28 June 2012

Tribunál Distritál Suai Julga Kazu Infantisídiu ba Arguida DMN

28/06/2012 Komunikadu Imprensa
Periódu: Juñu 2012 Edisaun: 28 Juñu 2012 Tribunál Distritál Suai Julga Kazu Infantisídiu ba Arguida DMN - Iha loron 06 fulan Juñu Tribunál Distritál Suai hala’ó prosesu julgamentu ba kazu infantisídiu ne’ebé rejista ho Númeru Prosesu: 59/PEN/2011/TDS. Arguida ba kazu ne’e, ho inisisál DMN ne’ebé halo krime infantisídiu. Infantisidiu katak inan ne’ebé oho nia oan hafoin partu. Kazu ne’e akontese iha Aldeia Taimea, Suco Mali-Lait, Sub-Distritu Bobonaro, Distritu Bobonaro, iha loron 10 Fevereiru 2011.

Prosesu julgamentu hala’ó ho kompozisaun juízes kolektivu ne’ebé kompostu husi Dr. Cosntançio Barros Basmery nu’udar juíz prezidénte, akompaña husi Dr. Âlvaro Maria Freitas no Dra. Florençia Freitas. Iha parte seluk, Minstériu Públiku reprezenta husi Dr. Oscar Silva Tavares (MP Internasionál) no arguida ninia defeza Dr. João Henrique de Carvalho husi Eskritóriu Defensória Públika.

Diretór Ezekutivu Luis de Oliveira Sampio haktuir katak aktu krime ne’ebé komete husi arguida hasoru nia bebe rasik, konsidera nu’udar krime omísidu infantisídiu tanbá ne’e husu ba tribunál kompetente atu hamonu pena ne’ebé mak justu bázeia ba gravidade krime ne’ebé mak arguida komete.

Bázeia ba akuzasaun Ministériu Públiku haktuir katak iha loron 10 fulan Fevereiru 2011, iha oras tuku 09.00 dader, arguida komete krime infantisídiu ho maneira buti metin bebe nia nia ibun depoisde partus bainhira bebe ne’e tanis makaas.

Konsekuensia husi arguida nia hahalok hirak ne’e, bebe hakotu nia vida. Depoisde akontesimentu ne’e arguida lori bebe nia isin loloon ba tau iha hudi hun no lori fatuk bo’ot hanehan tan ba iha bebe nia isin loloon.

Relasiona ba kronolójia husi kazu refere, Ministériu Públiku akuza arguida ho artigu 142 Kódigu Penál ho moldura penál husi tinan 3 to’o 10 iha prizaun.

Bázeia ba JSMP nia observasaun nota katak arguida rekuñese katak akuzasaun Ministériu Públiku nian ne’e loos. Mesmu nia mos haktuir katak nia arepende nia hahalok hirak ne’e no promete katak iha futuru sei la repete fila fali hahalok ne’e.

Iha alegsaun finál Ministériu Públiku nian, subliña katak arguida provadus kontra artigu 142 Kódigu Penál. Pozisaun Ministériu Públiku bázeia ba deklarasaun husi arguida nomós liga ba akuzasaun laran. Tanbá ne’e, Ministériu Públiku husu ba tribunál atu kondena arguida ho pena tinan 3 iha prizaun, maibé suspende ba tinan 3. Ho razaun tanbá arguida arepende ba nia hahalok nomós arguida iha oan ne’ebé mak foin fulan 2 (rua).

Nune’é husi parte defeza hato’ó ba tribunál atu aplika pena suspensaun ba arguida tinan 2 (rua), tanbá arguida foin primeíra vez mai hatan iha tribunál, rekuñese ba nia hahalok nomós arenpede duni ninia hahalok refere.

Aliende ne’e, JSMP nia observasaun katak Ministériu Públiku aprezenta testamuña nain 5 (lima), maibé tribunál la presiza testamuña sira nia depoimentu tanbá, arguida rekuñese nia hahalok hirak ne’ebé hakerek iha akuzasaun Ministériu Públiku nian.

Relasiona ho faktus sira ne’ebé deskreve iha leten, JSMP enkoraza nafatin ba autóridade ne’ebé kompetente atu tetu no tau konsiderasaun tuir sirkunstánsia hirak ne’e, hodi nune’é bele fó justisa ne’ebé mak justu ba soseidade evita krime hanesan la bele repete tan iha futuru.

Tribunál marka fali data audiénsia hodi halo leitura akórdaun ba kazu ne’e, iha loron 20 Juñu 2012, iha oras tuku 10.00 dader.
Post a Comment
Related Posts Plugin for WordPress, Blogger...