18 October 2018

Prokuradór tenke eskolla provizaun ne’ebé apropriadu ba krime violénsia doméstika sira tuir krime ida-idak ninia gravidade no sirkunstánsia

JUDICIAL SYSTEM MONITORING PROGRAMME PROGRAMA MONITORIZASAUN BA SISTEMA JUDISIÁRIU Komunikadu Imprensa Tribunál Distritál Dili 18 Outubru 2018

 Prokuradór tenke eskolla provizaun ne’ebé apropriadu ba krime violénsia doméstika sira tuir krime ida-idak ninia gravidade no sirkunstánsia

Prokuradór tenke eskolla provizaun ne’ebé apropriadu ba krime violénsia doméstika sira tuir krime ida-idak ninia gravidade no sirkunstánsia atu asegura katak krime ida-idak hetan kondenasaun ne’ebé reflete no ekilibriu ho arguidu ninia hahalok.

Importante teb-tebes atu avalia elementu no natureza krime ida-idak tuir krime ne’e nia komplesidade no risku potensiál hosi kazu ida-idak bazeia ba avaliasaun profunda antes termina krime ne’e nia tipu no artigu ne’ebé sei uja atu akuza ba arguidu.

Iha 20 Setembru 2018, Tribunál Distritál Dili julga krime ofensa ba integridade fízika simples ho natureza violénsia doméstika ne'ebé envolve arguidu RdS hasoru nia feen, iha Distritu Dili.



Prokuradór akuza arguidu katak iha 07 Janeiru 2018, maizumenus iha tuku 10.00 dader, arguidu rasta lezada nia fuuk no dada ba iha kuartu laran. Arguidu riba lezada ba iha kama leten, tuur iha lezada nia leten no buti lezada nia kakorok. Arguidu foti katana taa lezada maibé la kona tanba lezada baku sees tiha katana refere. Arguidu foti fali ai ida no baku dala rua iha lezada nia ain loos no rezulta mean no moras. Lezada haksoit hosi kama leten tenta atu halai maibé arguidu foti fali tudik ida sona lezada nia isin maibé la kona tanba lezada baku sees tiha tudik refere.

Aleinde ne’e, arguidu buti lezada nia kakorok rabat ba iha parede no kontinua foti katana no tenta taa tan lezada dala ida maibé lezada baku sees tiha katana refere. Antes kazu ne’e akontese, arguidu diskonfia lezada ho mane seluk no sira hahú diskute malu.

Iha 08 Janeiru 2018, iha tuku 06.30 dader, arguidu aperta lezada nia kakorok no riba lezada ba iha rai to’o lezada oin nakukun/desmaia. Antes ne’e, arguidu no lezada hadau malu lezada nia sertifikadu eskola sekundaria nian ne’ebe lezada kaer hela atu ba buka servisu no lezada dehan ba arguidu katak nia lakohi fila ona ba arguidu. Arguidu la konkorda lezada ba buka servisu, nune’e arguidu komete agresaun hirak-ne’e hasoru lezada.

Aktu hirak ne’e rezulta lezada sofre mean no moras iha kakorok no ain no lezada ba halo tratamentu iha Pradet no ba hela tiha iha Uma Mahon durante loron tolu.

Prokuradór akuza arguidu kontra artigu 145 KP kona-ba ofensa bá integridade fízika simples ho moldura penál to’o tinan 3 ka multa, konjuga ho artigu 2, 3(a), 35(b) no 36 LKVD.

“Akuzasaun ne’e lakon nia substánsia no rezulta injustisa ba lezada tanba prokuradór falla atu hili artigu ne’ebé apropriadu hodi akuza krime ne'ebé iha potensia boot atu lori risku no ameasa grave ba lezada nia vida tanba arguidu tenta atu oho lezada bazeia ba aktu no meius sira ne’ebé arguidu uja hodi atake lezada,” dehan Dirertór Ezekutivu JSMP, Luis de Oliveira Sampaio.

Iha julgamentu arguidu konfesa integralmente faktu sira no lezada kontinua konfirma faktu sira iha akuzasaun.

Entretantu, prokuradór iha alegasaun finál, mantein akuzasaun no husu ba tribunál atu aplika pena suspensa ba arguidu. Aleindé ne’e defeza mós husu atu kondena arguidu ho pena suspensa ne'ebé kmaan.

Iha loron 04 Outubru 2018, tribunál konklui katak arguidu provadu komete krime hasoru lezada tuir faktu sira iha akuzasaun. Bazeia ba faktu provadu hirak ne’e, tribunál kondena arguidu ho pena prizaun fulan 3 suspende ba tinan 1 no kondena arguidu selu kustu judisiál US$10.00.

JSMP preukupa tebes ho prokuradór nia avaliasaun no konsiderasaun ba kazu ne’e. Prokuradór la analiza didiak faktu sira no impaktu hosi arguidu ninia hahalok ba lezada. Iha kazu ne’e, arguidu uza sasan kro’at sira hanesan katana no tudik ne’ebé bele hamosu risku hanesan kanek todan ka hakotu lezada nia vida. JSMP fiar katak prokuradór tenke konsiente katak sasan/material arguidu uja hodi komete krime ne’e iha potensia boot atu hamosu risku no ameasa lezada nia vida. Aktu hirak ne’ebé arguidu halo reprezenta krime sériu no ofensa grave ba lezada nia saúde fíziku no psikolójiku no arguidu hatudu momos katak arguidu iha intensaun forte atu halo kanek ka halo ofensa grave ba lezada.

Aleinde ne’e, aktu arguidu nian la atinje rezultadu (la hotu) ka krime ne’e la konsumadu, la’ós tanba arguidu mak hapara nia-an rasik hodi la kontinua nia aktu hodi atinje rezultadu maibé tanba lezada ninia esforsu atu defende nia an hosi asaltu no agresaun hosi arguidu.

Tuir loloos prokuradór akuza arguidu ho krime tentativa omisídiu tuir artigu 23 no artigu 138 KP.  Bainhira akuza ho krime ne’ebé apropriadu sei fó dalan ba juis sira atu fó sentensa ne’ebé reflete krime nia gravidade, garante justisa ba lezada no proteze lezada hosi krime ne’e no eduka arguidu katak violénsia doméstika ne’e krime sériu.

JSMP subliña dala barak ona katak prokuradór kaer papél importante atu asegura faktu relevante sira inkorpora iha akuzasaun no eskolla provizaun ne’ebé apropriadu liu iha kazu ida-idak. Prokuradór tenki avalia profundamente faktu relevente sira iha kazu violénsia doméstika antes submete ba tribunál, nune’e tribunál bele aplika sentensa ne’ebé tuir duni gravidade hosi krime ne’ebé arguidu komete.

JSMP mós husu ba tribunál atu antes halo desizaun, tenki analiza profunda kazu ne’e, faktu provadu sira ne’ebé prodús durante julgamentu nune’e introdus artigu ne’ebé relevante no apropriadu tuir kazu ninia gravidade.

Kazu ne'e rejistu iha tribunál ho Nú. Prosesu: 0010/18-DIBCR. Julgamentu prezide hosi Juis Dra. Albertina Neves, prokuradór reprezenta hosi Dr. Alfonso Lopes no arguidu hetan defeza hosi Dr. João de Carvalho hosi defensória públiku.

Atu hetan informasaun kle’an liu tan favor kontaktu:



Luis de Oliveira Sampaio

Diretór Ezekutivu JSMP

Telefone: 3323883

www.jsmp.tl
Post a Comment
Related Posts Plugin for WordPress, Blogger...