Atór Krime Omisidio Tentativa Hetan Pena Sentensa Tinan “6”

If anyone can do an English translation of this, please send it me at easttimorlegalnews@gmail.com

JSMP 21/12/2009 Atór Krime Omisidio Tentativa Hetan Pena Sentensa Tinan “6” - Juiz Dr.Diogo Ravara nu’udar Juiz substitui ba Juiz koletiva ne’ebe maka kaer prosesu No. [189/Crm.C/2009/TDB] ida ne’e lee akordaun ba arguidu Francisco Pascoela iha dia 03 de Dezembro. Leitura de akordaun hakerek iha lian Portugues maibe hetan asistensia husi durubasa hodi halo tradusaun ba iha lian Tetum hodi nune’e arguidu bele komprende saida los maka ninia sala no saida maka la aprovado iha arguidu nia kazu ida ne’e.

Iha akuzasaun konfirma katak, arguidu lori katana ida ba tá iha vítima AL nia liman karuk ne’ebe nia kanek too sentimu 10. Hodi fo testemuña ba Akontesementu ida ne’e tribunal konsegue notifika testemuña nain tolu, Adriano Soares, Teresa Soares, Felismino Soares hodi fo sira nia depoimentus ba tribunal tanba sira mak direitamente hare no hakilar wainhira akontesimentu ne’e akontese hela. Depois de akontesementu, arguidu halai sees-aan husi fatin akontesementu.

Tribunal konsideira katak, arguidu halo aksaun krime ho nia konsiente, livre ho voluntaria rasik. No tribunal konsegue hare faktus ne’ebe mak la provados mak hanesan tuir mai ne’e, katak vítima la ba trata iha hospital Viqueque, katak vítima ho osan U$ 30 hodi ba konsulta, katak vítima husik deit ninia karau ba estraga arguidu ninia sasan, katak arguidu defende nia aan. Iha parte seluk tribunal mos konsegue hare faktus ne’ebe mak provados hanesan tuir mai arguidu rekuñese ninia sala ka konfesa ba ninia hahalok krime sira ne’ebe mak nia halo tiha ona, prova mos depoimentus husi testemuña sira (Felismina, Adriana), prova mos fotografia no relatorio médiku.

Ba forma krime Omisidio tentativa ida ne’e tuir Artigu 53 KUHP Indonesia hetan ameasa pena sentensa ka moldura abstrata too tinan 15 iha prizaun. Maibe quandu uza Kodigu Penal Timor Leste maka ameasa pena sentensa ka moldura abstrata hetan deit pena sentensa tinan 7 fulan 6 deit.

Hare ba Lei rua ne’e nia moldura abstrata ka ameasa pena ne’ebe mak boot hotu tribunal forma pena sentensa ida ne’ebe favoravel liu ba arguidu hodi fo pena únika ba arguidu hodi nune’e tribunal deside atu fo pena sentensa ba arguidu durante tinan 6 iha prizaun, tribunal mos husu ba arguidu atu fo ka selu kusta judisial ho montante U$10, konaba indeminizasaun ba vítima nian tribunal husu ba vítima rasik mak tenki husu no sei separa ninia prosesu ba assuntu ne’e ho ketak.

Atu hetan informasaun kle’an favor kontaktu: Luis de Oliveira Sampaio Direitor Ezekutivu JSMP Diresaun e-mail: luis@jsmp.minihub.org