09 October 2016

JSMP lamenta ho planu orsamentu Parlamentu bá 2017 hanesan esbanzamentu bá orsamentu Estadu nian

ETLJB 9 October 2016  Source:JUDICIAL SYSTEM MONITORING PROGRAMME PROGRAMA MONITORIZASAUN SISTEMA JUDISIAL

06 Outubru 2016
Komunikadu Imprensa
Parlamentu Nasionál

JSMP lamenta ho planu orsamentu Parlamentu bá 2017 hanesan esbanzamentu bá orsamentu Estadu nian

JSMP lamenta ho planu orsamentu Parlamentu bá tinan 2017 hanesan esbanzamentu bá osan Estadu nian, tanba planu orsamentu ne’e la realistiku ho mandatu lejislativu iha tinan 2017 nian ne’ebé sei termina iha fulan-Jullu 2017.

Iha plenáriu ne’ebé hala’o iha 04 Outubru 2016, Parlementu Nasionál (PN) diskute no aprova iha jeneralidade no espesialidade no mós votasaun finál globál bá Projetu Resolusaun n.º 31/III (5ª) – kona-ba Planu Asaun ba Orsamentu Parlamentu Nasionál 2017 nian. Votasaun  ne’e konklui ho votus afavór 43, kontra 0 no abstain 1 hosi totál deputadu 44.

Iha diskusaun, deputadu/a sira hosi bankada Fretelin hanesan Alvina Marçal Freitas, Francisco Miranda Branco  no Maria Angêlica R. da C. dos R no Maria Lourdes M. de S. Bessa hosi bankada PD ne’ebé kestiona makas relatóriu kona-ba orsamentu ne’ebé defisit, planu orsamentu ne’ebé Konsellu Administrasaun elabora la kumpri pakote fiskál Governu. Aleinde ne’e sira mós preukupa no kestiona planu sosa kareta no laptop foun bá deputadu foun sira  lejizlatura dahaat (4) nian la justu no parlamentu hakarak gasta de’it osan estadu. Deputadu sira mós husu atu halo auditória bá Parlamentu Nasionál iha futuru.

Hatan bá preukupasaun deputadu sira nian, Prezidente PN Aderito Hugo haktuir katak sosa kareta no laptop foun bá deputadu foun sira mak afeita bá orsamentu  2017 sa’e no desizaun ne’e konsensu bankada sira hotu nian. Enkuantu  kona-ba defisit  milliaun 10 bá tinan ne’e tanba tratamentu saúde no Ospitál Singapura hatama invoice tarde, inklui problema auditória. PN halo ona karta bá iha Tribunál Kontas no iha ona resposta katak 2017 mak sira sei halo auditória bá Parlamentu.

“JSMP lamenta ho planu orsamentu privativu parlamentu nian ne’ebé la razoável no la realístiku kompara ho mandatu ne’ebé sira sei kumpri bá 2017 ne’ebé sei to’o de’it iha 15 Jullu 2017. JSMP konsidera planu orsamentu ne’e hanesan  esbanzamentu (penghamburan) bá orsamentu estadu iha  lejizlatura datoluk (3) nian, dehan, Casimiro dos Santos, Diretór Interinu JSMP.

JSMP rekomenda bá entidade kompetente hanesan órgaun supervizaun Parlamentu Nasionál nian atu halo fiskalizasaun ne’ebé rigorozu ba prosesu no progresu ezekusaun orsamentu Parlamentu Nasionál nian iha nia últimu mandatu iha 2017.

Orsamentu privativu Parlamentu nian ne’ebé aloka ba 2017 nian, totál dotasaun milliaun US$17,697  ho kategoria bá verba sira mak hanesan tuir mai ne’e: saláriu vensimentu milliaun US$5,116, ben bá servisu; milliaun US$7,934 transférensia públika; milliaun US$930 no despeza bá Kapitál milliaun US$3,717.


Post a Comment
Related Posts Plugin for WordPress, Blogger...