JSMP: Tribunal Distrital Oecusse la Funsiona ho Maksimal tanba Juiz la Hela Permanente Iha Jurisdisaun Refere

Tribunal Distrital Oecusse la Funsiona ho Maksimal tanba Juiz la Hela Permanente Iha Jurisdisaun Refere Abril 2010 - Hahu husi loron 12 to’o 18 fulan Abril 2010 Tribunal Distrital Oecusse la hala’o prosesu julgamentu tanba laiha orariu ba julgamentu. Ofisial justisa sira ne’ebé hala’o serbisu iha tribunal refere la hala’o sira nia funsaun ho konsistente tanba sira hala’o aktividade seluk iha kapital Dili. Maske estadu fornese ona akomodasaun ka rezidensia permanente, transporte, no kondisaun seluk tan ba autor judisiariu sira, maibe autor sira seidauk hela metin to’o agora. Durante ne’e dala barak Juiz desloka hosi Dili ba Oe-Cusse hodi hala’o nia funsaun kuandu iha orariu julgamentu.

Tuir informasaun ne’ebe JSMP hetan, katak tribunal sei hala’o julgamentu iha loron 20-21 Abril 2010.

JSMP hanoin katak situasaun sira hanesan ne’e hamosu dúvida hosi ema hotu kona-ba komitmentu serbisu autor tribunais sira atu responde nesesidade ne’ebé komunidade sira presiza liu liu kona-ba buka lia los. Maske iha parte seluk JSMP rekoñese katak iha progresu balun ne’ebe Tribunal Distrital Oe-Cusse atinze, maibe kuandu situsaun iha leten mak kuntinua eziste bele impede direitu sidadaun sira atu asesu ba justisa formal. Tuir fontes konfirmadu ne’ebe JSMP hetan katak kazu ne’ebé tama iha kategoria flagrante delitu dala barak tribunal la hala’o primeiru interogatoriu ka prosesu sumariu tanba Juiz la iha fatin.

Aleinde ne’e, JSMP mos hasoru malu ho vítima Ofensas Korporais Grave ida hatete katak suspeitu ne’ebé ofende nia, polisia sira kaptura iha loron hanesan kuandu krime ne’e akontese maibe detein la to’o 72 oras sein esplikasaun ba vítima maibe suspeitu ne’e livre tiha ona. Tuir vítima katak nia la-hatene bainhira los mak kazu ne’e bele prosesa iha tribunal. Se nune’e, sei husik hela konfuzaun no karik iha posibilidade hosi suspeitu atu komete fali krime foun ka krimi seluk.

JSMP hanoin katak lolos autoridade polisial sira tenke detein suspeitu tuir artigu 218.1 Kodigu Prosesu Penal (KPP) kona-ba detensaun iha flagrante delitu hodi hein kedas primeiru interogatoriu tuir artigu 63.1 KPP, ka hala’o prosesu sumariu tuir artigu 346.1 KPP ba kazu ne’e hodi nune’e bele fo medida ruma ba suspeitu, nune’e mos hametin ema hotu nia fiar liu-liu vítima kona-ba lala’ok diak husi sistema justisa formal iha Timor Leste. JSMP fiar katak enkuantu prosesu hotu la’o tuir nia dalan, sei la mosu kestaun sentimentu diskonfiansa ka dúvida ba instituisaun justisa formal sira ne’ebe oras ne’e dadaun eziste ona.

Maske nune’e JSMP haksolok tanba Majistradu hosi Ministeriu Publiku ne’ebé hala’o nia kna’ar iha Jurisdisaun Oe-Cusse hela permanente iha ninia rezidensia. Aliende ne’e Defensor Publiku ne’ebé naturalidade Oe-Cusse oan hela permanente maski konstrusaun ba ninia rezidensia seidauk remata. JSMP enkoraza parte kompetente sira ne’ebé serbisu iha area justisa atu kontinua servi komunidade sira tuir lei, konsensia no komitmentu liu liu fo no hasae nafatin konfiansa ba sira katak tribunal nu’udar fatin prinsipal no sentru atu hetan justisa.

Atu hetan informasaun ne’ebé klean liu favor kontaktu: Luis de Oliveira Sampaio Direitur Eksekutivu JSMP Tlf: 3323883 Email: Luis@jsmp.minihub.org