25 June 2018

JSMP: Sumáriu Kazu Tribunál Distritál Oekusi Períodu Abril 2018

East Timor Law & Justice Bulletin Timor-Leste Court Reports Tribunal Distriral Oekusi
Sumáriu Kazu Tribunál Distritál Oekusi Períodu Abril 2018 Deskripsaun sumáriu julgamentu ba desizaun kazu sira

1. Krime ofensa ba integridade fízika simples

Nú. Prosesun: 0154/17.OESIC

Kompozisaun Tribunál : Singulár

Juis : Dr. João Ribeiro

Prokuradór  : Dr. Mateus Nesi

Defeza : Dr. Calisto Tout : Dr. Inacio Quebo & Dr. Filipe Landos (Advogado Estajiáriu)

Tipu pena                                : Pena prizaun tinan 1 suspende ba tinan 1

Iha 02 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ne’ebé envolve arguidu Anselmo Suni hasoru lezada Rosina Teme, (nu’udar viziñu) iha Suku Costa, Sub-distrito Pante-makassar, Distritu Oekusi.

Akuzasaun Prokuradór

Prokuradór akuza katak iha 14 Agostu 2017, maisumenus iha tuku 08.00 dadeer, arguidu ho lezada diskuti malu kona-ba fahe bee ba toos hodi rega malus ne’ebé arguidu ho lezada kuda iha ida-idak nia toos. Arguidu basa dala 2 iha lezada nia oin no tebe dala 2 iha lezada nia kanotak parte loos no rezulta lezada sofre moras. Kazu ne’e anexa mós ho relatóriu médiku husi Ospital Referal Oekusi no fotografia husi Polisia-VPU.

Prokuradór akuza arguidu kontra artigu 145 Kódigu Penál (KP) kona-ba ofensa ba integridade fízika simples ho moldura penál to’o tinan 3 ka multa.

Produsaun ba prova



Arguidu deklara katak nia basa dala 2 iha lezada nia kotuk parte karuk. Arguidu mós deklara katak arrepende ona nia hahalok no servisu hanesan to’ós-na’in, laiha rendimentu fixu kada fulan no iha oan nain 3. Arguidu foin primeira-vez mai hatan iha tribunál no seidauk dame malu ho lezada. Arguidu tenta buka lezada atu diak malu fali no fó ho osan US$100.00, maibé lezada lakohi. Iha parte seluk lezada kontinua konfirma faktus hotu iha akuzasaun.



Testemuña Marta Meta Oqui nu’udar lezada nia viziña depoimenta katak iha akontesementu ne’e, testemuña hare arguidu basa dala 2 iha lezada nia kotuk parte karuk no lahare arguidu tebe lezada, tanba depoisde arguidu basa lezada, testemuña lori ona nia oan ba eskola.



Alegasaun finál

Prokuradór konsidera arguidu provadu komete krime hasoru lezada, tanba ne’e husu ba tribunál atu kondena arguidu tuirartigu 145 KP.



Enkuantu defeza haktuir katak arguidu deklara deit faktus ne’ebé nia komete, arrepende ona nia hahalok no foin primeira-vez mai hatan iha tribunal. Defeza haktuir liután katak depoisde akontesementu ne’e arguidu hakarak diak malu ho lezada, maibé lezada mak lakohi. Tanba ne’e husu ba tribunál atu aplika pena kmaan ba arguidu.



Desizaun

Depoisde avalia faktus provadu sira ne’ebé produs durante julgamentu, Tribunál konklui prosesu ne’e no kondena arguidu ho pena prizaun tinan 1 suspende ba tinan 1.



2.      Krime ofensa ba integridade fízika simples ho natureza violénsia doméstika

Nú. Prosesu                             : 0174/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena prizaun tinan 1 suspende ba tinan 1 fulan 6



Iha 02 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu MSN hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 08 Setembru 2017, maisumenus iha tuku 19.00 kalan, arguidu basa dala 2 iha lezada nia hasan karuk, tuku dala 2 iha lezada nia ulun no tebe dala 1 iha lezada nia kotuk laran no rezulta lezada sofre moras. Kazu ne’e aneksa mós ho relatóriu médiku husi PRADET no fotografia husi Polisia-VPU.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 Lei Kontra Violénsia Doméstika (LKVD).



Produsaun ba prova

Arguidu konfesa faktus hotu iha akuzasaun no deklara katak arrepende ona nia hahalok. Arguidu servisu hanesan to’ós-na’in laiha rendimentu fixu kada fulan no iha oan nain 2. Arguidu foin primeira-vez mai hatan iha tribunál, diak malu ona ho lezada no moris hamutuk nu’udar feen-laen.



Prokuradór husu ba tribunál atu presinde lezada nia deklarasaun ne’ebé antes ne’e prokuradór arola ona atu rona tanba arguidu konfesa faktus hotu iha akuzasaun.



Alegasaun finál

Prokuradór haktuir katak arguidu provadu komete krime hasoru lezada. Prokuradór rejista katak kazu violénsia doméstika barak akontese iha Rejiaun Oekusi kompara ho distritu/munisípiu sira seluk. Tanba ne’e husu ba tribunál atu kondena arguidu tuir artigu 145 KP.



Enkuantu defeza haktuir katak arguidu deklara faktus hotu ne’ebé akuza ba arguidu, arrepende ona nia hahalok no promete sei la komete tan krime hasoru lezada iha futuru no arguidu iha oan nain 2. Tanba ne’e husu ba tribunál aplika pena admoestasaun ba arguidu.



Desizaun

Depoisde avalia faktus provadu sira ne’ebé prodús durante julgamentu, tribunál konklui prosesu ne’e no kondena arguidu ho pena prizaun tinan 1 suspende ba tinan 1 fulan 6.

3.      Krime ofensa ba integridade fízika simples ho natureza violénsia doméstika

Nú. Prosesu                             : 0019/17.OEPSB

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Marcelino Marques Coro

: Dr. Inacio Quebo ho Dr. Filipe Landos

Tipu pena                                : Pena prizaun tinan 1 suspende ba tinan 1



Iha 03 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu HS hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 25 Agosto 2017, maizumenus iha tuku 08.00 dadeer, arguidu lori tali plastik baku dala 1 iha lezada nia kotuk laran no rezulta lezada sofre mean no moras iha lezada nia kotuk laran.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun ba prova

Arguidu konfesa faktus hotu iha akuzasaun no deklara katak arrepende ona nia hahalok. Arguidu servisu hanesan to’ós-na’in laiha rendimentu fixu kada fulan no iha oan nain 5. Arguidu promete ba tribunál katak sei la komete tan krime hasoru nia feen ka ema seluk iha futuru. Depoisde akontesementu arguidu diak malu kedas ho lezada no agora moris hamutuk iha uma 1.



Prokuradór husu ba tribunál atu presinde lezada nia deklarasaun tanba arguidu konfesa faktus hotu iha akuzasaun.



Alegasaun finál

Prokuradór haktuir katak arguidu provadu komete krime violénsia doméstika hasoru nia feen no arguidu iha intensaun maka’as atu baku nia feen. Tanba ne’e husu ba tribunál aplika pena tuir artigu 145 KP. Enkuantu defeza haktuir katak arguidu konfesa faktus hotu iha akuzasaun, arrepende ona nia hahalok, foin primeira-vez mai hatan iha tribunál no promete sei la komete tan krime hasoru lezada ka membru família seluk iha futuru no iha oan nain 5. Tanba ne’e husu ba tribunál aplika pena ne’ebé adekuadu ba arguidu.



Desizaun

Depoisde avalia faktus provadu sira durante julgamentu, tribunál konklui prosesu ne’e no kondena arguidu ho pena prizaun tinan 1 no suspende ba tinan 1.



4.      Krime ofensa ba integridade fízika simples ho natureza violénsia doméstika

Nú. Prosesu                             : 0191/17.OEPSB

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena admoestasaun no omologa pedidu dezistensia keixa



Iha 03 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu UC hasoru nia oan (LEC) ho (idade 15) no nia bei-oan (GBA)  ho (idade 11), iha Distritu Oekusi.



Akuzasaun Prokuradór

Prokuradór akuza katak iha 26 Agosto 2017, maisumenus iha tuku 14.00 meudia, arguidu lori ai-sukaer sanak baku dala 2 iha nia oan kotuk laran no rezulta lezadu sofre moras no mean iha lezadu nia kotuk laran. Aleinde ne’e, arguidu lori ai-sukaer sanak baku dala 2 iha nia bei-oan nia kotuk laran no rezulta lezadu sofre moras no mean iha kotuk laran.



Prokuradór akuza arguidu kontra artigu 145 KP kona-ba krime ofensa ba integridade fízika simples ho moldura penal to’o tinan 3 ka multa hasoru nia beioan no konjuga ho artigu 2, 3 no artigu 35 letra (b) no artigu 36 LKVD hasoru ninia oan.



Bazeia ba artigu 262 KPP kona-ba tentativa ba konsiliasaun, antes tama ba julgamentu produsaun ba prova, juis husu atu halo tentativa konsiliasaun ba arguidu no lezadu GBA (arguidu nia bei-oan) ba kazu krime ofensa ba integridade fízika simples.



Iha prosesu konsiliasaun ne’e, tribunál husu ba lezadu GBA katak hakarak diak malu ho nia avo, no lezadu hatan katak nia hakarak, nune’e tribunál dezisté tiha lezadu ninia keixa hasoru arguidu.



Bazeia ba akordu dame entre parte rua no pedidu dezisténsia keixa hosi lezadu, tribunál konklui prosesu ne’e no omologa akordu dame entre parte sira.



Hafoin ida-ne’e, tribunál kontinua julgamentu ba kazu ofensa ba integridade fízika simples ho natureza violénsia doméstika ne’ebé arguidu komete hasoru nia oan.



Produsaun prova

Arguidu konfesa faktus hotu iha akuzasaun, deklara katak arrepende ona nia hahalok no promete sei la komete tan krime hasoru nia oan ka ema seluk iha future. Arguidu nu’udar to’ós-na’in, laiha rendimentu fixu kada fulan no iha oan nain 5. Depoisde akontesementu ne’e sira dame malu kedas no agora moris hamutuk iha uma ida.



Hafoin rona tiha deklarasaun hosi arguidu, prokuradór husu ba tribunál atu presinde lezada nia deklarasaun tanba arguidu konfesa faktus hotu iha akuzasaun.



Alegasaun finál

Prokuradór konsidera arguidu provadu komete krime hasoru nia oan no bazeia ba konfisaun arguidu nian. Tanba ne’e husu ba tribunál atu aplika pena tuir artigu 145 KP.



Enkuantu defeza husu ba tribunál atu aplika pena ne’ebé kmaan ba arguidu, tanba arguidu konfesa, arrepende ona nia hahalok no diak malu ona ho lezadu sira no iha oan nain 5.



Desizaun

Depoisde avalia faktus ne’ebé produs iha julgamentu, tribunál konklui prosesu ne’e no kondena arguidu ho pena admoestasaun.



5.      Krime ofensa ba integridade fízika simples ho natureza violénsia doméstika

Nú. Prosesu                             : 0017/17.OEPSB

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena prizaun tinan 2 suspende ba tinan 2



Iha 03 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu MP hasoru nia feen ho nia oan feto, iha Distritu Oekusi.



Akuzasaun Prokuradór

Prokuradór akuza katak iha 22 Agostu 2017, maisumenus iha tuku 12.00 meudia, arguidu lori fatuk kiik tuda dala 1 iha nia feen kabun no ruzulta lezada sofre moras iha kabun. Aleinde ne’e, arguidu mós lori fiu eletrisidade baku dala 1 iha nia ona ninia-kabaas no rezulta lezada sofre moras iha kabaas.



Prokuradór akuza arguida kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun prova

Arguidu konfesa faktus hotu iha akuzasaun, arguidu mós deklara katak arrepende ona nia hahalok, diak malu ona ho lezada sira no promete sei la komete tan krime hanesan hasoru lezada sira iha futuru. Arguidu hanesan argrikultór, laiha rendimentu fixu kada fulan no iha oan nain 6.



Prokuradór husu ba tribunál atu presinde lezada nain 2 sira nia deklarasaun tanba arguidu konfesa faktus hotu iha akuzasaun.



Alegasaun finál

Prokuradór konsidera arguidu provadu komete krime hasoru nia feen ho nia oan bazeia ba konfisaun arguidu nian. Tanba ne’e husu ba tribunál atu aplika pena tuir artigu 145 KP.



Defeza husu ba tribunál atu aplika pena ne’ebé adekuadu ba arguidu tuir nia sala tanba durante produsaun ba prova arguidu hatudu kolaborasaun diak ho tribunál. Arguidu mós deklara katak arrepende ona nia hahalok no diak malu ona ho nia feen no oan. Arguidu iha oan nain 6 no promete sei la komete tan tan krime hasoru nia membru familia ka ema seluk iha futuru.



Desizaun

Tribunál konsidera arguidu provadu komete krime hasoru lezada nain 2 bazeia ba konfisaun arguidu nian no konklui prosesu ne’e no kondena arguidu ho pena prizaun tinan 2 suspende ba tinan 2.



6.      Krime ofensa ba integridade fízika simples

Nú. Prosesu                             : 0187/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Omologa pedidu dezisténsia keixa



Iha 04 Abril 2018, Tribunál Distritál Oekusi prezide julgamentu tentativa konsiliasaun ba krime ofensa ba integridade fízika simples ne’ebé envolve arguidu Calisto Quelo ho Agostinho Siqui hasoru lezadu Natalino Goncalves Fernandes, iha Suku Costa, Sub-distrito Pante-makassar Distritu Oekusi.



Akuzasaun Prokuradór

Prokuradór akuza katak iha 27 Setembru 2017, maisumenus iha tuku 09.00 dadeer, arguidu Calisto Quelo buti iha lezadu nia kakorok dala 1 no arguidu Agostinho Siqui tuku dala 1 iha lezadu nia kotuk laran no rezulta lezadu sofre moras.



Prokuradór akuza arguidu nain 2 kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa.



Produsaun ba prova

Bazeia ba artigu 262 Kódigu Prosesu Penál (KPP) kona-ba tentativa ba konsiliasaun, nune’e antes tama ba julgamentu produsaun ba prova, juis husu atu halo tentativa konsiliasaun ba arguidu nain 2 no lezadu.



Iha prosesu konsiliasaun ne’e, arguidu nain 2 husu deskulpa ba lezadu, arrepende ona sira nia hahalok no promete sei la komete tan krime hanesan hasoru lezadu. Lezadu konkorda ho pedidu ne’e no husu ba tribunál atu dezisté-ninia keixa hasoru arguidu nain 2.



Alegasaun finál

Prokuradór no Defeza apresia akordu dame ne’ebé parte rua deside ona no husu ba Tribunál atu omologa prosesu ne’e.



Desizaun

Bazeia ba akordu dame hosi parte rua no pedidu dezisténsia hosi lezadu, tribunál konklui prosesu ne’e no omologa akordu dame entre parte sira.



7.      Krime ofensa ba integridade fízika simples ho natureza violénsia doméstika

Nú. Prosesu                             : 0202/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena prizaun tinan 1 suspende ba tinan 1 fulan 6



Iha 05 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu BT hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 21 Outobru 2017, maisumenus iha tuku 12.00 meudia, arguidu kaer lezada nia fuuk no riba lezada ba rai no basa dala 1 iha lezada nia matan-fukun parte karuk no rezulta lezada sofre moras.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun ba prova

Arguidu konfesa faktus hotu iha akuzasaun, arguidu mós deklara katak arrepende ona nia hahalok no diak malu ona ho lezada. Arguidu hanesan agrikultór no laiha rendimentu fixu kada fulan. Tanba arguidu konfesa faktus hotu iha akuzasaun, prokuradór husu ba tribunál atu presinde lezada nia deklarasaun.



Alegasaun finál

Prokuradór konsidera arguidu provadu komete krime hasoru nia feen, mezmu arguidu hatene hela katak lezada laiha forsa atu halo reasaun hasoru arguidu. Tanba ne’e husu ba tribunál atu aplika pena tuir artigu 145 KP. Enkuantu defeza husu ba tribunál atu aplika pena ne’ebé adekuadu ba arguidu, tanba arguidu konfesa, arrepende ona nia hahalok no diak malu ona ho lezada.



Desizaun

Depoisde avalia faktus provadu sira durante julgamentu, Tribunál konklui prosesu ne’e no kondena arguidu ho pena prizaun tinan 1 suspende ba tinan 1 fulan 6.



8.      Krime ofensa ba integridade fízika simples

Nú. Prosesu                             : 0195/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Incsio Quebo no Dr. Filipe Landos

Tipu pena                                : Omologa pedidu dezisténsia keixa



Iha 05 Abril 2018, Tribunál Distritál Oekusi prezide julgamentu tentativa konsiliasaun ba krime ofensa ba integridade fízika simples ne’ebé envolve arguidu Tomas de Deus Colo hasoru Januario da Costa dos Remedios, iha Suku Costa, Sub-distrito Pante-makassar, Distritu Oekusi.



Akuzasaun Prokuradór

Prokuradór akuza katak iha 30 Setembru 2017, maisumenus iha tuku 10.30 dadeer, arguidu dudu lezadu monu ba rai, lezadu nia ulun kona iha parede no rezulta lezadu sofre bubu no moras iha lezadu nia ulun. Kazu ne’e akontese arguidu ho lezadu diskute malu, tanba hemu tua hamutuk to’o lanu.



Prokuradór akuza arguidu kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa.



Produsaun ba prova

Bazeia ba artigu 262 KPP kona-ba tentativa ba konsiliasaun, nune’e antes tama ba julgamentu produsaun ba prova, juis husu atu halo tentativa konsiliasaun ba arguidu no lezadu.



Iha prosesu konsiliasaun ne’e, arguidu deklara katak arrepende ona nia hahalok no promete sei la komete tan krime hanesan hasoru lezadu iha futuru.  Lezadu konkorda ho pedidu ne’e no husu ba tribunál atu dezisté-ninia keixa hasoru arguidu.



Alegasaun finál

Prokuradór no defeza apresia akordu dame ne’ebé parte rua deside ona no husu ba tribunál atu omologa prosesu ne’e.



Desizaun

Bazeia ba akordu dame antre parte rua no pedidu dezisténsia hosi lezadu, tribunál konklui prosesu ne’e no omologa akordu dame entre parte sira.



9.      Krime ofensa ba integridade fízika simples ho natureza violénsia doméstika

Nú. Prosesu                             : 0212/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena multa



Iha 05 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu GM hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 14 Novembru 2017, maisumenus iha tuku 12.00 meudia, arguidu tuku dala 1 iha lezada nia hasan parte loos no rezulta lezada sofre moras, bubu no metan iha lezada nia hasan. Kazu ne’e anexa mós ho relatóriu médiku husi PRADET no fotografia husi Polisia-VPU.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun ba prova

Durante julgamentu, arguidu konfesa faktus hotu iha akuzasaun, arguidu deklara katak arrepende ona nia hahalok no diak malu ona ho lezada. Arguidu hanesan negosiante kiik ho rendimentu kada fulan US$60.00 no iha oan nain 1.



Prokuradór husu ba tribunál atu presinde lezada nia deklarasaun ne’ebé antes ne’e prokuradór arola ona atu rona, tanba arguidu konfesa faktus hotu iha akuzasaun.



Alegasaun finál

Prokuradór konsidera katak arguidu provadu komete krime hasoru lezada bazeia ba konfisaun arguidu nian. Atu prevene arguidu repete tan hahalok hanesan iha futuru, husu ba tribunál atu aplika pena tuir artigu 145 KP.



Enkuantu defeza husu ba tribunál atu aplika pena ne’ebé adekuadu, tanba arguidu konfesa, arrepende ona nia hahalok, diak malu ona ho lezada no iha oan nain 1.



Desizaun

Tribunál konklui prosesu ne’e no kondena arguidu ho pena multa US$150.00 ne’ebé sei selu US$1.00 kada loron durante loron 150. Tribunál mós fiksa pena alternativa durante loron 100 prizaun, wainhira arguidu la kumpri pena multa refere.



10.  Krime ofensa ba integridade fízika simples ho natureza violénsia doméstika

Nú. Prosesu                             : 0059/17.OEPMK

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo ho Dr. Filipe Landos

Tipu pena                                : Pena admoestasaun



Iha 06 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu AQ hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 19 Dezembru 2017, maisumenus iha tuku 16.30 lokraik, arguidu tebe dala 1 iha lezada nia kanotak no rezulta lezada sofre moras iha lezada nia kanotak. Kazu ne’e anexa mós ho relatóriu médiku husi PRADET no fotografia husi Polisia-VPU.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun ba prova

Arguidu konfesa faktus hotu iha akuzasaun, arrepende ona nia hahalok no diak malu ona ho lezada. Arguidu servisu hanesan seguransa Perkins ANL Xpress (PAX) ho rendimentu kada fulan US$140.00.



Prokuradór husu ba tribunál atu presinde lezada nia deklarasaun ne’ebé antes ne’e prokuradór arola ona atu rona, tanba arguidu konfesa faktus hotu iha akuzasaun.



Alegasaun finál

Prokuradór konsidera katak faktus hotu provadu bazeia ba arguidu konfisaun durante julgamentu produsaun ba prova. Tanba ne’e atu prevene arguidu repete tan krime hanesan hasoru lezada iha futuru, husu ba tribunál atu aplika pena tuir artigu 145 KP.



Enkuantu defeza husu ba tribunál atu kondena arguidu ho pena admoestasaun, tanba arguidu konfesa, arrepende ona nia hahalok no diak malu ona ho lezada.



Desizaun

Depoisde avalia faktus provadu ne’ebé prodús durante julgamentu, tribunál konklui prosesu ne’e no kondena arguidu ho pena admoestasaun no selu kustu judisiál US$30.00.



11.  Krime ofensa ba integridade fízika simples ho natureza violénsia doméstika

Nú. Prosesu                             : 0022/17.OEOSL

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo ho Dr. Filipe Landos

Tipu pena                                : Pena prizaun fulan 6 suspende ba tinan 1



Iha 06 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu JB hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 05 Novembru 2017, maisumenus iha tuku 08.00 dadeer, arguidu tebe dala 1 iha lezada nia kanuruk no rezulta lezada sofre moras iha lezada nia kanuruk. Kazu ne’e anexa mós ho relatóriu médiku husi PRADET no fotografia husi Polisia-VPU.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun ba prova

Arguidu konfesa faktus hotu iha akuzasaun, arguidu deklara katak arrepende ona nia hahalok, diak malu ona ho lezada no iha oan nain 1. Arguidu .henesan agrikutór laiha rendimentu fixu kada fulan. Prokuradór husu ba tribunál atu presinde lezada nia deklarasaun ne’ebé antes ne’e prokuradór arola ona atu rona, tanba arguidu konfesa faktus hotu iha akuzasaun.



Alegasaun finál

Prokuradór konsidera katak arguidu provadu komete hasoru lezada bazeia ba konfisaun arguidu nian. Tanba ne’e husu ba tribunál atu kondena arguidu tuir artigu 145 KP.



Iha parte seluk, defeza husu ba tribunál atu kondena arguidu ho pena adekuadu tuir arguidu nia sala, tanba arguidu konfesa, arrepende ona nia hahalok no di’ak malu ona ho lezada.



Desizaun

Depoisde avalia faktus provadu ne’ebé prodús durante julgamentu, tribunál konklui prosesu ne’e no kondena arguidu ho pena prizaun fulan 6 suspende ba tinan 1.



12.  Krime ofensa ba integridade fízika simples

Nú. Prosesu                             : 0197/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Omologa pedidu dezisténsia keixa



Iha 06 Abril 2018, Tribunál Distritál Oekusi prezide julgamentu tentativa konsiliasaun ba krime ofensa ba integridade fízika simples ne’ebé envolve arguidu Rofino Caunan, Marcelino dos Santos Caba Eco, Yokubus Queno no Domingos Caunan hasoru Mario Queno, iha Suku Costa, Sub-distrito Pante-makassar, Distritu Oekusi.



Akuzasaun Prokuradór

Prokuradór akuza katak iha 07 Outobru 2017, maisumenus iha tuku 15.00 lokraik, arguidu Rofino Caunan no arguidu Marcelino dos Santos Caba Eco tuku dala 1 iha lezadu nia matan fukun parte karuk no arguidu Yokubus Queno no Domingos Caunan tebe dala 1 iha lezadu nia kelen parte loos. Kazu ne’e akontese wainhira arguidu sira no lezadu hemu tua hamutuk to’o lanu no diskute malu.



Prokuradór akuza arguidu nain 4 kontra artigu 145 Kódigu Penál kona-ba ofensa ba integridade fízika simples ho moldura penál to’o tinan 3 ka multa.



Produsaun ba prova

Bazeia ba artigu 262 KPP kona-ba tentativa ba konsiliasaun, nune’e antes tama ba julgamentu produsaun ba prova, juis husu atu halo tentativa konsiliasaun ba arguidu sira no lezadu.



Iha prosesu konsiliasaun ne’e, arguidu sira deklara katak arrepende ona sira nia hahalok no promete sei la komete tan krime hanesan hasoru lezadu iha futuru. Lezadu konkorda ho pedidu ne’e, maibé ho kondisaun katak arguidu sira tenke fó indeminizasaun sivil ba lezadu ho total osan US$150.00. Arguidu sira aseita ho lezadu ninia pedidu ne’e, nune’e lezadu husu ba tribunál atu dezisté ninia-keixa hasoru arguidu sira.



Alegasaun finál

Prokuradór no defeza apresia akordu dame ne’ebé parte rua deside ona no husu ba tribunál atu omologa akordu dame ne’e.



Desizaun

Bazeia ba akordu dame entre parte rua no pedidu dezisténsia hosi lezadu, tribunál konklui prosesu ne’e no omologa akordu dame entre parte sira.



13.  Krime ofensa ba integridade fízika simples ho natureza violénsia doméstika

Nú. Prosesu                             : 0193/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena prizaun



Iha 10 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu HJFS hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 19 Setembru 2017, maisumenus iha tuku 14.00 meudia, arguidu tebe dala 1 iha lezada nia kotuk laran, dala 1 iha lezada nia kanotak no dala 1 iha lezada nia ulun no rezulta lezada monu ba rai. Wainhira lezada monu ba rai arguidu kontinua sama dala 1 iha lezada nia ulun no buti lezada nia kakorok no rezulta lezada sofre moras. Kazu ne’e anexa mós ho relatóriu médiku husi PRADET no fotografia husi Polisia-VPU.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun prova

Iha julgamentu, arguidu uza direitu nonok. Enkuantu lezada konfirma faktus hotu iha akuzasaun no deklara katak diak malu ona ho arguidu.



Alegasaun finál

Prokuradór konsidera arguidu provadu komete krime hasoru lezada tuir faktus iha akuzasaun no arguidu la arrepende ninia hahalok, tanba antes ne’e tribunál kondena ona arguidu ho pena prizaun fulan 6 ba kazu ofensa ba integridade fízika simples ho natureza violénsia doméstika ne’ebé arguidu komete hasoru ninia-aman. Tanba ne’e husu ba tribunál atu aplika pena prizaun ba arguidu bazeia ba artigu 145 KP.



Enkuantu defeza haktuir katak mezmu iha produsaun ba prova arguidu hili direitu nonok, maibé lezada deklara katak depoisde akotesementu ne’e sira diak malu kedas no sira iha oan nain 1.  Tanba ne’e husu ba tribunál atu aplika pena ne’ebé adekuadu ba arguidu.



Desizaun

Tribunál konklui katak arguidu provadu komete krime hasoru lezada. Tribunál mós konsidera katak arguidu la hatudu ninia arrependementu ba  desizaun tribunál nian  iha 24 Novembru 2017 ne’ebé kondena ona arguidu ho pena efetiva fulan 6 prizaun ba kazu violénsia doméstika hasoru ninia-aman. Bazeia ba konsiderasaun ne’e tribunál kondena arguidu ho pena efetiva fulan 9 prizaun.



14.  Krime ofensa ba integridade fízika simples ho natureza violénsia doméstika

Nú. Prosesu                             : 0205/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena admoestasaun



Iha 12 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguida LFSC hasoru sira nia oan feto (LGSS) no arguidu TL hasoru nia feen (LFSC), iha Distritu Oekusi.



Akuzasaun Prokuradór

Prokuradór akuza katak iha 23 Agosto 2017, maisumenus iha tuku 09.00 dadeer, arguida LFSC lori sinelus baku dala 1 iha ninia oan-feto nia kotuk laran no lori aisar-kesak futun 1 baku dala 1 iha kotuk laran no rezulta lezada sofre moras.



Depoisde akontesementu ne’e maiumenus liu-tiha oras 1 ho balun arguidu TL (ne’ebé hanesan lezada (LGSS) nia aman no arguida nia-laen) la simu arguida LFSC ninia halaok ne’e, nune’e basa dala 1 iha lezada LFSC nia hasan parte loos no karuk no tuku dala 1 iha lezada LFSC nia liman kabun parte  loos. Aleinde ne’e arguidu mós buti dala 1 iha lezada nia kakorok no rezulta  lezada sofre moras.



Prokuradór akuza arguidu/a kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun ba prova

Durante julgamentu arguida LFSC ne’ebé nu’udar inan hasoru ninia oan feto uza direitu nonok. Enkuantu lezada LGSS konfirma faktus hotu iha akuzasaun no deklara katak depoisde akontesementu ne’e sira dame malu kedas.

Iha parte seluk, arguidu TL mós uza direitu nonok durante julgamentu, maibé lezada LFSC (feen) kontinua konfirma faktu sira iha akuzasaun.



Alegasaun finál

Prokuradór konsidera arguida LFSC provadu komete krime hasoru nia oan. Aleinde ne’e Prokuradór mós konsidera katak arguidu TL mós provadu komete fali krime hasoru nian feen hanesan reasaun lakonkorda ho arguida ninia hahalok hasoru sira nia-oan. Prokuradór refora katak kazu violénsia doméstika barak akontese iha Rejiaun Oekusi kompara ho distritu/munisípiu sira seluk. Tanba ne’e husu ba tribunál atu kondena arguidu/a tuir pena ne’ebé hakerek ona iha artigu 145 KP.



Enkuantu defeza haktuir katak iha produsaun ba prova arguida LFSC maibé lezada LGSS konfirma faktus hotu iha akuzasaun no deklara katak depoisde akontesementu ne’e sira diak malu kedas no moris hamutuk hanesan familia ida. Nune’e mós ba kazu ne’ebé envolve arguidu TL hasoru nia feen, tribunál konsidera katak arguidu provadu komete krime hasoru lezada mesmu arguidu hili direitu nonok durante julgamentu. Tanba ne’e husu ba tribunál atu aplika pena ne’ebé adekuadu ba arguida no arguida iha kazu ida-idak tuir sira nia sala.



Desizaun

Depoisde avalia faktus provadu sira ne’ebé prodús durante julgamentu, tribunál konklui prosesu ne’e no kondena arguidu no arguida ho pena admoestasaun ba sira ida-idak no selu kustu judisiál US$15.00 ba kada arguida/arguidu.



15.  Krime ofensa korporál resíproka

Nú. Prosesu                             : 0192/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

Tipu pena                                : Omologa pedidu dezisténsia keixa



Iha 12 Abril 2018, Tribunál Distritál Oekusi prezide julgamentu tentativa konsiliasaun ba krime ofensa korporál resíproka ne’ebé envolve arguidu JdCR hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 29 Setembru 2017, maisumenus iha tuku 09.00 dadeer, arguidu basa dala 1 iha lezada nia hasan parte loos no rezulta lezada sofre moras iha lezada nia hasan, nune’e  lezada basa dala 1 iha arguidu nia kanuruk. Kazu ne’e akontese wainhira lezada haruka  arguidu ba sosa foos no osan restu atu hola masako no masin, maibé argudiu sosa fali sigura.



Prokuradór akuza arguidu kontra artigu 151 Kódigu Penál kona-ba ofensa korporál resíproka ho moldura penál to’o tinan 2 ka multa.



Produsaun ba prova

Bazeia ba artigu 262 KPP kona-ba tentativa ba konsiliasaun, nune’e antes tama ba produsaun ba prova, juis husu atu halo tentativa konsiliasaun ba arguidu no lezada.



Iha prosesu konsiliasaun ne’e, arguidu  no lezada husu deskulpa ba malu, arrepende ona sira nia hahalok no promete sei la repete hahalok hanesan iha futuru, nune’e tribunál dezisté tiha keixa ne’e.



Alegasaun finál

Prokuradór no defeza apresia akordu dame ne’ebé parte rua deside ona no husu ba tribunál atu omologa prosesu ne’e.



Desizaun

Bazeia ba akordu dame entre parte rua no pedidu dezisténsia keixa hosi lezada, tribunál konklui prosesu ne’e no omologa akordu dame entre parte sira.



16.  Krime kontrabandu

Nú. Prosesu                             : 0015/17.OEBCN

Kompozisaun Tribunál            : Kolektivu

Juis                                          : Dr. João Ribeiro

: Dra. Zulmira da Silva

: Dr. Eusebio Victor Xavier

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena prizaun fulan 3 suspende ba tinan 1 ba kada arguidu/a



Iha 20 Abril 2018, Tribunál Distritál Oekusi prezide julgamentu leitura akordaun ba krime kontrabandu ne’ebé envolve arguidu/a Jonias Caunan Oematan ho Maria Requelinda Tamelab hasoru Estadu RDTL, iha Suku Beneufe, Sub-distritu Nitibe, Distritu Oekusi.



Akuzasaun Prokuradór

Prokuradór akuza katak iha 03 Fevereiro 2017, maisumenus iha tuku 14.30 lokraik, arguidu/a lori foos ho marka AAA saku 4 husi Baocnana, Oekusi atu lori ba Oepoli Indonezia liuhosi dalan ilegal fronteira Naktuka Timor-Leste. Maibé antes to’o iha fronteira Naktuta Unidade Polisia Fronteira (UPF) halo ona kapturasaun ba arguidu/a.



Prokuradór akuza arguidu/a kontra artigu 316 Kódigu Penál kona-ba krime kontrabandu ho moldura penál tinan 2 to’o tinan 6 prizaun ka multa.



Produsaun ba prova

Iha julgamentu arguidu/a konfesa faktus hotu iha akuzasaun no arrepende ona sira nia hahalok. Arguidu/a deklara katak sira nain rua hanesan feen-laen no objetivu hatama foos ne’e atu fó ba arguidu nia feton ne’ebé sei hela iha Indonezia-Oepoli. Arguidu/a hatete katak hahalok hanesan ne’e ladiak no kontra lei Timor, no promete sei la repete tan hahalok hanesan iha futuru no sira iha oan nain 2.



Prokuradór husu ba tribunál atu presindi testemuña hosi Unidade Polisia Fronteira (UPF) nia depoimentu ne’ebé antes ne’e prokuradór aprezenta ona ba tribunál tanba arguidu/a konfesa faktus hotu iha akuzasaun, no hosi parte defeza konkorda ho pedidu ne’e.



Alegasaun finál

Prokuradór konsidera arguidu/a provadu komete krime kontrabandu, tanba ne’e husu ba tribunál atu aplika pena ne’ebé hakerek ona iha artigu 316 KP.



Enkuantu defeza haktuir katak arguidu/a konfesa faktus hotu iha akuzasaun, arrepende ona sira nia hahalok, kolabora ho tribunál no sira oan nain 2. Arguidu/a laiha rendimentu fixu kada fulan no promete ona ba Tribunál sei la repete tan hahalok hanesan iha futuru. Tanba ne’e husu ba Tribunál atu aplika pena ne’ebé adekuadu ba arguidu/a tuir sira nia sala.



Desizaun

Depoisde avalia faktus provadu sira ne’ebé produz durante julgamentu, tribunál bazeia ba artigu 57 alinea (b) KP kona-ba atenuasaun extraordinariu nia grau, konklui prosesu ne’e no kondena arguidu/a ho pena prizaun fulan 3 suspende ba tinan 1 ba kada arguidu no arguida tanba sira la konsege hatama foos ne’e ba Indonezia, no sira to’o iha fronteira entre Timor Leste no Indonezia nian polisia kaptura ona sira.



17.  Krime ofensa ba integridade fízika simples no danu simples

Nú. Prosesu                             : 0016/17.OEOSL

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Calisto Tout

Tipu pena                                : Pena prizaun 1 suspende ba tinan 1 ba kada arguidu



Iha 23 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples no danu simples ne’ebé envolve arguidu Agostinho Tolo Tout, Camilho Abi, Jose Neno Abi no Serafino Abi hasoru lezadu Francisco Elu, iha Suku Usitaqueno, Sub-distrito Oesilo, Distritu Oekusi.



Akuzasaun Prokuradór

Prokuradór akuza katak iha 10 Setembru 2017, maisumenus iha tuku 08.00 dadeer, arguidu Agostinho Tolo Tout tuku dala 1 iha lezadu nia ulun no dala 1 iha lezadu nia kanotak parte loos. Arguidu Camilho Abi tuku dala 1 iha lezadu nia kanotak no rezulta lezadu sofre moras iha kanotak. Enkuantu arguidu Jose Neno Abi no arguidu Serafino Abi sobu lezadu nia lutu uma nian. Kazu ne’e akontese tanba lezadu halo lutu tama liu ba arguidu sira nia rai. Kazu ne’e anexa mós ho relatóriu médiku husi Ospital Referal Oekusi no fotografia husi Polisia-VPU.



Prokuradór akuza arguidu Agostinho Tolo Tout no arguidu Camilho Abi kontra artigu 145 KP kona-ba ofensa ba integridade fízika simples ho moldura penal to’o tinan 3 ka multa. Enkuantu arguidu Jose Neno Abi no arguidu Serafino Abi akuza ho artigu 258 KP kona-ba krime danu simples ho moldura penál to’o tinan 3 ka multa.



Produsaun ba prova

Arguidu Agostinho Tolo Tout no Camilho Abi deklara katak iha akontesementu ne’e arguidu sira lahalo agresaun fízika hasoru lezadu no sira diskute malu deit. Arguidu sira deklara katak foin primeira-vez mai hatan iha tribunál no hanesan to’os-na’in, laiha rendimentu kada fulan, arguidu sira seidauk diak malu ho lezadu tanba lezadu mak lakohi.



Enkuantu arguidu Jose Neno Abi no arguidu Serafino Abi deklara katak sobu duni lezadu nia lutu maisumenus metro 25, tanba lezadu halo lutu tama liu ba arguidu sira nia rai. Arguidu sira arrepende ona sira nia hahalok no foin primeira-vez mai hatan iha tribunál no seidauk dame malu ho lezadu, tanba lezadu mak lakohi.



Iha parte seluk, lezadu deklara katak arguidu Agostinho Tolo Tout tuku dala 1 iha lezadu nia reen-toos no arguidu Camilho Abi tuku dala 1 lezadu nia kanotak parte karuk no rezulta lezadu sofre moras too desmaia. Wainhira lezadu sente diak fali (sadar) lahare ona arguidu sira, tanba sira fila ona. Aleinde ne’e, arguidu Jose Neno Abi no arguidu Serafino Abi mak sobu lezadu nia lutu maisumenus metro 25. Depoisde akontesementu ne’e liutiha loron 2 lezadu hadia fali lutu ne’ebé arguidu sira sobu estraga.



Testemuña Agostinho Falo nu’udar lezadu nia viziñu depoimenta katak arguidu Agostinho Tolo Tout mak tuku dala 1 iha lezadu nia reen-toos no arguidu Camilho Abi tuku dala 1 iha lezadu nia kanotak parte karuk.  Enkuantu arguidu Jose Neno Abi no arguidu Serafino Abi mak sobu lezadu nia lutu.



Alegasaun finál

Prokuradór konsidera arguidu Agostinho Tolo Tout no arguidu Camilho Abi provadu komete krime ofensa ba integridade fízika simples hasoru lezadu no arguidu Jose Neno Abi no arguidu Serafino Abi provadu komete krime danu simples hasoru lezadu. Tanba ne’e husu ba tribunál atu kondena arguidu sira tuir pena ne’ebé define iha artigu 145 no 258 KP.



Defeza haktuir katak arguidu Agostinho Tolo Tout no arguidu Camilho Abi deklara katak iha akontesementu ne’e la halo agresaun fízika hasoru lezadu no sira deskuti malu deit.  Arguidu Jose Neno Abi no arguidu Serafino Abi konfesa faktus hotu iha akuzasaun, arrepende ona sira nia hahalok. Tanba ne’e husu ba tribunál atu absolve arguidu sira, maibé karik tribunál iha hanoin seluk defeza husu justisa.



Desizaun

Depoisde avalia faktus provadu ne’ebé produs iha julgamentu, Tribunál konklui prosesu ne’e no kondena kada arguidu ho pena prizaun tinan 1 suspende ba tinan 1.



18.  Krime kontrabandu

Nú. Prosesu                             : 0029/17.OESIC

Kompozisaun Tribunál            : Kolektivu

Juis                                          : Dr. João Ribeiro

: Dra. Zulmira da Silva

: Dr. Eusebio Victor Xavier

Prokuradór                              : Dr. Mateus Nesi

Defeza                                     : Dr. Calisto Tout

: Dr. Inacio Quebo no Dr. Filipe Landos

Tipu pena                                : Pena prizaun tinan 2 suspende ba tinan 2



Iha 23 Abril 2018, Tribunál Distritál Oekusi prezide julgamentu leitura akordaun ba krime kontrabandu ne’ebé envolve arguidu Pedro Colo hasoru Estadu RDTL, iha Suku Bobometo, Sub-distritu Oesilo, Distritu Oekusi.



Akuzasaun Prokuradór

Prokuradór akuza katak iha 20 Julu 2017, maisumenus iha tuku 19.30 kalan, arguidu hatama  sasan ilegal liu hosi fronteira Oesilo entre Indonezia ho Timor-Leste. Sasan sira ne’ebé arguidu hatama mak hanesan gazolina litru 86 ho manu 15.



Prokuradór akuza arguidu kontra artigu 316 KP kona-ba krime kontrabandu ho moldura penál tinan 2 to’o tinan 6 prizaun ka multa.



Produsaun ba prova

Arguidu konfesa faktus hotu iha akuzasaun, deklara katak nia arrepende ona nia hahalok no promete sei la repete hahalok ne’e iha futuru. Arguidu hatutan katak nia hakarak selu fali kedas taxa ba Dirasaun Alfandega maibé hosi Dirasaun Alfandega dehan katak depoisde prosesu iha tribunál hotu mak bele selu taxa. Arguidu nu’udar to’os-na’in, no laiha rendimentu fiksu kada fulan



Prokuradór husu ba tribunál atu presindi testemuña hosi Unidade Polisia Fronteira (UPF) nia depoimentu tanba arguidu konfesa faktus hotu iha akuzasaun.



Alegasaun finál

Prokuradór konsidera arguidu provadu komete krime kontrabandu, tanba ne’e husu ba tribunál atu aplika pena ne’ebé hakerek ona iha artigu 316 KP ba arguidu.



Defeza haktuir katak arguidu konfesa faktus hotu iha akuzasaun, arrepende ona nia hahalok. Arguidu hatudu kolaborasaun diak ho tribunál no laiha rendementu fixu kada fulan no promete sei larepete tan hahalok hanesan iha futuru. Tanba ne’e husu ba tribunál atu aplika pena ne’ebé adekuadu ba arguidu tuir nia sala.



Desizaun

Depoisde avalia faktus ne’ebé produs durante julgamentu, tribunál konklui prosesu ne’e no kondena arguidu ho pena prizaun tinan 2 suspende ba tinan 2.



19.   Krime ofensa ba integridade fízika simples ho natureza violénsia doméstika

Nú. Prosesu                             : 0228/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Marcelino Marques Coro

: Dr. Inacio Quebo no Dr. Filipe Landos

Tipu pena                                : Pena multa



Iha 23 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu JUS hasoru nia feen, iha Distritu Oe-Cusse.



Akuzasaun Prokuradór

Prokuradór akuza katak iha 21 Dezembru 2017, maisumenus iha tuku 22.00 kalan, arguidu basa dala 2 iha lezada nia hasan parte loos no dala 1 iha lezada nia hasan parte karuk no kauza lezada sofre moras. Kazu ne’e anexa mós ho relatóriu médiku husi PRADET no fotografia husi Polisia-VPU.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun prova

Arguidu konfesa faktus hotu iha akuzasaun, arguidu deklara katak arrepende ona nia hahalok, foin primera-vez mai hatan iha tribunál, diak malu ona ho lezada no iha oan nain 2. Arguidu mós konsiente katak baku ema nia isin bele kauza moras ba iha ema nia saúde fíziku, arguidu servisu iha kompania Hutama Karya (HK) ho rendimentu kada fulan US$148.00.



Prokuradór husu ba tribunál atu presinde lezada nia deklarasaun ne’ebé antes ne’e prokuradór arola ona atu rona, tanba arguidu konfesa faktus hotu iha akuzasaun.



Alegasaun finál

Prokuradór konsidera arguidu provadu komete krime hasoru lezada bazeia ba konfisaun arguidu nian no tuir loloos arguidu mak proteze lezada, maibé pelu-kontráriu arguidu mak komete fali krime hasoru lezada. Tanba ne’e husu ba tribunál atu aplika pena tuir artigu 145 KP.



Enkuantu defeza haktuir katak arguidu konfesa faktus hotu iha akuzasaun, arrepende ona nia hahalok, foin primeira-vez mai hatan iha tribunál no promete katak sei la komete tan krime hasoru lezada iha futuru. Arguidu mós deklara katak iha oan nain 2 no depoisde akontesementu ne’e sira dame malu kedas. Tanba ne’e husu ba tribunál aplika pena ne’ebé adekuadu ba arguidu



Desizaun

Tribunál konklui prosesu ne’e no kondena arguidu ho pena multa US$75.00 ne’ebé sei selu 0.50 sentavus kada loron durante loron 150 no selu kustu judisiál US$10.00. Tribunál mós fiksa pena alternativa durante loron 100 prizaun, wainhira arguidu la kumpri pena multa refere.



20.  Krime ezibisionizmu seksuál

Nú. Prosesu                             : 0173/17.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Jhon Dhun

: Dr. Inacio Quebo ho Dr. Filipe Landos

Tipu pena                                : Omologa pedidu dezisténsia keixa



Iha 23 Abril 2018, Tribunál Distritál Oekusi prezide julgamentu tentativa konsiliasaun ba krime ezibisionizmu seksuál ne’ebé envolve arguidu JRSN hasoru lezada CdO, iha Distritu Oekusi.



Akuzasaun Prokuradór

Prokuradór akuza katak iha 02 Setembru 2017, maizumenus iha tuku 20.30 kalan, arguidu hasai foto hosi nia hirus matan inklui nia orgaun seksuál ne’ebé hamrik hela no haruka foto refere liuhosi mensenger facebook nian ba lezada.



Prokuradór akuza arguidu kontra artigu 181 Kódigu Penál kona-ba krime ezibisionizmu seksuál ho moldura penál to’o tinan 3 ka multa.



Produsaun ba prova

Bazeia ba artigu 262 KPP kona-ba tentativa ba konsiliasaun, nune’e antes tama ba julgamentu produsaun ba prova, juis husu atu halo tentativa konsiliasaun ba arguidu no lezada.



Iha prosesu konsiliasaun ne’e, lezada hakarak diak malu ho arguidu, maibé ho kondisaun katak arguidu tenke husu diskulpa ba lezada nia familia no fó indeminizasaun sivíl ba lezada ho total osan US$1000,00. Arguidu konkorda ho lezada ninia pedidu no sei fó indeminizisaun US$1000,00 ba lezada no promete sei la komete tan krime hanesan iha futuru. Bazeia ba akordu dame-malu ne’e lezada husu ba tribunál atu dezisté ninia-keixa hasoru arguidu.



Alegasaun finál

Prokuradór no Defeza apresia akordu dame ne’ebé parte rua deside ona no husu ba tribunál atu omologa prosesu ne’e.



Desizaun

Bazeia ba akordu dame entre parte rua no pedidu dezisténsia hosi lezada, Tribunál konklui prosesu ne’e no omologa akordu dame entre parte sira no husu ba arguidu atu fó indemnizasaun US$1000, 00 ba lezada tuir akordu ne’ebé sira deside ona.



21.  Krime ofensa ba integridade fízika simples ho natureza violénsia doméstika

Nú. Prosesu                             : 0005/18.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Marcelino Marques Coro

Tipu pena                                : Absolve



Iha 23 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu FCRS hasoru nia oan mane (tinan  8), iha Distritu Oekusi.



Akuzasaun Prokuradór

Prokuradór akuza katak iha 04 Janeiru 2018, maisumenus iha tuku 19.00 kalan, arguidu basa dala 2 iha lezadu nia hasan parte loos no rezulta lezadu sofre moras iha lezada nia hasan.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun prova

Durante julgamentu, arguidu uza nia direitu nonok. Enkuantu lezadu deklara katak iha akontesementu ne’e arguidu la basa lezadu, maibé arguidu dudu deit dala 1 iha lezadu nia hasan parte loos.



Testemuña JDS nu’udar arguidu nia feen no ne’ebé mós lezadu nia inan, deside uza direitu nonok no lakohi fó ninia depoimentu.



Alegasaun finál

Prokuradór konsidera arguidu provadu komete krime hasoru lezadu, mezmu lezadu deklara katak arguidu dudu deit dala 1 lezadu nia hasan, no konsidera liu ba lezadu nia deklarasaun ne’ebé antes ne’e lezadu deklara ona ba prokuradór katak arguidu basa dala 2 iha lezadu nia hasan parte loos. Tanba ne’e husu ba Tribunál atu aplika pena tuir artigu 145 KP.



Enkuantu defeza husu ba tribunál atu absolve arguidu tanba defeza kumpriende katak arguidu laiha intensaun atu basa lezadu, maibé dudu de’it atu lezadu labele lao sai ba estrada tanba kalan bo’ot ona. Maibé se tribunál iha hanoin seluk defeza husu justisa.



Desizaun

Depoisde avalia faktus provadu sira ne’ebé produs iha julgamentu, tribunál konklui prosesu ne’e no absolve arguidu hosi prosesu ne’e.



22.  Krime ofensa ba integridade fízika simples ho natureza violénsia doméstika

Nú. Prosesu                             : 0003/18.OESIC

Kompozisaun Tribunál            : Singulár

Juis                                          : Dr. João Ribeiro

Prokuradór                              : Dr. Mateus Nesi

Defeza                                     : Dr. Marcelino Marques Coro

: Dr. Inacio Quebo no Dr. Filipe Landos

Tipu pena                                : Pena prizaun tinan 1 suspende ba tinan 1 fulan 6



Iha 24 Abril 2018, Tribunál Distritál Oekusi prezide julgamentu leitura sentensa ba krime ofensa ba integridade fízika simples ho natureza violénsia doméstika ne’ebé envolve arguidu FT hasoru nia feen, iha Distritu Oekusi.



Akuzasaun Prokuradór

Prokuradór akuza katak iha 03 Janeiru 2018, maizumenus iha tuku 20.00 kalan, arguidu tebe dala 1 iha lezada nia kanuruk, basa dala 1 iha lezada nia hasan karuk no buti dala 1 iha lezada nia kakorok no rezulta lezada sofre moras. Kazu ne’e anexa mós ho relatóriu médiku husi PRADET no fotografia husi Polisia-VPU.



Prokuradór akuza arguidu kontra artigu 145 KP kona-ba ofensa ba integridade fízika simples ho moldura penál to’o tinan 3 ka multa no konjuga ho artigu 2, 3 no artigu 35 letra (b) no artigu 36 LKVD.



Produsaun ba prova

Arguidu konfesa faktus hotu iha akuzasaun no deklara katak arrepende ona nia hahalok no diak malu ona ho lezada. Arguidu mós promete sei la repete ninia hahalok hanesan hasoru membru familia iha futuru, arguidu laiha rendimentu fixu kada fulan no arguidu iha oan nain 2.



Prokuradór husu ba tribunál atu presinde lezada nia deklarasaun ne’ebé antes ne’e prokuradór

arola ona atu rona, tanba arguidu konfesa faktus hotu iha akuzasaun.



Alegasaun finál

Prokuradór konsidera arguidu provadu komete krime hasoru lezada bazeia ba konfisaun arguidu nian. Atu evita arguidu repete tan hahalok hanesan iha futuru, husu ba tribunál atu kondena arguidu tuir pena ne’ebé hakerek ona iha artigu 145 KP.



Enkuantu defeza haktuir katak arguidu konfesa faktus hotu iha akuzasaun, arrepende ona nia hahalok, kolabora diak ho tribunál no iha oan nain 2. Tanba ne’e husu ba tribunál atu aplika pena ne’ebé adekuadu ba arguidu tuir nia sala.



Desizaun

Depoisde avalia faktus ne’ebé produs durante julgamentu, tribunál konklui prosesu ne’e no kondena arguidu ho pena prizaun tinan 1 suspende ba tinan 1 fulan 6.

Post a Comment
Related Posts Plugin for WordPress, Blogger...