07 March 2019

JSMP: Sumáriu prosesu julgamentu kazu iha Tribunál Distritál Oekusi

1. Krime ofensa ba integridade fízika simples ho natureza violénsia doméstika
Nú. Prosesu Kompozisaun Tribunál Juis
: 0114/18.OESIC : Singulár
: Dr. João Ribeiro
 
Prokuradór Defeza Tipu pena
: Dr. Mateus Nesi
: Dr. Calisto Tout
: Pena prizaun tinan 1 no suspende ba tinan 1 fulan 6

Iha 08 Janeiru 2019, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu JT hasoru nia feen, iha Distritu Oekusi.

Akuzasaun Prokuradór
Prokuradór akuza katak iha 01 Jullu 2018, maizumenus tuku 07.00 dader, arguidu ho lezada diskute malu kona-ba lezada diskonfia arguidu iha relasaun amante ho feto seluk, nune’e arguidu tebe dala ida iha lezada nia kanotak no tuku dala ida iha lezada nia matan fukun parte karuk no buti dala ida iha lezada nia kakorok. Agresaun ne’e rezulta lezada sofre moras.
Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 Lei Kontra Violénsia Doméstika (LKVD).

Produsaun prova sira
Iha julgamentu, arguidu konfesa integralmente ba faktus hotu iha akuzasaun. Arguidu deklara katak arrepende ona nia hahalok. Arguidu servisu nu’udar agrikultór, laiha rendimentu fixu kada fulan no iha oan nain rua no promete sei la komete tan krime hasoru lezada. Arguidu ho lezada diak malu ona no moris hamutuk iha uma ida to’o agora.
Antes halo alegasaun finál Prokuradór husu ba tribunál atu presindi (hasai tiha) lezada nia deklarasaun, tanba arguidu konfesa faktus hotu iha akuzasaun.



Alegasaun finál
Prokuradór konsidera katak arguidu provadu komete krime hasoru lezada no kazu violénsia doméstika barak liu akontese iha Rejiaun Oekusi kompara ho distritu/munisípiu sira seluk. Tanba ne’e husu ba tribunál atu aplika pena tuir artigu 145 Kódigu Penál (KP).
Enkuantu defeza haktuir katak arguidu deklara faktus hotu ne’ebé akuza ba arguidu, arrepende ona nia hahalok no promete sei la komete tan krime hasoru lezada iha futuru no arguidu iha oan nain rua. Arguidu mós laiha rendimentu fixu kada fulan no foin primeiravés mai hatan iha tribunál. Tanba ne’e husu ba tribunál aplika pena ne’ebé adekuadu ba arguidu.

Desizaun
Depoisde avalia faktu sira ne’ebé prodús durante julgamentu, tribunál prova katak arguidu komete duni krime tuir faktu sira iha akuzasaun. Bazeia ba faktu provadu hirak ne’e hotu, tribunál kondena arguidu ho pena prizaun tinan 1 no suspende ba tinan 1 fulan 6.

2. Krime ofensa ba integridade fízika simples ho natureza violénsia doméstika
Nú. Prosesu Kompozisaun Tribunál Juis
Prokuradór
: 0037/18.OEBCN : Singulár
: Dr. João Ribeiro : Dr. Mateus Nesi

Defeza : Dr. Calisto Tout Tipu pena : Pena admoestasaun

Iha 14 Janeiru 2019, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu AS hasoru nia feen, iha Distritu Oekusi.
Akuzasaun Prokuradór

Prokuradór akuza katak iha 09 Jullu 2018, maizumenus iha tuku 17.00 lokraik, arguidu basa dala ida iha lezada nia kanuruk no rezulta lezada sofre moras iha kanuruk.
Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3, 35 letra (b) no artigu 36 LKVD.

Produsaun ba prova sira
Iha julgamentu, arguidu konfesa integralmente ba faktus hotu iha akuzasaun no deklara nia katak arrepende ona ba ninia hahalok. Arguidu servisu hanesan to’os-na’in (agrikultór), laiha rendimentu fixu kada fulan no iha oan nain rua. Arguidu reforsa tan katak dame malu ona ho lezada no moris hamutuk fali ona hanesan feen-laen no arguidu foin primeiravés mai hatan iha tribunál.
Prokuradór husu ba tribunál atu prezindi lezada nia deklarasaun, tanba arguidu konfesa faktus hotu iha akuzasaun.

Alegasaun finál

Prokuradór konsidera arguidu provadu komete krime hasoru lezada bazeia ba konfisaun arguidu nian no arguidu halo aktu krime ne’e hasoru de’it feto ne’ebé laiha forsa atu halo reasaun hasoru arguidu. Tuir loloos arguidu mak tenke protéze lezada husi aktu violensia hot-hotu hasoru lezada. Tanba ne’e husu ba tribunál atu kondena arguidu tuir artigu 145 Kódigu Penál.
Iha parte seluk defeza husu ba tribunál atu kondena arguidu ho pena ne’ebé adekuadu. Defeza husu ba tribunál atu konsidera arguidu ninia kolaborasaun diak durante prosesu produsaun ba prova hanesan arguidu konfesa faktus sira integralmente, arrepende ona nia hahalok, iha oan nain rua, diak malu ona ho lezada no foin primeiravés mai hatan iha tribunál.

Desizaun

Depoisde avalia faktu sira hotu, tribunál konsidera katak arguidu provadu komete duni krime hasoru lezada tuir faktu sira iha akuzasaun. Bazeia ba faktus-provadu hirak-ne’e, tribunál kondena arguidu ho pena admoestasaun.

3. Krime ofensa ba integridade fízika simples ho natureza violénsia doméstika
Nú. Prosesu Kompozisaun Tribunál Juis
Prokuradór
: 0032/18.OEBCN : Singulár
: Dr. João Ribeiro : Dr. Mateus Nesi

Defeza : Dr. Marcelino Marques Coro

Tipu pena : Pena prizaun tinan 1 no suspende ba tinan 1 fulan 6

Iha 14 Janeiru 2019, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu AT hasoru nia feen, iha Distritu Oekusi.

Akuzasaun Prokuradór

Prokuradór akuza katak iha 04 Juñu 2018, maizumenus iha tuku 18.00 lokraik, arguidu tenta atu baku lezada ho ai-rohan ida, maibé lakona tanba testemuña PC mak satan netik. Maibé la para deit iha ne’e, arguidu kontinua tuku dala tolu iha lezada nia kotuk laran, rakut lezada nia fuuk no riba lezada ba rai. Kazu ne’e aneksa mós ho relatóriu mediku husi Sentru Saúde Baocnana no fotografia husi Polísia-VPU.

Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3, 35 letra (b) no artigu 36 LKVD.

Produsaun ba prova sira
Iha prosesu julgamentu, arguidu admite katak faktus sira ne’ebé akuza hasoru nia loos hotu no arguidu deklara katak arrepende ona ba nia hahalok. Arguidu servisu hanesan to’os-na’in, laiha rendimentu fixu kada fulan, no iha oan nain tolu. Argudu foin primeiravés mai hatan iha tribunál no diak malu ona ho lezada no moris hamutuk nafatin hanesan feen ho laen iha uma ida.

Prokuradór husu ba tribunál atu presindi lezada nia deklarasaun, tanba arguidu konfesa faktus hotu iha akuzasaun.

Alegasaun finál
Prokuradór konsidera arguidu provadu komete krime violénsia doméstika hasoru nia feen bazeia ba konfisaun arguidu nian. Prokuradór reforsa katak nu’udar laen no aman iha familia ida, tuir loloos arguidu mak proteze lezada, no membru familia sira seluk hosi potensia ameasa hosi ema seluk, maibé pela kontrariu arguidu mak komete fali krime hasoru lezada. Tanba ne’e husu ba tribunál atu kondena arguidu tuir artigu 145 Kódigu Penál.

Iha parte seluk, defeza husu ba tribunál atu aplika pena ne’ebé kmaan ba arguidu ho konsiderasaun sira katak, iha produsaun ba prova arguidu rasik konfesa faktus integralmente, arrepende ona nia hahalok, iha oan nain tolu, diak malu ona ho lezada no hela hamutuk nafatin iha uma ida hanesan familia ida.

Desizaun
Bazeia ba faktus provadu sira ne’ebé prodús durante julgamentu no avalia sirkunstánsia relevante sira hotu, tribunál konklui katak arguidu provadu komete duni krime tuir faktu sira iha akuzasaun. Bazeia ba prova sira ne’e hotu, tribunál kondena arguidu ho pena prizaun tinan 1 no suspende ba tinan 1 fulan 6.

4. Krime ofensa ba integridade fízika simples ho natureza violénsia doméstika
Nú. Prosesu Kompozisaun Tribunál Juis
Prokuradór
Defeza
Tipu pena
: 0034/18.OESIC
: Singulár
: Dr. João Ribeiro
: Dr. Mateus Nesi
: Dr. Marcelino Coro
: Pena prizaun tinan 2 no suspende ba tinan 3

Iha 14 Janeiru 2019, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu AMRM hasoru nia feen, iha Distritu Oekusi.

Akuzasaun Prokuradór

Prokuradór akuza katak iha 02 Jullu 2018, maizumenus iha tuku 01.00 madrugada, arguidu tebe dala ida iha lezada nia ain-parte loos, tebe dala ida iha lezada nia kanotak parte karuk no tuku dala ida iha lezada nia matan parte karuk. Aktu ne’e rezulta lezada sofre bubu, mean no moras iha kanotak no matan. Kazu ne’e aneksa mós ho relatoriu mediku husi PRADET no fotografia husi Polísia-VPU.
Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3, 35 letra (b) no artigu 36 LKVD.

Produsaun ba prova sira

Iha julgamentu, arguidu konfesa integralmente ba faktus hotu iha akuzasaun. Arguidu deklara katak arrepende ona nia hahalok, arguidu hanesan agrikultór no laiha rendimentu fixu kada fulan no iha oan nain haat. Arguidu haktuir tan katak iha 2016 komete ona krime hanesan no tribunál kondena ho pena prizaun tinan ida suspende ba tinan ida fulan neen. Arguidu haktuir tan katak agora sira dame malu ona moris hamutuk nafatin iha uma ida hanesan familia ida.
Prokuradór husu ba tribunál atu presindi lezada nia deklarasaun, tanba arguidu konfesa faktus hotu iha akuzasaun.

Alegasaun finál
Prokuradór konsidera katak arguidu provadu komete krime hasoru lezada bazeia ba konfisaun arguidu nian no arguidu iha intensaun maka’as atu baku lezada sein razaun no laiha arrependementu ba krime ne’ebé antes ne’e tribunál kondena ona ho pena suspensaun. Tanba ne’e, atu prevene no evita krime hanesan akontese tan iha futuru, husu ba tribunál atu kondena arguidu tuir artigu 145 KP.
Defeza husu ba tribunál atu kondena arguidu ho pena ne’ebé kmaan, tanba iha produsaun ba prova arguidu komfesa faktus hotu iha akuzasaun, arrepende ona nia hahalok, iha oan nain haat no diak malu ona ho lezada no moris hamutuk nafatin hanesan feen-laen iha uma ida.

Desizaun

Depoisde avalia faktu sira hotu, tribunál prova katak arguidu komete duni krime tuir faktus sira iha akuzasaun prokuradór nian no tribunál konsidera mós katak arguidu laiha arrependementu ba krime ne’ebé antes ne’e arguidu komete no tribunál kondena ona ba arguidu. Maske nune’e, tribunál mós konsidera sirkunstánsia seluk katak arguidu ninia oan sira sei kiik hotu, no tribunál enfaze katak arguidu tenke hakaas an atu evita komete krime hanesan iha futuru. Tanba ne’e tribunál kondena arguidu ho pena prizaun tinan 2 no suspende ba tinan 3.

5. Krime ofensa ba integridade fízika simples ho natureza violénsia doméstika
Nú. Prosesu Kompozisaun Tribunál Juis
Prokuradór
Defeza
Tipu pena
: 0006/18.OEPSB
: Singulár
: Dr. João Ribeiro
: Dr. Mateus Nesi
: Dr. Marcelino Marques Coro
: Pena prizaun fulan 9 no suspende ba tinan 1

Iha 15 Januari 2019, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu MC hasoru nia feen, iha Distritu Oekusi.

Akuzasaun Prokuradór
Prokuradór akuza katak iha 01 Juñu 2018, maizumenus iha tuku 18.00 lokraik, arguidu tuku dala ida iha lezada nia matan parte karuk no kontinua lori katana nia knuk baku dala ida iha lezada nia reen-toos no rezulta lezada sofre kanek ki’ik ran no moras. Kazu ne’e aneksa mós ho relatóriu médiku husi Sentru Saúde Pasabe no fotografia husi Polísia-VPU.
Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3, 35 letra (b) no artigu 36 LKVD.

Produsaun ba prova sira

Iha julgamentu, arguidu konfesa integralmente ba faktus hotu iha akuzasaun no deklara katak arrepende ona nia hahalok. Arguidu servisu hanesan to’os-na’in, laiha rendimentu fixu kada fulan no iha oan nain tolu. Arguidu haktuir tan katak foin primeiravés komete krime hasoru nia feen no mai hatan iha tribunál. Depoisde akontesimentu ne’e diak malu kedas ho lezada no to’o agora moris hamutuk nafatin iha uma ida hanesan feen-laen.
Prokuradór husu ba tribunál atu presindi lezada nia deklarasaun, tanba arguidu konfesa no admite faktus hotu iha akuzasaun.

Alegasaun finál

Prokuradór konsidera arguidu provadu komete krime hasoru lezada bazeia ba konfisaun arguidu nian no prokuradór afirma katak tuir loloos arguidu atua nu’udar fatin ne’ebé mahon no seguru ba lezada hodi protéze lezada no membru familia sira hotu hosi kualker forma violénsia. Arguidu bele uza maneira ne’ebé diak liu ba nia feen tanba lezada laiha forsa atu halo reasaun hasoru
arguidu, maibé infelismente, arguidu halo fali krime hasoru lezada. Tanba ne’e husu ba Tribunál atu kondena arguidu ho pena ne’ebé adekuada bazeia ba artigu 145 KP.
Defeza husu ba tribunál atu kondena arguidu ho pena ne’ebé kmaan, tanba iha produsaun ba prova arguidu konfesa faktus hotu iha akuzasaun, arrepende ona nia hahalok, iha oan nain tolu no diak malu ona ho lezada no moris hamutuk hanesan familia iha uma ida. Defeza reforsa liu tan katak arguidu foin primeiravés halo krime no mai hatan iha tribunál.

Desizaun

Depoisde avalia faktu sira hotu, tribunál prova katak arguidu komete duni krime tuir faktus sira iha akuzasaun prokuradór nian. Bazeia ba faktu provadu sira ne’e, tribunál kondena arguidu ho pena prizaun fulan 9 no suspende ba tinan 1.

6. Krime pekulatu de uzu

Nú. Prosesu Kompozisaun Tribunál Juis
Prokuradór
Defeza
Tipu pena
: 0081/18.OESIC
: Singulár
: Dr. João Ribeiro
: Dr. Mateus Nesi
: Dr. Marcelino Marques Coro : Absolve

Iha 15 Janeiru 2019, Tribunál Distritál Oekusi prezide julgamentu leitura sentensa ba krime pekulatu deuzu ne’ebé envolve arguidu Miguel do Rosario Elu hasoru Estadu Timor-Leste, iha Suku Abani, Sub-distritu Pasabe, Distritu Oekusi.

Akuzasaun Prokuradór
Prokuradór akuza katak iha 09 Maiu 2018, maizumenus iha tuku 17.00 lokraik, arguidu uza motorizada ho marka Honda Mega-Pro ho númeru xapa matrikula 1172.GA hodi halo kampaña ba Partidu Fetilin. Iha momentu ne’e kedas PNTL halo kapturasaun no halo aprensaun ba objetu refere.
Prokuradór akuza arguidu kontra artigu 296 Kódigu Penál kona-ba krime pekulatu ba uzu ho moldura penál to’o tinan 2 ka multa.

Produsaun ba prova sira
Iha prosesu julgamentu, arguidu uza nia direitu nonok. Entretantu prosesu ne’e laiha testemuña, nune’e kontinua kedas ba iha alegasaun finál.

Alegasaun finál

Prokuradór konsidera arguidu provadu komete krime pekulatu ba uzu hasoru estadu RDTL tanba arguidu hanesan funsionariu públiku iha Diresaun Alfandega no hatene diak kuandu lori sasan ka propriedade estadu nian hodi ba hala’o fali kampaña ka atividade seluk ne’e kontra lei. Maibé arguidu ho hakarak rasik halo krime refere. Prokuradór reforsa liután katak tuir lei fó fatin ba arguidu atu hili direitu nonok, maibé prokuradór hanoin katak arguidu nia desizaun hodi lakohi kolia hanesan mós presaun ida ba iha tribunál atu hola desizaun. Tanba ne’e husu ba tribunál atu kondena arguidu tuir artigu 296 Kódigu Penál.

Iha parte seluk, defeza husu ba tribunál atu absolve arguidu husi prosesu ne’e tanba tuir defeza nia hanoin katak iha akontesimentu ne’e arguidu atu fila ona ba nia uma. Maibé tanba kondisaun estrada ne’ebé arguidu liu ba ne’e nu’udar dalan prinsipal ne’ebé baibain arguidu tenke liuhusi fatin refere. Hanesan ema ka kriatura dala ruma tanba iha momentu ne’ebá ema barak teb-tebes lao liuhosi nia oin, arguidu bele para oituan no haree liu hafoin atravesa. Saida mak akontese ba arguidu tuir defeza nia pozisaun katak ema ruma mak iha kuñesimentu no interpretasaun oioin katak arguidu mós uza sasan estadu nian hodi partisipa iha kampaña refere, Mesmu nune’e se tribunál iha hanoin seluk, defeza husuba tribunál atu fó justisa.

Desizaun

Depoisde avalia faktu hotu, tribunál la prova arguidu komete krime tuir faktu sira iha akuzasaun tanba laiha testemuña ida mak reforsa akuzasaun husi prokuradór nian. Bazeia ba prova sira ne’e hotu, tribunál konklui prosesu ne’e no absolve arguidu husi krime refere.

7. Krime ofensa ba integridade fízika simples ho natureza violénsia doméstika
Nú. Prosesu Kompozisaun Tribunál Juis
Prokuradór
Defeza
Tipu pena
: 0112/18.OESIC
: Singulár
: Dr. João Ribeiro
: Dr. Mateus Nesi
: Dr. Marcelino Marques Coro
: Pena prizaun tinan 1 no suspende ba tinan 1

Iha 15 Janeiru 2019, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu CS hasoru nia feen, iha Distritu Oekusi.

Akuzasaun Prokuradór

Prokuradór akuza katak iha 08 Jullu 2018, maizumenus iha tuku 13.00 meudia, arguidu ho lezada diskute malu kona-ba lezada fó hatene arguidu atu ba sisi sira nia osan ne’ebé ema deve hela. Maibé arguidu lakohi tanba sira nia oan foin alta husi óspital. Durante sira haksesuk malu ne’e arguidu uza bikan masa ida ne’ebé nakonu hela ho etu hodi basa dala ida iha lezada nia oin no rezulta lezada sofre moras no kanek ki’ik iha lezada nia inus no matan parte okos. Kazu ne’e aneksa mós ho relatóriu mediku husi Ospital Referal Oekusi no fotografia husi Polisía-VPU.
Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.

Produsaun ba prova sira

Durante julgamentu, arguidu konfesa integralmente ba faktus sira iha akuzasaun no arrepende ona nia hahalok. Arguidu servisu hanesan funsionariu públiku iha ministeriu agrikultura ho rendimentu kada fulan US$260.00 no iha oan nain 3. Arguidu promete katak sei la-halo tan krime hasoru nia feen ka ema seluk iha futuru no konsiente katak baku ema nia isin bele kauza moras. Arguidu deklara katak depoisde akontese ne’e sira dame malu kedas no ate agora moris hamutuk iha uma 1 hanesan feen-laen nafatin.

Prokuradór husu ba tribunál atu presindi lezada nia deklarasaun, tanba arguidu konfesa faktus hotu iha akuzasaun.

Alegasaun finál
Prokuradór haktuir katak arguidu provadu komete krime hasoru lezada ne’ebé nu’udar nia feen rasik no tuir loloos arguidu mak tenke utiliza maneira ka forma oioin atu halo prevensaun iha kualker situasaun. Infelismente arguidu baku de’it feto ne’ebé laiha forsa atu halo reasaun hasoru arguidu. Atu prevene krime hanesan akontese tan iha futuru, husu ba tribunál atu aplika pena tuir artigu 145 KP.

Enkuantu defeza haktuir katak arguidu konfesa, iha oan nain tolu, arguidu mak toma responsabilidade ba iha sira nia familia, arrepende ona nia hahalok no promete sei la komete tan krime hanesan hasoru lezada. Tanba ne’e husu ba tribunál aplika pena ne’ebé kmaan ba arguidu.

Desizaun

Depoisde avalia faktu sira hotu, tribunál prova katak arguidu komete duni krime tuir faktu sira iha akuzasaun. Tribunál mós konsidera sirkunstánsia sira asosiadu hosi kazu ne’e, no kondena arguidu ho pena prizaun tinan 1 no suspende ba tinan 1 no selu kustu judisiál US$10.00.

8. Krime ofensa ba integridade fízika simples ho natureza violénsia doméstika
Nú. Prosesu Kompozisaun Tribunál Juis
Prokuradór
Defeza
Tipu pena
: 0025/18.OEBCN
: Singulár
: Dr. João Ribeiro
: Dr. Mateus Nessi
: Dr. Marcelino Marques Coro : Pena admoestaasaun

Iha 25 Janeiru 2019, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu AT hasoru nia feen, iha Distritu Oekusi.

Akuzasaun Prokuradór
Prokuradór akuza katak iha 22 Juñu 2018, maizumenus iha tuku 08.30 dader, arguidu basa dala ida iha lezada nia hasan parte karuk no rezulta lezada sofre moras iha hasan.
Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.

Produsaun prova sira

Iha prosesu julgamentu, arguidu konfesa no admite integralmente ba faktus hotu iha akuzasaun. Arguidu deklara katak arrepende ona nia hahalok no servisu hanesan to’os na’in laiha rendimentu fixu kada fulan. Arguidu iha oan nain lima no diak malu ona ho lezada.
Prokuradór husu ba tribunál atu presindi lezada nia deklarasaun, tanba arguidu konfesa totalmente ba faktus hotu iha akuzasaun no hatudu nia kolaborasaun diak durante julgamentu.

Alegasaun finál

Prokuradór haktuir katak arguidu provadu komete krime violénsia doméstika hasoru lezada. Prokuradór reforsa tan katak krime violénsia doméstika barak liu akontese iha Oekusi kompara ho munisípiu sira seluk. Tanba ne’e husu ba tribunál atu aplika pena tuir artigu 145 KP.

Enkuantu defeza haktuir katak kazu ne’e akontese wainhira iha emosaun no asaun, nune’e mak arguidu prátika krime ne’e hasoru lezada. Defeza reforsa no konkorda ho prokuradór katak arguidu hatudu kolaborasaun diak ho tribunál tanba iha produsaun ba prova arguidu rasik konfesa faktus hotu no arrepende ona ba nia hahalok. Arguidu iha oan nain lima no agora sira dame malu ona moris hamutuk nafatin iha uma ida. Tanba ne’e husu ba Tribunál atu aplika pena ne’ebé kmaan ba arguidu.

Desizaun

Tribunál konklui katak arguidu provadu komete duni krime hasoru lezada. Bazeia ba faktu provadu hirak ne’e no sirkunstánsia atenuante sira hotu hanesan arguidu konfesa, arrepende ona nia hahalok, foin primeiravés mai hatan iha tribunál no diak malu ona ho lezada, nune’e tribunál kondena arguidu ho pena admoestasaun.

Atu hetan informasaun kompleitu, favor kontaktu: Luis de Oliveira Sampaio
Diretór Ezekutivu JSMP
Diresaun e-mail: luis@jsmp.tl
www.jsmp.tl

No comments: