05 December 2016

Submisaun JSMP ba Komisaun Reforma Setór Lejislativa no Justisa Maiu 2016

JUDICIAL SYSTEM MONITORING PROGRAMME
PROGRAMA MONITORIZASAUN SISTEMA JUDISIÁRIU


Submisaun JSMP ba Komisaun Reforma Setór Lejislativa no Justisa
Maiu 2016

Data : 13 Maiu 2016
Númeru : 7/S/V/2016

Asuntu        : Submisaun JSMP ba asuntu sira iha setór lejislativu no justisa


Bodik ba     : Ex.mo Dr. Jorge Manuel Ferreira da Graça,
Prezidente Komisaun Reforma Setór Lejislativu no Justisa

Hosi            : JSMP (Judicial System Monitoring Programme)

Saudasoins Justisa!

Uluk nanain, lori JSMP nia naran, ami hakarak saúda Sr. Prezidente Komisaun ho Membru Permanente Komisaun Reforma sira tomak ba servisu importante ne’ebé Estadu depozita ba Ita-Boot sira. JSMP hanoin katak prezensa ‘Komisaun Reforma Setór Lejislativu no Justisa’ (‘Komisaun’) ne’e importante no pertinente tebetebes.

Antes hato’o ami nia hanoin relasiona asuntu sira ne’ebé ami hanoin importante atu konsidera ba nesesidade reforma, permite ami atu introdús ami nia knaar ne’ebé ami dezempeña durante ne’e.

Kona-ba JSMP

JSMP (Judicial System Monitoring Programme) hanesan organizasaun sosiedade sivíl independente ida ne’ebé servisu atu garante justisa ba ema hotu. JSMP estabelese iha loron 28 fulan Abril 2001, ho papel institusionál atu monitoriza prosesu Tribunál Ad Hoc iha Jakarta, Indonézia no Painél Espesiál ba Krime Graves iha Timor- Leste. JSMP hala’o atividade monitorizasaun ba prosesu julgamentu iha tribunál distritál haat no Tribunál Rekursu, no halo akompañamentu intensivu no rigorizu ba dezenvolvimentu iha sistema justisa formal iha Timor-Leste.

JSMP mós observa atividade lejislativu iha Parlamentu Nasionál, partikularmente Komisaun A. JSMP regularmente prodús relatóriu anuál, relatóriu temátiku, komunikadu imprensa, sumáriu kazu no submisaun ba ezbosu lei sira ne’ebé prepara hosi governu no Parlamentu Nasionál. Atu hetan informasaun detallu liu kona-ba JSMP, favor vizita JSMP nia website iha: www.jsmp.tl

Ho referénsia ba Rezolusaun Governu Nú. 30/2015, JSMP aprezenta asuntu sira tuir mai ne’ebé JSMP konsidera importante no nesesariu atu reforma.  Embora iha varias asuntu ne’ebé nesesita ba reforma, maibé iha oportunidade ne’e, JSMP limita-an atu lista asuntu balun hanesan iha dokumentu aneksu. Ami hein hola laran-metin atu deskute asuntu hirak ne’e diretamente ho Señor Prezidente no Membru Komisáriu sira tuir ita boot sira nia disponibilidade.

No comments:

Related Posts Plugin for WordPress, Blogger...