Dili Current & Forecast

Dili, Timor-Leste

Latest Legal News Headlines Headline Animator

Latest Legal News Headlines

20 May 2020

JSMP lamenta no preokupa ho aktu dezorganizadu hosi deputadu sira no ejijé deputadu sira atu respeita lei nu’udár meu atu dignifika PN

JSMP lamenta no preokupa ho aktu dezorganizadu hosi deputadu sira no ejijé deputadu sira atu respeita lei nu’udár meu atu dignifika PN
JUDICIAL SYSTEM MONITORING PROGRAMME PROGRAMA MONITORIZASAUN BA SISTEMA JUDISIÁRIU Komunikadu Imprensa Parlamentu Nasionál 19 Maiu 2020

JSMP preokupa ho aktu dezorganizadu ne’ebé akontese iha 18 to’o 19 Maiu 2020 iha salaun plenária Parlamentu Nasionál (PN) entre deputadu sira, bainhira Vise-prezidente Parlamentu Nasionál na’in rua, distinta deputada Maria Angelina Lopes Sarmento ho distintu deputadu Luis Roberto da Silva tenta atu okupa fatin Prezidente Parlamentu Nasionál ni’an iha Meja Prezidénsia Parlamentu nian.

Aktu ida ne’e, hamosu reasaun entre deputadu sira hosi parte Partidu-CNRT nian hodi la fó fatin ba Vise-prezidente na’in rua atu okupa kadeira Prezidente Parlamentu Nasionál nune’e hamosu distúrbiu no haksesuk malu ho liafuan no atitude ne’e la ho étika. Deputadu sira hasai liafuan ladi’ak no inklui reasaun hosi jestu fíziku ne’ebé hatudu ba malu” entre deputadu Partidu-CNRT ho deputadu Fretilin, PLP no KHUNTO.



“JSMP lamenta maka’as ho aktu la apropriadu no konsidera aktu deputadu sira-nian la tuir étika polítika ne’ebé sivilizadu no hamonu dignidade Parlamentu Nasionál nu’udar órgaun ne’ebé reprezenta povu iha públiku no ba mundu tomak ho aktu ne’ebé la apropriadu hodi estraga meja no kadeira sira Parlamentu Nasionál nian”, dehan Diretóra Ezekutivu JSMP, Sra. Ana Paula Marçal.

Ho nune’e JSMP husu ba deputadu sira atu kontinua hatudu komportamentu polítiku ho étika ba públiku nu’udár reprezentante povu hodi kumpri lei sira no rejimentu Parlamentu Nasionál atu bele rezolve dezentendimentu sira entre deputadu sira ligadu ho pedidu destituisaun nian.

JSMP rekoñese mós katak pedidu destituisaun tuir dalan rejimentál ne’ebé regula ona iha Artigu 16-B, maibé importante mak tenke tuir prosedimentu sira ne’ebé regula iha Rejimentu hodi fasilita prosesu destituisaun no evita hamosu desentendimentu no obriga realiza reuniaun plenaria hodi halo diskusaun no votasaun ba destituisaun Prezidente Parlamentu. Prosesu diskusaun no votasaun ne’e rasik la tuir ona prosedimentu sira ne’ebé prevee iha Rejimentu Parlamentu nian.

JSMP mós husu ba Prezidente Repúblika atu bele foti asaun konkreta ruma tuir kompetensia konstitusionál hodi bele asegura funsionamentu regulár no normal instituisaun demokrátiku sira no bele solusiona situasaun polítika ida ne’e tuir provizaun Artigu 74 pontu 1) K-RDTL katak Prezidente Repúblika nu’udar xefi estadu no reprezenta no garante nasaun nia independénsia, estadu nia unidade no instituisaun demokrátika sira-nia funsionamentu regulár.

Atu hetan informasaun liutan favor kontaktu direitamente:

Ana Paula Marçal
Diretóra Ezekutivu JSMP
Email: ana@jsmp.tl
Telefone: 77040735 | 3323883
info@jsmp.tl
Website: http://jsmp.tl/

No comments: