JSMP kongratula koligasaun partidu Aliansa Mudansa ba Progresu (AMP) ba vitória iha Eleisaun Jerál Antesipada 2018

JSMP Komunikadu Imprensa Dili, 28 Maiu 2018

JSMP kongratula koligasaun partidu Aliansa Mudansa ba Progresu (AMP) ba vitória iha Eleisaun Jerál Antesipada 2018 no JSMP nia rezultadu observasaun ba prosesu eleisaun

JSMP kongratula koligasaun partidaria Aliansa Mudansa ba Progresu (AMP) ne’ebé manan eleisaun jerál parlamentár antesipada 2018 ho votu maioria absoluta ho asentu parlamentár 34 (49,6%) hosi totál 65 asentu parlamentár. Desizaun ne’e formalmente anúnsia/proklama hosi Tribunál Rekursu (Supremu Tribunál Justisa), ohin, 28 Maiu 2018.  

JSMP mós kongratula povu Timor-Leste tomak no partikularmente partidu polítiku sira hotu ne’ebé konkorre ba eleisaun, ne’ebé kontinua kontribui ba mantein pás no estalibilidade. Eleisaun no rezultadu eleisaun ida-ne’e sai nu’udar solusaun úniku no justu ba hakotu situasaun impase polítika ne’ebé akontese iha tempu naruk depoisde eleisaun parlamentár iha 2017. 

“Vitória AMP nian ne’e sai hanesan vitória povu Timor-Leste nian, tanba Povu Timor-Leste liuhosi dalan ida-ne’ebé demokrátiku no livre foti desizaun polítka ida-ne’ebé justu tuir regra no norma demokrásia atu asegura funsionamentu regulár instituisaun sira estadu nian ba períodu tinan lima nia laran”, dehan Luis de Oliveira Sampaio, Diretór Ezekutivu JSMP. 

JSMP husu atu parte hot-hotu atu simu rezultadu ida ne’e ho liman rua no fó-liman ba malu atu la’o ba oin hodi dezenvolve nasaun no liberta povu hosi ki’ak no mukit. Bainhira mosu iregularidade presiza razolve tuir mekanizmu Konstitusionál no legál ne’ebé lei permite, nia hatutan.  

JSMP mós husu partidu koligasaun AMP atu halo-tuir sira ninia komprimisiu eleitorál ne’ebé hato’o durante komisiu politiku no kampañe eleitorál sira, liuliu atu rezolve problema bee mós, infraestrutura báziku, saúde no edukasaun, hametin instituisaun justisa, boa-governasaun, desentralizasaun administrativu no aprovasaun ba Projeitu Lei Anti Korrupsaun no kumprimisiu eleitorál longu-prazu sira seluk.

Atu asegura prosesu eleisaun ne’e la’o ho transparénsia, imparsiál, kredível, justu no akontável, partikularmente kumpri rekezitu konstitusionál no legál sira, iha 09 Maiu 2018, JSMP koloka nia observadór sira ba iha munisípiu sira balun hodi halo observasaun ba prosesu eleisaun ne’e. Munisípiu sira ne’ebé JSMP halo observasaun mak Munisípiu Aileu, Dili, Ermera, Liquisa no Covalima. 

JSMP halo observasaun ba Sentru Votasaun 16 no estasaun votu 21 iha munisípiu 5 ne’e. Rezultadu observasaun hatudu katak iha jerál eleisaun ne’e la’o di’ak, transparente, independente no akontável, maske iha kestaun téknika balun relasiona ho preparasaun ba votasaun no iregulariedade ki’ik balun ne’ebé akontese iha sentru no estasaun votu balun. 

Kestaun téknika no iregulariedade sira ne’ebé JSMP deskobre mak hanesan: 

1) Iha estasaun votasaun Prizonal Becora, Postu Administrativu Cristo Rei, Munisípiu Dili nian, estasaun votasaun foin loke iha tuku 08:00 dader no votasaun hahú iha tuku 09:30 dadeer. Tuir regra, sentru no estasaun votasaun loke iha tuku 06:00am no votasaun hahú iha tuku 07:00am. Aleinde ne’e, kabina ba votasaun nia mós distánsia besik maluk ne’ebé votante sira balun heteke no ko’alia ba malu no ofisiál la bolu atensaun. 

JSMP rekomenda atu iha futuru, pesoál sira STAE nian bele prepara fatin votasaun antes, nune’e prosesu loke sentru no estasaun no mós votasaun tuir regra ne’ebé iha. Aleinde ne’e, fatin ba votasaun presiza hili fatin ne’ebé apropriadu atu koloka kabina votasaun nian nune’e la permite votante sira bele halo komunikasaun bainhira ba vota no bele asegura votante sira atu la bele lori sasan seluk ba iha kabina votasaun nian. Ida-ne’e bele evita votante sira lori sasán sira hanesan mina ka goma ka sasán seluk ne’ebé votante sira uza hodi halo manipulasaun.

2) Iha sentru votasaun Ospitál Nasionál Guido Valadares (HNGV), estasaun votasaun loke hahú iha tuku 07:30am ho tempu hanesan hahú ho votasaun kedas. Urna sira loke kedas iha sentru votasaun depois mak lori ba estasaun votasaun HNGV ne’ebé bele risku boot ba manipulasaun iha dalan. 

JSMP rekomenda atu iha futuru, pesoál STAE sira tenke prepara no estasiona kedas iha estasaun votasaun idaidak, nune’e bele loke estasaun no votasaun tuir oras ne’ebé prevee ona nomós urna sira tenke loke iha estasaun idaidak nian atu evita manipulasaun iha dalan bainhira urna sira loke kedas ona iha sentru votasaun. 

3) Iha estasaun votasaun I E.S. Nú. 1 Liquisa, Postu Administrativu Liquisa, Munisípiu Liquisa, iha votante ida-ne’ebé tau goma paralone iha nia liman fuan hatuduk ne’ebé tuu ba tinta depoisde ba vota. Ofisiál STAE nian toman no entrega ba PNTL hodi halo investigasaun. Iha Sentru Votasaun Sede Suku Maumeta, Postu Administrativu Bazartete, Munisípiu Liquisa nian mós iha votante ne’ebé tau mina iha nia liman fuan hatuduk bainhira ba vota. Mina ne’e sei halo tinta kaer la metin iha nia liman fuan no nune’e fasil atu hamoos tiha no bele ba vota tan. 

4) JSMP rekomenda atu bainhira votante sira ba vota hotu no ba tau tinta ba lima, pesoal STAE ne’ebé tau matan ba tinta tenke kaer votante nia liman fuan hodi tau ba tinta ka revista uluk molok tau tinta, nune’e, karik iha manipulasaun ruma, bele deteta lalais. 

Aleinde kestaun téknika no iregulariedade sira ne’e, JSMP mós observa katak:

a) Iha sentru votasaun HNGV númeru pasiente ne’ebé la vota boot tebes kompara ho sira ne’ebé ba vota. Totál pasiente ne’ebé vota 239 no pasiente ne’ebé la vota hamutuk 559 no família sira ne’ebé akompaña sira no la vota hamutuk 145. Nune’e, totál votante sira ne’ebé la bele vota iha estasaun HNGV tanba de’it naran la iha lista hamutuk 704. 

Atu garante diretu ema hot-hotu nian atu bele ezerse sira-nia direitu polítiku hodi tuir eleisaun, partikularmente pasiente no família pasiente sira iha óspital, JSMP rekomenda atu halo ezesaun ba sira kona-ba tenke rejista antes. Ida-ne’e tanba iha pasiente no família balun ne’ebé tama fali depoisde tempu rejistu nian hotu ona, nune’e sira nia naran automatikamente sei la tama iha lista ba votasaun nian, entaun sira lakon ona sira-nia direitu ba vota. Pasisente no família pasiente sira-nian bainhira ba vota só hatudu de’it kartaun eleitorál ka dokumentu identifikasaun pesoál seluk ne’ebé lei permite. 

b) Iha fiskais partidu polítika balun ne’ebé la hatene hakerek no lee ne’ebé fó informasaun ne’ebé la loos hodi kria konfuzaun bainhira halo apuramentu munisipál nian. Situasaun ne’e akontense iha apuramentu munisipál iha Munisípiu Ermera nian. 

JSMP rekomenda atu partidu polítiku tenke nomea fiskais ne’ebé mínimu iha koñesimentu hakerek no lee, nune’e atu evita kriasaun konfuzaun ne’ebé fó impaktu sériu mós ba prosesu eleisaun.

c) Iha sentru votasaun E.P. Nú. 5 Comoro, Postu Administrativu Dom Aleixo nian, ofisiál sira STAE nian troka urna la deklara ka fó hatene ba fiskais no observadór sira. 

JSMP rekomenda ba Governu, partikularmente instituisaun sira ne’ebé responsável ba eleisaun hanesan STAE no CNE atu halo formasaun ne’ebé di’ak no apropriadu ba pesoál sira STAE, CNE no fiskais partidu polítiku sira, inklui observadór nasionál sira, nune’e bele asegura prosesu eleisaun la’o ho di’ak no prevene mosu manipulasaun ka iregularidade.

d)  Iha númeru votu branku no nulu ne’ebé aas, partikularmente munisípiu Ermera nian. 

JSMP rekomenda atu STAE bele kria métodu sosializasaun ida ne’ebé di’ak kona-ba oinsa atu ba 

vota ka tuu bulletin votu, nune’e bele evita votu branku no nulu ne’ebé barak. 

JSMP apresia servisu Governu nian hodi organiza eleisaun jerál ida ne’e ho di’ak no susesu, liu-liu STAE no CNE. JSMP mós apresia aas tebes maturidade Povu Timor-Leste nian iha ezerse sira-nia direitu polítiku no iha foti desizaun ba hakotu impase polítiku ne’ebé akontese iha tempu naruk nia laran ho estabilidade, pás no hakmatek to’o oras ne’e. Ida-ne’e hanesan orgullu boot ida ba timoroan hot-hotu nian. Susesu ne’e ita hetan no kapasidade atu ultrapasa situasaun polítika sira ne’e ho pás no hakmatek ne’e sei sai hanesan referénsia ba nasaun seluk iha mundu.

Observadór sira ne’e kompostu hosi pesoál JSMP no voluntáriu sira. Totál observadór hamutuk na’in 23 ne’ebé kompostu hosi pesoál JSMP na’in 8 no estudante universitáriu hamutuk na’in 15. 

Atividade ne’e realiza tanba hetan apoiu hosi Governu Austrália liuhosi Embaixada Austrália iha Timor-Leste

Atu hetan informasaun liutan favor kontaktu direitamente:

Luis de Oliveira Sampaio

Diretór Ezekutivu JSMP

Diresaun e-mail: luis@jsmp.tl

Telefone: 3323883  |  77295795