16 July 2012

JSMP: Ministériu Públiku husu ba Tribunál absolve arguidu ba Kazu maus tratus ba menor

13 July 2012 Komunikadu Imprensa - Ministériu Públiku husu ba Tribunál absolve arguidu ba Kazu maus tratus ba menor

Iha loron 10 Jullu 2012, Tribunál Dsitritál Suai halo julgamentu ba kazu maus tratus ba menor ne’ebé rejista ho Númeru Prosesu: 10/PEN/2012/TDS. Arguidu ba kazu ho inisiál CAL hasoru vítima na’in 2 (rua) ho inisiál DdA ho idade tinan 9 (sia) no JCA ho idade tinan 12 (sanulu resin rua). Kazu ne’e akontese iha Aldeia Ahi Narai, Suco Debos Sub Distritu Suai, Distritu Covalima, iha tinan 2011.

Prosesu julgamentu hala’ó ho kompozisaun juízes kolektivu ne’ebé kompostu husi Dr. Âlvaro Maria Freitas nu’udar juíz prezidénte, akompañadu husi Dr. Pedro Figueredo Rapoza (Juíz internasionál) no Dr. Costançio Barros Basmery. Iha parte seluk, Ministériu Públiku reprezenta husi Dr. António da Silva Tavares no parte defeza Dr. Marçal Mascarenhas husi Eskritóriu Defensória Públiku.

Directór JSMP Luis de Oliveira sampaio haktuir katak JSMP konkorda ho pozisaun Ministeriu Públiku nian ba kazu ne’e, maibe nafatin husu instituisaun relevante no kompetente atu fo atensaun sériu ba labarik sira ne’ebé iha risku no potensialidade ba esplorasaun tanbá sira nia kondisaun sosio-ekonómiku ne’ebé la permite.

Tuir akuzasaun Ministériu Públiku nian haktuir arguidu komete krime maus tratus ba menor. Aktu ne’e inklui obriga vítima sira ko’a du’ut, fó hemu (fó bee) ba karau nomós hamós karau ten iha karau luhan laran. Liu tan haktuir katak, vítima sira halo servisu tanbá hetan kontratu husi arguidu katak sei selu osan US$ 20,00 kada fulan ba vítima sira maibé arguidu la kumpri ninia promesa ne’ebé halo hamutuk ho vítima sira.

Relasiona ho faktus hirak iha leten, Ministériu Públiku akuza arguidu ho artigu 155 Kódigu Penál Timór Léste kona-ba krime maus-tratus ba menor ne’ebé ho ninia moldura penál tinan 2 to’o tinan 6.

Tuir observsaun JSMP nian, katak arguidu rejeita totál akuzasaun husi Ministériu Públiku. Iha nia deklarasaun haktuir katak argudu la komete krime tuir saída mak Minstériu Públiku akuza ba nia. Tuir arguidu vítima sira mai hela iha nia uma tanbá vítima sira nia maun mak hetan kontratu atu servisu hanesan saída mak hakerek iha akuzasaun laran. Nia hatutan katak servisu ne’e la’os ba vítima sira.

Aleinde, vítima sira mós deklara ba tribunál katak arguidu la haruka sira atu servisu maibé sira na’in rasik mak hakarak servisu atu ajuda sira nia maun.

Bázeia ba faktu sira ne’e, iha alegsaun finál, Ministériu Púbiku husu ba tribunál atu abosolve arguidu husi akuzasaun ho razaun tanbá arguidu ninia hahalok la prienxe elementu krime tuir 155 Kódigu Penál. Minstériu Públiku akresenta liu tan katak ema ne’ebé tenki toma responsabilidade ka tau matan ba labarik sira ne’ebé ho idade tinan 17 mai kraik mak inan ho aman la’os ema seluk. Entertantu, parte defeza mós konkorda ho alegasaun Ministériu Públiku nian.
Post a Comment
Related Posts Plugin for WordPress, Blogger...