24 March 2010

JSMP : TRIBUNAL DISTRITAL DILI HALA'O JULGAMENTU BA KAZU VIOLENSIA SEKSUAL HASORU LABARIK MINORIDADE

TRIBUNAL DISTRITAL DILI HALA’O JULGAMENTU BA KAZU VIOLENSIA SEKSUAL HASORU LABARIK MINORIDADE Marsu 2010 - Iha loron 17 Marsu 2010, Tribunal Distrital Dili hala`o julgamentu ba kazu violensia seksual ba labarik minoridade ho inisial MJS. Kazu ne’e akontese iha fulan Fevereiru tinan 2007. Julgamentu ba kazu refere, dirije husi Juiz Koletivu ne’ebé kompostu husi Juiz Deolindo dos Santos, Antoninho Gonsalves no João Felgar (Juiz Internasional ).

Bazea ba monitorizasaun husi JSMP katak iha audensia julgamentu ida ne’e Tribunal rona deklarasaun husi arguidu, vítima no mos atu rona depoimentu husi testemuña. Maibe tanba testemuña ne’ebé mak aprezenta husi Defensoria Públika, hanesan mos arguidu nia kaben, nune’e testemuña ne’e hili hodi la fo depoimentu iha tribunal bazea ba artigu 125 Kódigu Prosesu Penál.

Iha julgamentu ne’e, arguidu hetan asistensia legal husi Dr. Manuel Sarmento husi Defensor Públiku no husi parte Ministériu Públiku, reprezenta husi Dr. Baltazar Ramos.

Bazea ba depoimentus husi vítima katak kazu refere akontese iha Dare, Distritu Dili, wainhira arguidu bolu vítima atu ba to’os hodi ta’a hudi, maibe to’o iha to’os, arguido ho ameasa, obriga vítima, no halo relasaun seksual ho vítima no rezulta moras no ran fakar sai. Depois akontesimentu iha to’os laran, arguidu kontinua nafatin obriga vítima hodi halo relasaun seksual ho maneira violensia no ameasa ne’ebé mak to’o ikus rezulta vítima isin rua no hahoris oan mane ida, ne’ebé mak agora dau-dauk besik tinan rua ona.

Iha alegasaun, Ministériu Públiku akuza arguidu ho artigu 285 Kódigu Pénal Indonesia (KUHP) kona ba violensia seksual ho nia pena abstrata to’o tinan 12 prizaun.

JSMP konsiente katak hahalok ne’ebé mak arguidu halo, hanesan krime ida tamba halo relasaun seksual ho violensia no ameasa ba labarik minoridade hanesan krime ida no kontra vítima nia vontade seksual nomos abuzu labarik nia situasaun vulneravel hodi satisfas arguidu nia interese deit.Atu fo lisaun ba arguido no ba komunidade en-jeral, tanba ne’e tenke hetan pena ida ne’ebé mak balansu ho hahalok ne’ebe mak nia komete.

JSMP espera katak juiz koletivu ne’ebé mak deriji julgametu ida ne’e ho nia kompeténsia tomak, bele foti desizaun ne’ebé justu ba kazu ida ne’e, hodi nune’e bele hatudu ba ita nia komunidade sira katak prosesu justisa formal bele fo vantajen diak ba vítima sira, liu-liu labarik minoridade ne’ebé mak nu’udar mos grupu ne’ebé mak vulneravel liu ba hahalok krime.

Atu hetan informasaun kle’an, favor kontaktu: Luis de Oliveira Sampaio Diretur Exekutivu JSMP Email: luis@jsmp.minihub.org Landline: +670 3323883

1 comment:

Anonymous said...

informasaun sira ne diak los...
se bele karik update hela deit prosesu sira ne para comunidade tomak bele asesu no bele hatene info kona ba servisu lei nian iha ita nia rai laran


Jenito

Related Posts Plugin for WordPress, Blogger...