03 December 2016

Tribunál Distritál Dili kondena pena prizaun tinan 15 ba arguidu kazu violasaun seksuál

JUDICIAL SYSTEM MONITORING PROGRAMME

PROGRAMA MONITORIZASAUN BA SISTEMA JUDISIÁRIU


Komunikadu Imprensa

Tribunál Distritál Dili  

19 Jullu 2016

Tribunál Distritál Dili kondena pena prizaun tinan 15 ba arguidu kazu  violasaun seksuál

Iha 11  Jullu 2016, Tribunál Distritál Dili kondena arguidu MS ho pena prizaun tinan 15 tanba provadu komete  krime violasaun seksúal hasoru lezada FM, iha Distritu Likisá.

“JSMP apresia desizaun ne’e tanba kondena arguidu ho pena ne’ebé tuir gravidade hosi krime ne’ebé arguidu komete hasoru lezada no espera katak pena ne’e bele sai hanesan meiu ida atu eduka komunidade hadok-aan hosi krime hanesan iha sosiedade,” dehan Luis de Oliveira Sampaio, Diretór Ezekutivu JSMP.

Ministériu Públiku akuza arguidu kontra artigu 172 Kódigu Penál kona-ba krime violasaun seksuál konjuga ho artigu 173 letra (d) no artigu 35 Kódigu Penál kona-ba krime iha konkursu.
Tribunál prova katak iha tinan 2015, arguidu halo violasaun seksuál dala 5 hasoru lezada iha kada semana. Depoisde halo tiha violasaun seksuál ba lezada, arguidu ameasa lezada ho tudik no dehan katak labele dehan sai ba lezada ninia inan aman no maun alin sira, se lae arguidu sei oho tiha lezada. Tribunál mós prova katak kazu ne’e akontese lezada foin halo tinan 15.

Prova hirak ne’e, tribunál prodús bazeia ba deklarasaun arguidu nian iha primeiru interrogatóriu, tanba iha julgamentu arguidu hili direitu nonok, konfirma mós hosi lezada no testemuña (lezada nia inan). Aleinde ne’e iha mós fotografia no relatóriu médiku hosi Ospitál Nasionál Guido Valadares ne’ebé relata katak iha duni kanek  iha lezada nia orgaun seksuál.

JSMP apresia progresu ne`e, tanba mezmu arguidu hili direitu nonok, maibé tribunál iha konviksaun rasik hodi fó pena ne’ebé adekuadu ba arguidu. Alende ne`e JSMP mós hanoin katak importante ba tribunál atu konsidera hodi kondena arguidu selu indemnizasaun ba lezada. Tanba ne’e prátika di’ak atu rekoñese lezada nia sofrementu nu’udar konsekuensia hosi arguidu nia hahalok.

Kazu ne’e rejista iha tribunál ho Nú. Prosesu: 0109/15.LIBZT. Julgamentu ne’e prezide hosi reprezentante juis koletivu, Dr. Ivan Patricinio Antonio Goncalves. Enkuantu ministériu públiku reprezenta hosi Dr. Pedro Baptista no arguidu hetan defeza hosi Dr. Sebastião Amado de Almeida hosi eskritóriu defensória públika.

ETLJB

No comments: