28 June 2012

Ministériu Públiku kondena arguidu ALB, AMB no PSM ho pena tinan 20 prizaun

28/06/2012 Komunikadu Imprensa
Periódu : Juñu 2012
Edisaun : 28 Juñu 2012

Ministériu Públiku kondena arguidu ALB, AMB no PSM ho pena tinan 20 prizaun

Iha loron 20 fulan Juñu 2012, Tribunál Distritál hala’ó julgamentu kontinuasaun ba kazu omisídiu agravadu ne’ebé rejista ho Nú.01/PEN/PEN/TDS. Kazu ne’e involve husi arguidu na’in 3 (tolu). Sira ida-idak ho inisiál ALB, AMB, PSM ne’ebé alegadu halo krime omísidiu hasoru matebian na’in 2 (rua) mak hanesan Ernesto da Costa ho Eusébio da Costa. Kazu ne’e, akontese iha Sub Distriu Atabae, Suco Loes iha loron 10 Juñu 2011.

Prosesu julgamentu hala’ó ho kompozisaun Juízes kolektivu ne’ebé kompostu husi Dr. Costançio Barros Basmery (Juíz Prezidénte) akompaña husi Dr. Âlvaro Maria Freitas no Dra. Florençia Freitas, reprezentante Ministériu Públiku husi Dr. Oscar Silva Tavares (MP Internasionál) ho Zélia Trindade. Iha fatin seluk, parte defeza husi Dr. Marçal Mascarenhas no Dr. João Henrique de Carvalho husi Eskritóriu Defensória Públika.

Diretór Ezekutivu JSMP Luis de Oliveira Sampaio, haktuir katak omisidiu ne’e nu’udar krime grave tanbá halakon ema seluk nia vida, tanbá ne’e husu ba tribunál kompetente atu hamonu pena ne’ebé justu bázeia ba gravidade krime ne’ebé arguidu sira komete ona, nune’é sidadaun tomak bele evita an atu la bele halo krime hanesan ne’e iha furutu.

Iha alegasaun finál Ministériu Públiku nian, nafatin mantein nia pozisaun relasionadu ho akuzasaun tuir 139 (f) Kódigu Penál Timor Leste kona-ba omisídiu agravadu ne’ebé defini katak oho ho premeditasaun (planu), ne’ebé iha kuandu nia uza frieza de ánimu, reflesaun kona-ba meiu ne’ebé uza ka rai nia intensaun atu oho durante oras 24.

Ministériu Públiku akuza mos arguidu sira tuir artigu 52 alinea (a), (c), (j) no (m) Kódigu Penál kona-ba sirkunstânsia agravante jerál.

Bázeia ba faktu hirak ne’e nomós depoimentus husi testamuña sira ba kazu ne’e, Ministériu Públiku husu ba tribunál atu kondena arguidu sira ho pena la tuun liu husi tinan 20 iha prizaun. Aliende ne’e, Ministériu husu ba tribunál atu kondena mós arguidu sira selu indeminzasaun tuir lei ne’ebé defenidu ona.

Hatan ba alegasaun Ministériu Públiku nian, parte defeza hato’ó ba tribunál atu absolve arguidu sira husi akuzasaun Ministériu Públiku nian, tanbá testamuña na’in 3 (tolu) ne’ebé parte defeza aprezenta ba tribunál, iha sira nia depoimentus katak arguidu sira la komete krime tuir saída mak parte Ministériu Públiku akuza hasoru arguidu sira.

Tuir JSMP nia observsaun katak Ministériu Públiku alega arguidu sira, bázeia ba akuzasaun no depoimentus husi testamuña na’in 7 (hitu) ne’ebé Ministériu Públiku aprezenta ba tribunál. Iha sira nia depoimentu katak arguidu sira mak komete krime omísidiu agravadu hasoru matebian Ernesto da Costa ho Eusébio da Costa nu’udar ona ho idade minoridade.

Tanbá ne’e, JSMP husu ba tribunál atu tetu no tau konsiderasaun tuir faktus hirak ne’ebé produz iha audiénsia julgamentu laran hodi fó justisa ne’ebé justu ba krime ne’ebé mak arguidu sira komete, atu ne’e bele hari’i justisa ba familia vítima no lisaun ba soseidade atu evita violénsia iha futuru liu-liu halakon ema seluk nia vida.

Leitura akórdaun sei hala’ó fila fali iha loron 30 Maiu 2012, iha oras tuku 14.30 lororaik.

No comments: