
Post a Comment
Related Posts Plugin for WordPress, Blogger...