03 December 2016

Parlamentu Nasionál Aprova Orsamentu Retifikativu 2016 ho Unanimidade: JSMP enkoraza partidu opozisaun atu la-lakon nia papél kontrolu iha kultura demokrasia iha Timor-Leste



JUDICIAL SYSTEM MONITORING PROGRAMME
PROGRAMA MONITORIZASAUN SISTEMA JUDISIAL

Komunikadu Imprensa
Parlamentu Nasionál
19 Jullu 2016 

Parlamentu Nasionál Aprova Orsamentu Retifikativu 2016 ho Unanimidade:

JSMP enkoraza partidu opozisaun atu la-lakon nia papél kontrolu iha kultura demokrasia iha Timor-Leste


Iha 13 Jullu 2016, liuhusi reuniaun Plenária Extraordinária Parlamentu Nasionál, deputadu sira dala ida tan aprova orsamentu retifikativu ho unanimidade (lian ida deit). Aprovasaun unanimidade ne’e hala’o liuhosi diskusaun no votasaun iha espesialidade nomós votasaun finál globál ba Proposta Lei Nú 41/III (4.ª) - Primeira Alterasaun ba Orsamentu Jerál Estadu 2016.

Plenaria debate ba jeneralidade no espesialidade hala’o hosi 12 to’o 13 Jullu 2016.  Durante diskusaun,deputadu sira afirma katak orsamentu ne’ebé Governu propoin pertinente no tanba ne’e Parlamentu tenki aprova.

“Primeiraves depoisde ukun rasik-an, JSMP observa orsamentu retifikativu  ne’ebé ho montante bo’ot, maibe orsamentu ne’e pasa ho votasaun unanimidade. Ne’e supreza ida, ita nia vida demokrasia, tanba partidu opozisaun sira lakon sira nia papel kontrolu iha kultura demokrasia. JSMP enkoraja partidu opozisaun atu la bele lakon nia papél iha kultura demokrasia iha Parlamentu Nasionál” dehan Luis de Oliveira Sampaio, Diretór Ezekutivu JSMP

Totál orasamentu ne’ebé Governu propoin iha proposta alterasaun iha orsamentu retifikativu USD$ 390,7 ba fundu infrastrutura ho kategoria kapitál dezenvolvimentu nian. Orsamentu ne’e kobre ba projetu bo’ot 4 mak hanesan projetu Portu Tibar, drainazen Dili laran, projetu Supply Base Suai-Beasu (projeitu Tasi Mane) no pagamentu ba divídas governu nian ba projetu emerjénsia tomak. Ho aumentu  orsamentu jerál estadu USD 391 millaun ne’e, bainhira soma hamutuk, totál dezpesa Estadu ba 2016 USD$1.952,9.

Durante diskusaun, deputadu sira mós subliña preokupasaun barak ne’ebé governu persiza hadi’a. Preokupasaun hirak ne’e mak hanesan jestaun sistema administrasaun públika, efetividade ba kontrolu ezekusaun orsamentu hodi hasa’e rendimentu ba povu, no kria Komisaun Eventuál ida iha Parlamentu hodi halo akompañamentu ba pagamentu likidasaun dívidas sira ne’ebé Governu iha no propoin ona iha orsamentu ne’e. Prosesu ne’e atu garantia kualidade ezekusaun orsamentu hosi ejizénsia povu nian ba obra hirak emerjénsia nian ne’e.

JSMP husu ba VI Governu Konstitusionál atu asegura antinjementu ba objetivu sira tuir planu dezenvolvimentu nasionál ne’ebé parlamentu apvora ona iha iha tinan 2011 iha IV Governu Konstitusionál ba interese hadi’a povu nia moris, Governu tenke asegura ezekusaun ida-ne’ebé regorozu.

JSMP espera katak Komisaun Eventuál Parlamentu Nasionál ba fiskalizasaun no akompañamentu ba prosesu apuramentu pagamentu dívidas estadu nian bele asigura efetividade no efikasia iha setór públiku ho nune’e bele asegura dezenvolvimentu sustentável. Liu-liu atu asegura katak iha balansu entre despeza estadu no reseitas.

ETLJB

No comments:

Related Posts Plugin for WordPress, Blogger...