01 November 2017

JSMP : Sumáriu Kazu Tribunál Distritál Oe-Cusse Períodu Jullu 2017

East Timor District Courts Crest, Timor-Leste
Totál kazu ne’ebé JSMP monitoriza: 26

Deskripsaun sumáriu julgamentu ba desizaun kazu sira


1.     Krime ofensa ba integridade fízika simples ho natureza violénsia doméstika

Nú. Prosesu                             : 0003/17.OEOSL
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 1 suspende ba tinan 1

Iha 04 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu BB hasoru nia feen, iha Distritu Oe-Cusse.

Akuzasaun Prokuradór
Prokuradór akuza katak iha 19 Fevereiru 2017, iha tuku 17:00 lokraik, arguidu basa dala 2 iha lezada nia-hasan loos, dala 1 iha lezada nia-hasan karuk no tebe dala 1 iha lezada nia-matan fukun sorin loos. Aktu hirak ne’e rezulta lezada sofre moras no mean iha lezada nia hasan no matan-fukun. Kazu ne’e aneksa mós ho relatóriu médiku hosi Ospitál Referal Oe-Cusse no fotografía hosi Polísia –VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.



Produsaun ba prova
Arguidu konfesa faktus hotu iha akuzasaun no deklara katak arrepende ona nia hahalok, di’ak malu ona ho lezada  no foin primeira-vez  komete krime hasoru nia-feen. Arguidu mós promete sei la repete ninia hahalok iha futuru. Arguidu nu’udar to’os-nain, laiha rendimentu fíksu no iha oan nain 5.

Prokuradór husu ba Tribunál atu prezinde lezada nia deklarasaun tanba arguidu konfesa faktus hotu iha akuzasaun no Defeza mós konkorda ho pedidu ne’e.

Alegasaun finál
Prokuradór haktuir katak arguidu provadu komete krime hasoru nia feen no arguidu iha intensaun maka’as atu baku lezada, mezmu arguidu hatene hela katak lezada laiha forsa atu halo reasaun hasoru arguidu. Aliende ne’e kazu violénsia doméstika barak mak akontese iha Oe-Cusse kompara ho distritu sira seluk. Tanba ne’e husu ba Tribunál atu kondena arguidu tuir artigu 145 Kódigu Penál (KP).

Enkuantu Defeza haktuir katak arguidu konfesa faktus hotu iha akuzasaun, di’ak malu ona ho lezada no foin primeira-vez komete krime hasoru nia feen no promete ona katak sei la komete tan krime hasoru nia-feen.  Tanba ne’e husu ba Tribunál atu fó justisa ba arguidu tuir nia kulpa.

Desizaun

Bazeia ba faktu sira ne’e hotu, Tribunál konklui prosesu ne’e no kondena arguidu ho pena prizaun tinan 1 suspende ba tinan 1.

2.     Krime ofensa ba integridade fízika simples ho natureza violénsia doméstika

Nú. Prosesu                             : 0158/16.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 1 suspende ba tinan 2

Iha 04 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu AL hasoru nia feen, iha Distritu Oe-Cusse.

Akuzasaun Prokuradór
Prokuradór akuza katak iha 29 Setembru 2016, iha tuku 16:00 lokraik, arguidu foti ai-sar futun 1 baku dala 1 iha lezada nia matan loos no dala 1 iha lezada nia liman sikun parte loos no rezulta lezada sofre moras iha matan, bubu no mean iha lezada nia liman sikun. Kazu ne’e aneksa mós ho relatóriu médíku hosi Pradet no fotografía hosi Polísia–VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok, foin primeira-vez mai hatan iha Tribunál no di’ak malu ona ho lezada. Arguidu nu’udar to’os-nain, laiha rendimentu kada fulan no iha oan nain 5. Arguidu konsiente katak baku ema nia isin bele kauza moras no kanek no promete sei la komete krime hasoru lezada iha futuru.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun no hosi parte Defeza konkorda ho pedidu ne’e.

Alegasaun finál
Prokuradór konsidera arguidu provadu komete krime hasoru lezada bazeia ba arguidu nia-deklarasaun. Atu evita arguidu repete tan ninia hahalok, husu ba Tribunál atu kondena arguidu tuir artigu 145 KP.

Entretantu, Defeza haktuir katak arguidu konfesa faktus hotu iha akuzasaun, di’ak malu ona ho lezada no foin primeira-vez mai hatan iha Tribunál. Tanba ne’e husu ba Tribunál atu fó justisa ba arguidu tuir arguidu nia kulpa.

Desizaun
Depoisde avalia faktus provadu sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun tinan 1 suspende ba tinan 2.

3.     Krime ofensa ba integridade fízika simples ho natureza violénsia doméstika

Nú. Prosesu                             : 0069/16.OEPMK
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 1 suspende ba tinan 1

Iha 04 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu FJS hasoru nia feen, iha Distritu Oe-Cusse.

Akuzasaun Prokuradór
Prokuradór akuza katak iha 10 Dezembru 2016, maizumenus iha tuku 13:00 meudia, arguidu foti pasta kiik ida baku dala 1 iha lezada nia ulun no buti dala 1 iha lezada nia kakorok no rezulta lezada sofre moras iha lezada nia-ulun no kakorok. Kazu ne’e aneksa mós ho relatóriu médiku hosi Ospitál Referal Oe-Cusse no fotografía hosi Polísia-VPU

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga artigu 2, 3 no artigu 35 letra (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál no di’ak malu ona ho lezada. Arguidu nu’udar to’os-nain, laiha rendimentu fíksu kada fulan no iha oan nain 4. Arguidu konsiente katak baku ema bele kauza moras ka kanek no promete sei la komete krime hasoru nia membru família ka ema seluk iha futuru.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun no hosi parte Defeza konkorda ho pedidu ne’e.

Alegasaun finál
Prokuradór konsidera arguidu provadu komete krime hasoru lezada bazeia ba arguidu nia deklarasaun. Tanba ne’e atu halo prevensaun iha futuru husu ba Tribunál atu kondena arguidu tuir artigu 145 KP.

Enkuantu defeza haktuir katak arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Tanba ne’e husu ba Tribunál atu aplika pena ne’ebé adekuadu ba arguidu.

Desizaun
Depoisde avalia faktus provadu sira ne’ebé prodús durante julgamentu Tribunál konklui prosesu ne’e no kondena arguidu ho pena prizaun tinan 1 suspende ba tinan 1.

4.     Krime ofensa ba integridade fízika simples ho natureza violénsia doméstika

Nú. Prosesu                             : 0047/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 1 suspende ba tinan 1

Iha 04 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu  JL  hasoru nia feen, iha Distritu Oe-Cusse.

Akuzasaun Prokuradór
Prokuradór akuza katak iha 13 Marsu 2017, iha tuku 08:00 dadeer, arguidu rakut lezada nia-fuuk no tuku dala 6 iha lezada nia-ulun. Lezada halai sai ba viziñu nia uma, arguidu halai tuir lezada kaer no rasta lezada ba uma laran no kontinua tuku  dala 1 iha lezada nia kotuk laran. Agresaun ne’e rezulta lezada sofre moras no bubu mean iha lezada ninia isin. Kazu ne’e aneksa mós ho relatóriu médiku hosi Pradet no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok, foin primeira-vez mai hatan iha Tribunál no promete sei la repete ninia hahalok ne’e hasoru lezada. Arguidu nu’udar kondutór  ho vensimentu US$150.00 kada fulan.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun no Defeza mós konkorda ho pedidu ne’e.

Alegasaun finál
Prokuradór haktuir katak arguidu provadu komete krime hasoru lezada. Prokuradór reflete katak kazu violénsia doméstika barak mak akontese iha Oe-Cusse, kompara ho distritu sira seluk. Tanba ne’e husu ba Tribunál atu kondena arguidu tuir pena ne’ebé hakerek ona iha artigu 145 KP.

Defeza haktuir katak arguidu konfesa faktus hotu iha akuzasaun, arrepende ona nia hahalok no promete ona katak sei la komete tan krime hasoru nia feen. Tanba ne’e husu ba Tribunál atu fó justisa ba arguidu tuir nia kulpa.

Desizaun
Depoisde avalia faktus provadu sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun tinan 1 suspende ba tinan 1 no selu mós kustu judisiál US$50.00.

5.     Krime ofensa ba integridade fízika simples no ameasa

Nú. Prosesu                             : 0015/16.OEPSB
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun fulan 9 suspende ba tinan 1

Iha 04 Jullu 2017, Tribunál Distritál Oe-Cusse prezide julgamentu leitura sentensa ba krime ameasa no ofensa ba integridade fízika simples ne’ebé envolve arguidu NQ hasoru lezada AdJT (idade 11), lezadu NEF (idade 7),  no  lezada NMdF (idade 8), iha Distritu Oe-Cusse.

Akuzasaun Prokuradór
Prokuradór akuza katak iha 12 Dezembru 2016, maizumenus iha tuku 19:00 kalan, arguidu ameasa lezada AdJT katak “hein ha’u ba sei baku mate ó ”. Arguidu tuir ba lezada ho lezadu sira nia uma, nune’e lezada AdJT halai soe hela nia alin nain rua. Arguidu lori ai-sanak baku dala 1 iha lezadu NEF no lezada NMdF nia kotuk-laran no aktu ne’e rezulta lezada no lezadu sira sofre moras no sente tauk. Kazu ne’e akontese tanba lezada AdJT baku arguidu nia bei-oan nia kotuk-laran wainhira lezada nain 2 no lezadu liuhosi arguidu nia-uma oin no arguidu nia bei-oan lori has fuan 1 tuda iha lezada AdJT nia kaba’as. Kazu ne’e aneksa mós ho relatóriu médiku hosi Ospitál Referal Oe-Cusse no fotografía hosi Polísia-VPU.

Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penal to’o tinan 3 ka multa no artigu 157 Kódigu Penál kona-ba krime ameasa ho moldura penal to’o tinan 1 ka multa.

Produsaun ba prova
Antes tama ba produsaun ba prova, juis husu atu halo konsiliasaun entre arguidu no lezadu no lezada sira tuir artigu 262 Kódigu Prosesu Penál (KPP) kona-ba tentativa ba konsiliasaun. Maibé lezadu no lezada sira nia inan-aman rejeita atu halo konsiliasaun no hakarak kontinua prosesu ba oin.

Iha julgamentu, arguidu deklara katak iha faktus balu loos no faktus balu laloos. Faktus ne’ebé loos mak arguidu lori ai-sanak baku iha lezadu NEF no lezada NMdF kotuk laran no arguidu deklara katak la ameasa lezada AdJT. Arguidu foin primeira-vez mai hatan iha Tribunál no promete sei la komete tan krime hasoru labarik sira ka ema seluk. Arguidu tenta atu dame-malu no fó indemnizasaun ba lezadu/a sira maibé lezada no lezadu nia inan-aman mak lakohi.

Wainhira Tribunál konfirma ho lezada AdJT, nia deklara katak iha akontesimentu arguidu la ameasa lezada, arguidu so lori ai-sanak baku dala rua ba lezada nia alin nain rua.

Prokuradór husu ba Tribunál atu presinde lezada no lezadu sira-nia deklarasaun tanba arguidu konfesa faktu hotu iha akuzasaun.

Alegasaun finál
Prokuradór konsidera arguidu provadu komete krime ofensa ba integridade fízika simples  hasoru lezadu  no lezada sira bazeia ba arguidu nia deklarasaun, relatoriu médiku hosi  ospitál no fotografia hosi Polísia-VPU. Tanba ne’e husu ba Tribunál atu kondena arguidu tuir artigu 145  KP.

Defeza haktuir katak arguidu deklara deit faktus ne’ebé nia komete no reforsa mós hosi lezada AdJT katak arguidu la ameasa lezada. Arguidu arrepende ona  nia hahalok  no foin primeira-vez komete krime. Tanba ne’e husu ba Tribunál atu fó justisa ba arguidu relasiona ho krime ofensa ba integridade fízika simples.  Enkuantu ba krime ameasa husu ba Tribunál atu absolve, tanba la iha prova kona-ba arguidu komete krime refere.

Desizaun
Tribunál prova katak arguidu provadu komete krime ofensa ba integridade fízika simples hasoru lezadu no lezada sira no lahetan prova kona-ba arguidu komete krime ameasa hasoru lezada AdJT. Tanba ne’e, Tribunál kondena arguidu ho pena prizaun fulan 9 suspende ba tinan 1 ba krime ofensa ba integridade fizika simples no absolve arguidu hosi krime ameasa.

6.     Krime ofensa ba integridade fízika simples ho natureza violénsia doméstika

Nú. Prosesu                             : 0019/16.OEBCL
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 1 suspende ba tinan 1

Iha 04 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu AM hasoru nia feen, iha  Distritu Oe-Cusse.

Akuzasaun Prokuradór
Prokuradór akuza katak iha 08 Setembru 2016, iha tuku 10:00 dader, arguidu tuku dala 2 iha lezada nia kotuk-laran, tuku dala 2 iha lezada nia liman kabun karuk, tebe dala 1 iha lezada nia kidan no baku dala 1 iha lezada nia liman fuan karuk ho ai-sanak. Kazu ne’e aneksa mós ho relatóriu médíku hosi Ospitál Referal Oe-Cusse no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Arguidu nu’udar to’os-nain no laiha rendimentu fíksu kada fulan, iha oan nain 6 no promete sei la komete tan krime hasoru nia-feen ka ema seluk.

Tribunál presinde lezada nia deklarasaun tanba arguidu konfensa faktu sira hotu iha akuzasaun no Defeza mós konkorda ho pedidu ne’e.

Alegasaun finál
Prokuradór konsidera arguidu provadu komete krime hasoru nia feen bazeia ba konfisaun arguidu nian no relatóriu médiku hosi Pradet. Prokuradór afirma katak kazu violénsia doméstika barak mak akontese iha Distritu Oe-Cusse kompara ho distritu sira seluk. Tanba ne’e husu ba Tribunál atu kondena arguidu tuir artigu 145 KP.

Defeza husu ba Tribunál atu aplika pena ne’ebé kmaan ba arguidu, tanba arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál no  iha oan nain 6.

Desizaun
Depoisde avalia faktus sira ne’ebé prodús durante julgamentu Tribunál konklui prosesu ne’e no kondena arguidu ho pena prizaun tinan 1 suspende ba tinan 1.

7.     Krime ofensa ba integridade fízika simples ho natureza violénsia doméstika

Nú. Prosesu                             : 0001/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun fulan 6 suspende ba tinan 1

Iha 05 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguida TF hasoru nia laen, iha Distritu Oe-Cusse.

Akuzasaun Prokuradór
Prokuradór akuza katak iha 06 Janeiru 2017, maizumenus iha tuku 11:00-dader, arguida lori katana nia belar baku dala 1 iha lezadu nia reen-toos no rezulta lezadu sofre kanek kois no bubu iha reen-toos.  Kazu  ne’e  aneksa mós ho relatóriu médíku hosi Pradet no fotografía hosi Polísia-VPU.

Prokuradór akuza arguida kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 (b) LKVD.

Produsaun ba prova
Arguida konfesa faktus hotu iha akuzasaun, arrepende ona ninia hahalok, di’ak malu ona ho lezadu, foin primeira-vez komete krime hasoru lezadu  no promete sei la repete ninia hahalok ne’e hasoru lezadu.

Prokuradór husu ba Tribunál atu presinde lezadu nia deklarasaun tanba arguida konfesa faktus hotu iha akuzasaun. Iha parte seluk, Defeza mós konkorda ho pedidu ne’e.

Alegasaun finál
Prokuradór konsidera arguida provadu komete krime tuir akuazasaun, tanba ne’e husu ba Tribunál atu kondena arguidu tuir artigu 145 KP.

Defeza husu ba Tribunál atu kondena arguidu ne’ebé justu, tanba arguida konfesa faktus hotu iha akuzasaun, arrepende ona nia hahalok no promete sei la komete tan krime hasoru lezadu.

Desizaun

Bazeia ba aktu sira ne’e hotu, Tribunál konklui prosesu ne’e no kondena arguida ho pena prizaun fulan 6 suspende ba tinan 1.

8.     Krime ofensa ba integridade fízika simples ho natureza violénsia doméstika

Nú. Prosesu                             : 0057/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Calisto Tout
Tipu pena                                : Pena multa

Iha 05 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu CC  hasoru nia feen, iha Distritu Oe-Cusse.

Akuzasaun Prokuradór
Prokuradór akuza katak iha 24 Marsu 2017, iha tuku 12:00-meudia, arguidu basa dala 1 iha lezada nia hasan loos, dudu lezada monu ba rai no rejulta lezada sofre moras iha ninia-hasan.  Kazu ne’e aneksa mós ho relatóriu médiku hosi Pradet no fotografía hosi Polísia–VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok, no foin primeira-vez mai hatan iha Tribunál. Arguidu nu’udar kondutór ho vensimentu kada fulan US$125.00 no iha oan nain 1. Arguidu promete sei la komete krime hasoru lezada ka ema seluk iha futuru.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun. Iha parte seluk, Defeza mós simu ho pedidu ne’e.

Alegasaun finál
Prokuradór haktuir katak arguidu provadu komete krime hasoru nia feen. Prokuradór reflete katak kazu violénsia doméstika barak mak akontese iha Oe-Cusse kompara ho distritu sira seluk. Tanba ne’e husu ba Tribunál atu kondena arguidu tuir artigu 145 KP.

Defeza haktuir katak arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál, nune’e husu ba Tribunál atu fó justisa ba arguidu tuir nia kulpa.

Desizaun
Tribunál kondena arguidu ho pena multa US$75.00 no sei selu US$1.00 kada loron durante loron 75. Tribunál mós fiksa pena alternativa durante loron 50 prizaun, wainhira arguidu la kumpri pena multa ne’e.

9.     Krime ofensa ba integridade fízika simples ho natureza violénsia doméstika

Nú. Prosesu                             : 0054/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 2 suspende ba tinan 2

Iha 05 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu BS hasoru nia feen (CNdC) no banin-feto, iha Distritu Oe-Cusse.

Akuzasaun Prokuradór
Prokuradór akuza katak iha 20 Marsu 2017, iha tuku 17:00 lokraik, arguidu lori nia liman fuan karuk tuu nia feen nia-matan karuk, basa dala 1 iha nia-feen nia hasan karuk no dala 1 hasan loos. Arguidu kaer nia feen ninia liman karuk no dulas. Arguidu mós tuku dala 1 iha nia banin-feto (JO) ninia reen-toos wainhira nia banin ba hafahe arguidu ho nia-feen. Aktu ne’e rejulta lezada nain 2 sofre moras iha matan, hasan no reen-toos. Kazu ne’e aneksa mós ho relatóriu médiku hosi Pradet no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Iha parte seluk lezada nain 2 kontinua konfirma faktus hotu iha akuzasaun.

Alegasaun finál
Prokuradór konsidera arguidu provadu komete krime hasoru lezada nain 2 bazeia ba deklarasaun arguidu nian. Atu evita arguidu komete tan krime hanesan iha futuru, husu ba Tribunál kondena arguidu tuir artigu 145 KP.

Defeza reafirma katak arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Tanba ne’e husu ba Tribunál aplika pena ne’ebé adekuadu ba arguidu.

Desizaun
Depoisde avalia faktus provadu sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun tinan 2 suspende ba tinan 2.

10.            Krime ofensa ba integridade fízika simples ho natureza violénsia doméstika

Nú. Prosesu                             : 0051/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 1 suspende ba tinan 1

Iha 06 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguida hasoru nia laen, iha Distritu Oe-Cusse.

Akuzasaun Prokuradór
Prokuradór akuza katak iha 18 Marsu 2017, iha tuku 16:00 lokraik, arguida tuku dala 1 iha lezadu nia hasan loos, tata lezadu nia liman sikun karuk, tata iha lezadu nia-kabas sorin-loos no tata iha lezadu nia kotuk laran no lori fatuk tuku  dala 1 iha lezadu nia-kelen. Kazu ne’e aneksa mós ho relatóriu médiku hosi Pradet no fotografía hosi Polísia–VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Arguida konfesa faktus hotu iha akuzasaun, arguida mós deklara katak arrepende ona nia hahalok no foin primeira-vez komete krime hasoru nia laen. Arguida deklara katak depoisde akontesimentu ne’e arguida ho lezadu moris separa ona no seidauk  dame-malu. Arguida servisu hanesan to’os-na’in, laiha rendimentu fíksu kada fulan, iha oan nain 2 no promete sei la komete tan krime hasoru nia laen ka ema seluk.

Prokuradór husu ba Tribunál atu presinde lezadu nia deklarasaun tanba arguida konfesa faktus hotu iha akuzasaun no Defeza mós aseita ho pedidu ne’e.

Alegasaun finál
Prokuradór haktuir katak arguida provadu komete krime hasoru nia laen. Prokuradór akresenta katak kazu violénsia doméstika barak mak akontese iha Oe-Cusse kompara ho distritu sira seluk. Tanba ne’e husu ba Tribunál atu kondena arguida tuir artigu 145 KP. Enkuantu  Defeza haktuir katak arguida konfesa faktus hotu iha akuzasaun no promete ona katak sei la komete tan krime hasoru lezadu. Tanba ne’e husu ba Tribunál atu fó justisa ba arguida tuir nia kulpa.

Desizaun
Depoisde avalia faktus provadu sira ne’ebé prodús durante  julgamentu, Tribunál konklui prosesu ne’e no kondena arguida ho pena prizaun tinan 1 suspende ba tinan 1.

11.            Krime ofensa ba integridade fízika simples

Nú. Prosesu                             : 0093/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Omologa dezisténsia keixa

Iha 06 Jullu 2017, Tribunál Distritál Oe-Cusse prezide julgamentu tentativa konsiliasaun ba krime ofensa ba integridade fízika simples ne’ebé envolve arguidu Joao Baptista Corbafo hasoru  Alberto Almeida (Polísia-UPF),  iha Suku Lalisuc, Sub-distritu Pante-Makassar, Distritu Oe-Cusse.

Akuzasaun hosi Prokuradór
Prokuradór akuza katak iha 05 Maiu 2017, iha tuku 20:15 kalan, arguidu tuku dala 5 iha lezadu nia kotuk-laran no basa dala 1 iha lezadu nia-oin no buti dala 1 iha lezadu nia-kakorok. Kazu ne’e akontese wainhira lezadu ba tula nia ferik oan iha nia inan sira nia uma, no sein motivu ne’ebé klaru arguidu ne’ebé ho kondisaun lanu komete aktu ne’e hasoru lezadu.

Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa.

Produsaun ba prova
Bazeia ba artigu 262 KPP kona-ba tentativa ba konsiliasaun, no antes tama ba prodúsaun ba prova, juis husu atu halo konsiliasaun ba arguidu no lezadu.

Iha prosesu konsiliasaun arguidu husu diskulpa ba lezadu tanba sira hela iha suku ida de’it. Lezadu simu pedidu deskulpa hosi arguidu no husu ba Tribunál atu dezisté ninia-keixa hasoru arguidu.

Alegasaun finál
Prokuradór no Defeza apresia ho akordu dame ne’ebé parte rua deside ona no husu ba Tribunál  omologa prosesu ne’e.

Desizaun
Bazeia ba pedidu dezisténsia hosi lezadu no akordu dame hosi parte sira no Tribunál konklui prosesu ne’e no omologa akordu ne’e.

12.            Krime ofensa ba integridade fízika simples ho natureza violénsia doméstika

Nú. Prosesu                             : 0002/17.OEPSB
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun tinan 1 suspende ba tinan 1

Iha 06 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu MAB  ho arguida HL (arguidu MBA ninia inan) hasoru arguidu MAB ninia feen, iha  Distritu Oe-Cusse.

Akuzasaun Prokuradór
Prokuradór akuza katak iha 10 Janeiru  2017, iha tuku 21:00-kalan, arguidu MBA tebe dala 1 iha nia feen ninia-kanuruk, buti dala 1 iha kakorok no tebe dala 1 iha lezada nia-kabun. Aleinde ne’e arguida HL basa dala 1 iha lezada nia hasan karuk. Aktu ne’e rezulta lezada sofre moras iha kanuruk no bubu mean iha kakorok no aneksa ho relatóriu médiku hosi Ospitál Referal Oe-Cusse no fotografía hosi Polísia VPU.

Prokuradór akuza arguidu no arguida kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Relasiona ho krime ne’ebé envolve arguida HL nu’udar lezada ninia banin-feto, bazeia ba artigu 262 KPP kona-ba tentativa ba konsiliasaun, juis husu atu halo konsiliasaun ba arguida no lezada.

Bazeia ba akordu konsiliasaun ne’e, Tribunál omologa kedas arguida hosi prosesu no kontinua julgamentu ba krime ofensa ba integridade fizika simples ne’ebé ho natureza violénsia domestika entre arguidu MAB hasoru ninia-feen.

Arguidu konfesa faktus hotu kona-ba krime violénsia doméstika no deklara katak arrepende ona nia hahalok, di’ak malu ona ho lezada no foin primeira-vez komete krime hasoru nia feen. Arguidu promete katak sei la komete tan krime hasoru lezada.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun no Defeza mós konkorda ho pedidu ne’e.

Alegasaun finál
Prokuradór konsidera arguidu provadu komete krime tuir akuzasaun, tanba ne’e husu ba Tribunál atu kondena arguidu tuir artigu 145 KP.

Defeza husu ba Tribunál atu fó justisa ba arguidu tuir nia kulpa, tanba arguidu konfesa faktus hotu iha akuzasaun, arrepende ona nia hahalok no foin primeira-vez komete krime hasoru lezada.

Desizaun
Depoisde avalia faktus sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun tinan 1 suspende ba tinan 1.

13.            Krime ofensa ba integridade fízika simples ho natureza violénsia doméstika

Nú. Prosesu                             : 0008/16.OEBCN
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Calisto Tout
Tipu pena                                : Pena prizaun tinan 1 fulan 6 suspende ba tinan 2

Iha 07 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve  arguidu MB  hasoru nia feen, iha Distritu Oe-Cusse.

Akuzasaun Prokuradór
Prokuradór akuza katak iha 15 Abril 2016, maizumenus iha tuku 07:00 dadeer, arguidu sama lezada nia kabun no iha lezada nia kalilin. Arguidu tebe dala 1 iha lezada nia tilun-hun no basa dala 2 iha lezada nia tilun-hun karuk no rezulta lezada sofre moras iha kabun, kalilin no tilun-hun. Kazu ne’e aneksa mós ho relatóriu médiku hosi Ospitál Referal Oe-Cusse no fotografía hosi Polísia–VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Arguidu deklara katak arguidu basa deit dala 2 iha lezada nia tilun-hun no la sama lezada. Arguidu arrepende ona nia hahalok no foin primeira-vez komete krime. Arguidu deklara katak nia separa ona ho lezada no seidauk dame-malu. Arguidu promote sei la komete tan krime hasoru lezada.  Iha parte seluk lezada kontinua konfirma no reforsa faktus sira iha akuzasaun.

Alegasaun finál
Prokuradór haktuir katak mezmu arguidu nega faktus balun, maibé lezada kontinua konfima faktu sira iha akuzasaun no mós iha relatoriu médiku ne’ebé prova kona-ba akontesementu ne’e. Tanba ne’e atu evita arguidu komete atu tan krime seluk iha futuru, husu ba Tribunál kondena arguidu tuir artigu 145 KP.

Defeza haktuir katak arguidu deklara deit faktus ne’ebé nia komete. Arguidu arrepende ona nia hahalok no foin primeira-vez komete krime. Tanba ne’e husu ba Tribunál atu aplika pena ne’ebé adekuadu ba arguidu tuir nia kulpa.

Desizaun
Depoisde avalia faktus provadu sira ne’ebé prodús durante julgamentu Tribunál kondena arguidu ho pena prizaun tinan 1 fulan 6 suspende ba tinan 2.

14.            Krime ofensa ba integridade fízika simples ho natureza violénsia doméstika

Nú. Prosesu                             : 0010/16.OEBCN
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun fulan 6 suspende ba tinan 1

Iha 17 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu JC  hasoru nia feen, iha Distritu Oe-Cusse.
               
Akuzasaun Prokuradór
Prokuradór akuza katak iha 19 Maiu 2016, maizumenus iha tuku 17:00-lokraik, arguidu basa dala 2  iha lezada nia tilun-hun sorin karuk. Agresaun ne’e rejulta lezada sofre moras no to’o  dezmaia. Kazu ne’e anexa mós ho relatóriu médíku husi Ospitál Referal Oe-Cusse no fotografia hosi VPU-PNTL

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Prodúsaun ba prova
Iha julgamentu arguidu konfesa faktus hotu iha akuzasaun no arrepende ona nia hahalok, diak malu ona ho lezada no foin primeira-vez komete krime hasoru nia-feen. Arguidu iha oan nain 5 no promete sei larepete hahalok hasoru nia-feen ka ema seluk.

Prokuradór husu ba Tribunál atu prezindi lezada no testamuña nia deklarasaun tanba arguidu konfesa faktus hotu iha akuzasaun no Defeza mós konkorda ho pedidu ne’e.

Alegasaun finál
Prokuradór konsidera arguidu provadu komete krime hasoru nia-feen. Prokuradór reafirma katak kazu violénsia doméstika barak mak akontese iha Oe-Cusse kompara ho distritu sira seluk. Tanba ne’e husu ba Tribunál atu kondena arguidu tuir artigu 145 KP.

Enkuantu Defeza haktuir katak arguidu konfesa faktus hotu iha akuzasaun no promete sei la komete tan krime  hasoru nia-feen. Tanba ne’e husu ba Tribunál atu aplika pena ne’ebé adekuadu ba arguidu.

Desizaun

Depoisde avalia faktus provadu sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun fulan 6  suspende ba tinan 1.

15.            Krime ofensa ba integridade fízika simples ho natureza violénsia doméstika

Nú. Prosesu                             : 0017/16.OEBCN
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Calisto Tout
Tipu pena                                : Pena prizaun tinan 1 suspende ba tinan 1

Iha 17 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fizika simples ho natureza violénsia doméstika ne’ebé envolve arguidu CBF hasoru nia-feen, iha Distritu Oe-Cusse.

Akuzasaun Prokuradór
Prokuradór akuza katak iha 17 Agostu 2016, maizumenus iha tuku 06:00 dadeer, arguidu lori ai- sanak baku dala 1 iha lezada nia kotuk laran no dala 1 iha lezada nia kaba’as karuk no rezulta lezada sofre moras iha ninia kaba’as. Kazu ne’e aneksa mós ho relatóriu médiku hosi Ospitál Referal Oe-Cusse no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Arguidu nu’udar to’os-nain, laiha rendimentu fíksu kada fulan no iha oan nain 2 no konsiente katak baku ema nia isin bele kauza moras ka kanek.

Prokuradór husu ba Tribunál atu presindi lezada nia deklarasaun tanba arguidu konfesa faktus hotu iha akuzasaun no Defeza mós hatan ho pedidu ne’e.

Alegasaun finál
Prokuradór haktuir katak arguidu provadu komete krime tuir akuzasaun, tanba ne’e atu evita arguidu komete tan krime seluk iha futuru, husu ba Tribunál atu kondena arguidu tuir artigu 145 KP.

Enkuantu Defeza haktuir katak arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Tanba ne’e husu ba Tribunál aplika pena ne’ebé adekuadu ba arguidu.

Desizaun
Depoisde avalia faktus provadu sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun tinan 1 suspende ba tinan 1.

16.            Krime ofensa ba integridade fizíka simples

Nú. Prosesu                             : 0012/17.OEPMK
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Calisto Tout
Tipu pena                                : Omologa dezisténsia keixa

Iha 17 Jullu 2017, Tribunál Distritál Oe-Cusse prezide julgamentu tentativa konsiliasaun ba krime ofensa ba integridade fízika simples ne’ebé  envolve arguidu Manuel Neke hasoru lezada Amelia Seco Cabral, iha Suku Costa, Sub-distritu Pante-Makassar,  Distritu Oe-Cusse.
                     
Akuzasaun Prokuradór
Prokuradór akuza katak iha 31 Abril 2017, maizumenus iha tuku 08:00-dadeer, arguidu tebe dala 1 iha lezada nia liman fuan karuk no rezulta lezada nia liman fuan naksalak.  Kazu ne’e  akontese tanba lezada ho arguidu diskuti malu kona-ba lezada ho nia laen deve foos saku 1 ho folin USS$15.00 iha arguidu nia kios maibé seidauk selu.

Prokuradór akuza arguidu kontra artigu 145 Kódigu Penál kona-ba krime ofensa ba integridade fizíka simples ho moldura penál to’o tinan 3 ka multa.

Produsaun ba prova

Bazeia ba artigu 262 KPP kona-ba tentativa ba konsiliasaun, no tanba ne’e antes tama ba prodúsaun ba prova, juis husu atu halo konsiliasaun ba arguidu no lezada.

Iha prosesu konsiliasaun ne’e, lezada hakarak diak-malu ho arguidu, maibé arguidu tenke selu indeminzasaun US$20.00 ba lezada. Arguidu konkorda ho pedidu ne’e no husu deskulpa ba lezada no hafoin lezada husu ba Tribunál atu dezisté ninia-keixa hasoru arguidu.

Alegasaun finál
Prokuradór  no Defeza apresia ho akordu dame ne’ebé parte rua deside ona no husu ba Tribunál atu omologa prosesu  ne’e.

Desizaun
Bazeia ba pedidu dezisténsia hosi lezadu no akordu dame hosi parte sira Tribunál konklui prosesu ne’e no omologa akordu ne’e.

17.            Krime kondusaun sein karta

Nú. Prosesu                             : 0005/17.OESTR
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Calisto Tout
Tipu pena                                : Pena multa

Iha 20 Jullu 2017, Tribunál Distritál Oe-Cusse prezide julgamentu leitura sentensa ba krime kondusaun sein karta ne’ebé envolve arguidu Armando Quelo hasoru Estadu RDTL, iha Suku Costa, Sub-distritu Pante-makassar, Distritu Oe-Cusse.

Akuzasaun Prokuradór
Prokuradór akuza katak iha 25 Abril 2017, iha tuku 09:00-dadeer, arguidu lori motor iha dalan públiku no Polísia pasa revista no hetan katak arguidu laiha karta kondusaun.

Prokuradór akuza arguidu kontra artigu 207 Kódigu Penál kona-ba krime kondusaun sein karta ho moldura penál to’o tinan 2 ka multa.

Produsaun ba prova
Arguidu konfesa faktus hotu iha akuzasaun no arrepende ona nia hahalok no foin primeira-vez mai hatan iha Tribunál. Arguidu konsiente katak hahalok hanesan ne’e ladiak no kontra lei. Arguidu hanesan estudante iha universidade DIT.

Prokuradór husu ba Tribunál atu prezinde testemuña Polísia tranzitu ninia deklarasaun tanba arguidu konfesa faktus hotu iha akuzasaun Prokuradór, no Defeza mós konkorda ho pedidu ne’e.

Alegasaun finál
Prokuradór haktuir katak kada fulan kazu ne’e sempre akontese no rejista aas iha Distritu Oe-Cusse. Tanba ne’e husu ba Tribunál atu kondena arguidu ho pena multa. Entretantu, Defeza konfirma katak arguidu konfesa faktus hotu iha akuzasaun no arrepende ona nia hahalok. Tanba ne’e husu ba Tribunál aplika pena ne’ebé adekuadu ba arguidu.

Desizaun
Tribunál konklui prosesu ne’e no kondena arguidu ho pena multa US$45.00 no sei selu 0.50 sentavus kada loron durante loron 90. Tribunál mós fiksa pena alternativa durante loron 60 prizaun, wainhira arguidu la kumpri pena multa ne’e.

18.             Krime ofensa ba integridade fizíka simple

Nú. Prosesu                             : 0054/16.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Omologa dezisténsia keixa

Iha 20 Jullu 2017, Tribunál Distritál Oe-Cusse prezide julgamentu tentativa konsiliasaun ba krime ofensa ba integridade fízika simples ne’ebé envolve arguidu Francisco Marques no João Marques (membru  F-FDTL) no nu’udar aman ho oan hasoru sira ninia mane foun (Justino Eusebio Cris), iha Suku Costa, Sub-distritu Pante-Makassar, Distritu Oe-Cusse.
                     
Akuzasaun Prokuradór
Prokuradór akuza katak iha 26 Marsu 2017, maizumenus iha tuku 11:00-dadeer, arguidu nain 2 tuku no tebe dala barak iha lezadu nia isin no rezulta lezadu sofre moras. Kazu ne’e akontese tanba lezadu lakohi partisipa iha serimonia kultural  iha  arguidu sira-nia uma.

Prokuradór akuza arguidu nain rua kontra artigu 145 Kódigu Penál kona-ba krime ofensa ba integridade fizíka simples ho moldura penál too tinan 3 ka multa.

Produsaun ba prova

Bazeia ba artigu 262 KPP kona-ba tentativa ba konsiliasaun, nune’e juis husu atu halo konsiliasaun ba arguidu sira no lezadu.

Iha prosesu konsiliasaun ne’e, lezadu hakarak diak-malu fali ho arguidu sira, maibé arguidu nain rua tenke fó tais 1, fahi 1 no osan US$500.00 ba lezadu. Arguidu sira konkorda ho pedidu ne’e, tanba ne’e lezadu husu ba Tribunál atu dezisté ninia-keixa hasoru arguidu sira.

Alegasaun finál
Prokuradór no Defeza apresia ho akordu ne’ebé parte rua deside ona no husu ba Tribunál atu omologa prosesu  ne’e.

Desizaun
Bazeia ba pedidu dezisténsia hosi lezadu no akordu dame hosi parte sira, Tribunál konklui prosesu ne’e no omologa akordu ne’e.

19  .Krime ofensa ba integridade fízika simples ho natureza violénsia doméstika[1]

Nú. Prosesu                             : 0224/16.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun


Iha 26 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu JL hasoru nia feen, iha Distritu Oe-Cusse.

Akuzasaun  Prokuradór

Prokuradór akuza katak iha 28 Novembru 2016, iha tuku 22:00-kalan, arguidu tuku dala 1 iha lezada nia matan-fukun karuk, dala 2 iha lezada nia-ulun, dala 1 iha lezada nia reen-toos no rezulta lezada sofre moras iha ulun no reen-toos. Kazu ne’e aneksa mós ho relatóriu médiku hosi Pradet no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok, diak malu ona ho lezada no promete katak sei la komete tan krime hanesan hasoru lezada.

Prokuradór husu ba Tribunál atu presinde lezada nia deklarasaun, tanba arguidu konfesa faktus hotu iha akuzasaun.

Alegasaun finál
Prokuradór konsidera arguidu provadu komete krime hasoru lezada tuir faktus iha akuzasaun no arguidu la arrepende nia hahalok. Prokuradór mós relembra fali Tribunál katak, iha 21 Outubru 2015, Tribunál kondena ona arguidu ho pena prizaun fulan 9 suspende ba tinan 1 maibe arguidu kontinua komete krime hasoru lezada.

Prokuradór husu ba Tribunál atu revoga tiha suspensaun ne’e no aumenta tan ho krime ne’ebé arguidu foin komete ho pena prizaun fulan 6. Pena ne’e sei akomula ho pena ba krime ida antes bo kondena arguidu ho pena prizaun tinan 1 fulan 3.

Defeza haktuir katak arguidu konfesa faktus hotu iha akuzasaun no iha oan nain 2. Tanba ne’e husu ba Tribunál atu aplika pena suspensaun to’o tinan 5 no aplika mós regra ba konduta ho aprezentasaun periódikamente iha Polísia kada fulan dala 1 atu nune’e arguidu kontinua responsabiliza ba nia familia.

Desizaun
Tribunál prova katak arguidu provadu kontinua komete krime hasoru nia feen. Tribunál mós konsidera katak arguidu la hatudu ninia arrependementu durante periodu suspensaun. Tanba ne’e, Tribunál konklui prosesu ne’e no kondena arguidu ho pena efetiva fulan 6 prizaun.

20. Krime ofensa ba integridade fizíka simples

Nú. Prosesu                             : 0011/17.OEPMK
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Defeza                                     : Dr. Marcelino Marques Coro
Tipu pena                                : Pena prizaun fulan 9 suspende ba tinan 1

Iha 26 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ne’ebé envolve arguidu Xisto Saco hasoru nia maun rasik, iha Suku Nipani, Sub-distritu Pante-Makassar,  Distritu Oe-Cusse.

Akuzasaun Prokuradór
Prokuradór akuza katak iha 20 Marsu 2017, maizumenus iha tuku 19:00-kalan, arguidu tuku dala 1 iha lezadu nia reen-toos no basa dala 2 iha lezadu nia hasan loos. Kazu ne’e akontese tanba lezadu ho kondisaun lanu halo barullu iha sentru votasaun.

Prokuradór akuza arguidu  kontra artigu 145 Kódigu Penál kona-ba krime ofensa ba integridade fizíka simples ho moldura penál too tinan 3 ka multa.

Prodúsaun ba prova
Bazeia ba artigu 262 KPP kona-ba tentativa ba konsiliasaun, juis husu atu halo  konsiliasaun ba arguidu sira no lezadu, maibé lezadu la konkorda tanba ne’e kontinua ba julgamentu.

Iha julgamentu, arguidu konfesa faktus hotu iha akuzasaun, arrepende ona nia hahalok, arguidu mós deklara katak seidauk dame ho lezadu, mezmu arguidu tenta ona atu dame ho lezadu maibé lezadu lakohi.

Alegasaun finál
Prokuradór konsidera arguidu provadu komete krime tuir akuzasaun. Tuir loloos nu’udar funsionariu públiku, arguidu iha meus seluk atu prevene lezadu hosi asaun saida de’it tanba lezadu ho kondisaun lanu. Tanba ne’e husu ba Tribunál atu kondena arguidu tuir pena ne’ebé hakerek ona iha artigu 145 KP.

Defeza haktuir katak arguidu konfesa faktus hotu iha akuzasaun, arrepende ona nia hahalok, seidauk dame-malu ho arguidu tanba arguidu mak lakohi. Tanba ne’e husu ba Tribunál atu kondena arguidu ho pena admoestasaun.

Desizaun
Tribunál kondena arguidu ho pena prizaun fulan 9 suspende ba tinan 1 no selu mós kustu judisiál US$20.00 tanba konsidera arguidu provadu komete krime ofensa ba integridade fizika simples hasoru lezadu.

21.            Krime ofensa ba integridade fízika simples ho natureza violénsia doméstika[2]

Nú. Prosesu                             : 0063/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Advogadu privadu                  : Dr. Daniel Elu
Tipu pena                                : Pena prizaun tinan 2 suspende ba tinan 3

Iha 31 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu EdCQ  hasoru nia oan feto ECEC, iha Distritu Oe-Cusse.

Akuzasaun hosi Prokuradór
Prokuradór akuza katak iha 01 Abril 2017, maizumenus iha tuku 21:00 kalan, arguidu basa  dala 2 iha lezada nia kanuruk, dala 1 iha lezada nia ibun no dala 2 iha lezada nia hasan karuk. Aktu ne’e rezulta lezada sofre moras iha kanuruk no bubu iha hasan.  Kazu ne’e aneksa mós ho relatóriu médiku hosi Pradet no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no 35 (b) LKVD.

Produsaun ba prova

Arguidu konfesa faktus hotu iha akuzasaun, arrepende ona nia hahalok no promete katak sei la komete tan krime hasoru lezada iha futuru. Tanba ne’e Prokuradór husu ba Tribunál atu presinde lezada nia deklarasaun, no Defeza konkorda ho pedidu ne’e.

Desizaun

Bazeia ba aktu sira ne’e hotu, Tribunál konklui prosesu ne`e no kondena arguidu ho pena prizaun tinan 2 suspende ba tinan 3 no selu kustu judisiál US$50.00.

22.            Krime ofensa ba integridade fízika simples ho natureza violénsia doméstika

Nú. Prosesu                             : 0056/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Advogadu privadu                  : Dr. Antonio Sombai
Tipu pena                                : Prizaun tinan 1 suspende ba tinan 1

Iha 31 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu MF hasoru nia rian (CC), iha  Distritu Oe-Cusse.

Akuzasaun hosi Prokuradór
Prokuradór akuza katak iha 24 Marsu 2017, iha tuku 12:00-meudia, arguidu tuku dala 2 iha lezadu nia-matan fukun karuk, riba lezadu ba rai no tuku dala 2 iha lezadu nia  reen-toos. Kazu ne’e akontese tanba lezadu istori malu ho arguidu nia feen ne’ebé nu’udar lezadu nia-feton.  Kazu ne’e aneksa mós ho relatóriu médiku hosi Ospitál Referal Oe-Cusse no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no 35 (b) LKVD.

Produsaun ba prova
Iha julgamentu, arguidu konfesa faktus hotu iha akuzasaun, arrepende ona ba nia hahalok no foin primeira-vez mai hatan iha Tribunál. Arguidu nu’udar toos-na’in, laiha rendimentu kada fulan no iha oan nain 2. Arguidu promete sei la komete tan krime hasoru nia rian ka ema seluk. Iha parte seluk, lezadu kontinua konfirma faktu sira iha akuzasaun no deklara katak nia moris dependensia ba arguidu tanba durante ne’e arguidu mak sustenta nia moris.

Alegasaun finál
Prokuradór haktuir katak arguidu provadu komete krime hasoru lezadu, nune’e atu halo prevensaun iha futuru, husu ba Tribunál atu kondena arguidu tuir artigu 145 KP.

Enkuantu Defeza haktuir katak arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Tanba ne’e husu ba Tribunál aplika pena ne’ebé adekuadu ba arguidu.

Desizaun
Tribunál konklui prosesu ne’e no kondena arguidu ho pena prizaun tinan 1 suspende ba tinan 1 tanba konsidera katak arguidu provadu komete krime hasoru lezadu.

23.            Krime ofensa ba integridade fízika simples ho natureza violénsia doméstika

Nú. Prosesu                             : 0010/16.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi no Dr. Antonio Sombai     
                                                  (Advogadu Privadu)
Tipu pena                                : Pena prizaun tinan 1 suspende ba tinan 1 fulan 6

Iha 31 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu DN hasoru nia feen, iha Distritu Oe-Cusse.

Akuzasaun hosi Prokuradór
Prokuradór akuza katak iha 18 Novembru 2016, maizumenus iha tuku 17:00-lokraik, arguidu buti lezada nia kakorok, riba lezada ba rai no sama iha lezada nia kanotak no iha lezada nia kakorok. Kazu ne’e aneksa mós ho relatóriu médiku hosi Pradet no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no 35 (b) LKVD.

Produsaun ba prova
Arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Arguidu nu’udar toos-na’in no laiha rendimentu kada fulan no iha oan nain 4.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun no Defeza konkorda ho pedidu ne’e.

Alegasaun finál
Prokuradór haktuir katak arguidu konfesa faktus hotu iha akuzasaun, no atu halo prevensaun iha futuru, husu ba Tribunál atu kondena arguidu tuir artigu 145 KP.

Defeza haktuir katak arguidu konfesa faktus hotu iha akuzasaun, arrepende ona nia hahalok no foin primeira-vez mai hatan iha Tribunál. Tanba ne’e husu ba Tribunál aplika pena ne’ebé adekuadu tuir arguidu nia kulpa.

Desizaun
Tribunál konklui prosesu ne’e no kondena arguidu ho pena prizaun tinan 1 suspende ba tinan 1 fulan 6 tanba konsidera arguidu provadu komete krime hasoru lezada.

24.             Krime ofensa ba integridade fízika simples ho natureza violénsia doméstika

Nú. Prosesu                             : 0014/16.OEBCN
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Advogadu privadu                  : Dr. Daniel Elu
Tipu pena                                : Prizaun tinan 1 suspende ba tinan 1

Iha 31 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu DSC hasoru  nia feen, iha Distritu Oe-Cusse.

Akuzasaun Prokuradór
Prokuradór akuza katak iha 01 Jullu 2016, iha tuku 08:00-dadeer, arguidu lori kadeira  ki’ik baku dala 1 iha lezada ni reen-toos no dala 1 iha lezada nia-inus no rezulta lezada sofre bubu no ran sai hosi lezada nia inus. Kazu ne’e aneksa mós ho relatóriu médiku hosi Pradet no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no 35 (b) LKVD.

Produsaun ba prova
Arguidu konfesa faktus hotu iha akuzasaun, arrepende ona ba nia hahalok no foin primeira-vez mai hatan iha Tribunál. Arguidu deklara katak sira iha oan nain 8, promete ba Tribunál katak sei komete  tan krime hasoru nia feen ka ema seluk.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzaasaun, no Defeza mós konkorda ho pedidu ne’e.

Alegasaun finál
Prokuradór konsidera arguidu provadu komete krime hasoru lezada bazeia ba konfisaun arguidu nian. Tanba ne’e husu ba tribunál atu kondena arguidu tuir artigu 145 KP.

Enkuantu Defeza haktuir katak arguidu konfesa faktus hotu iha akuzasaun, arrepende ona nia hahalok, nu’udar toos-na’in no laiha rendimentu fíksu kada fulan. Tanba ne’e husu ba tribunál aplika pena ne’ebé adekuadu ba arguidu.

Desizaun
Depoisde avalia faktus provadu sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun tinan 1 suspende ba tinan 1 tanba konsidera katak arguidu provadu komete krime hasoru lezada.

25.             Krime furtu simples

Nú. Prosesu                             : 0073/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi
Advogadu privadu                  : Dr. Antonio Sombai
Tipu pena                                : Pena prizaun fulan 9 suspende ba tinan 1

Iha 31 Jullu 2017, Tribunál Distritál Oe-Cusse prezide julgamentu leitura sentensa ba krime furtu simples ne’ebé envolve arguidu Teodorus Coa hasoru Lucia Elu, iha Suku Nipani, Sub-distritu Pante-makassar, Rejiaun Oe-Cusse.

Akuzasaun Prokuradór
Prokuradór akuza katak iha 12 Marsu 2017, maizumenus iha tuku 09:00 dadeer, arguidu ba iha tasi ibun no lori kado besi ko’a lezada nia rede ka pukat (besi pemberat 4) no testemuña Joaninha de Fatima mak kaer toman. Aktu ne’e kauza lezada nia rede besi pemberat 4 ne’e hetan estraga no lakon. Kazu ne’e aneksa mós ho fotografía hosi PNTL ba rede  ka pukat ne’ebé arguidu ko’a.

Prokuradór akuza arguidu kontra 251 Kódigu Penál kona-ba krime furtu simples ho moldura penál to’o tinan 3 ka multa.

Produsaun ba prova

Bazeia ba artigu 262 KPP kona-ba tentativa ba konsiliasaun, juis husu atu halo tentativa konsiliasaun ba arguidu no lezada. Maibé prosesu ne’e laiha rezultadu tanba lezada husu ba arguidu atu selu indemnizasaun US$1,000.00. Tanba ne’e arguidu lakonkorda no kontinua ba prosesu julgamentu.

Arguidu konfesa faktus hotu iha akuzasaun, arrepende ona ba nia hahalok no foin primeira-vez mai hatan iha Tribunál, no iha oan nain 5. Arguidu mós promete ba Tribunál katak sei la komete tan krime hasoru lezada ka ema seluk.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun, no Defeza mós konkorda ho pedidu ne’e.

Alegasaun finál
Prokuradór haktuir katak arguidu provadu komete krime tuir akuzasaun no arguidu iha intensaun na’ok duni lezada nia sasan rede nian. Tanba ne’e husu ba Tribunál atu kondena arguidu tuir pena ne’ebé hakerek ona iha artigu 251 KP.

Enkuantu Defeza haktuir katak arguidu konfesa faktus hotu iha akuzasaun, arrepende ona nia hahalok no arguidu servisu hanesan peskadór, maibé laiha rendimentu fixu kada fulan. Tanba ne’e husu ba tribunál aplika pena ne’ebé adekuadu ba arguidu.

Desizaun
Depoisde avalia faktus provadu sira ne’ebé prodús durante julgamentu, Tribunál konklui prosesu ne’e no kondena arguidu ho pena prizaun fulan 9 suspende ba tinan 1.

26.            Krime ofensa ba integridade fízika simples ho natureza violénsia doméstika

Nú. Prosesu                             : 0070/17.OESIC
Kompozisaun Tribunál           : Singulár
Juis                                          : Dr. João Ribeiro
Prokuradór                              : Dr. Mateus Nesi no Dr. Daniel Elu (Advogadu   
                                                  privadu)
Tipu pena                                : Pena prizaun tinan 1 fulan 6 suspende ba tinan 2

Iha 31 Jullu 2017, Tribunál Distritál Oe-Cusse prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu DL hasoru nia feen, iha  Distritu Oe-Cusse.

Akuzasaun Prokuradór
Prokuradór akuza katak iha 06 Abril 2017, iha tuku 16:00 lokraik, arguidu basa  dala 1 iha lezada nia ibun, tuku dala 1 iha lezada nia matan-fukun no basa dala 2 iha lezada nia-hasan loos.  Arguidu mós buti dala 1 iha lezada nia-kakorok  no  riba lezada ba rai.  Aku hirak ne’e rezulta lezada sofre moras iha lezada nia ibun, hasan no kakorok. Kazu ne’e aneksa mós ho relatóriu médiku hosi Pradet no fotografía hosi Polísia-VPU.

Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no 35 (b) LKVD.

Produsaun prova
Arguidu konfesa faktus hotu iha akuzasaun, arrepende ona nia hahalok, foin primeira-vez mai hatan iha Tribunál no arguidu promote sei la komete  tan krime hasoru lezada.

Prokuradór husu ba Tribunál atu presinde lezada nia deklarasaun tanba arguidu konfesa faktus hotu iha akuzasaun. Iha parte seluk, Defeza mós konkorda ho pedidu ne’e.

Alegasaun finál
Prokuradór konsidera arguidu provadu komete krime hasoru nia feen. Prokuradór afirma katak tuir loloos arguidu mak proteze lezada, maibé pelu-kontráriu arguidu mak komete fali krime hasoru nia feen. Tanba ne’e husu ba Tribunál atu kondena arguidu tuir artigu 145 KP.

Enkuantu defeza husu ba Tribunál atu aplika pena ne’ebé adekuadu ba arguidu, tanba arguidu konfesa faktus hotu iha akuzasaun no arrepende ona nia hahalok.

Desizaun
Tribunál konklui prosesu ne’e no kondena arguidu ho pena prizaun tinan 1 fulan 6 suspende ba tinan 2 tanba konsidera katak arguidu provadu komete krime hasoru ninia-feen.

Post a Comment
Related Posts Plugin for WordPress, Blogger...