JSMP: Arguidu konsumedor droga tipu metovitomina "Sabu-Sabu" hetan pena suspensaun tinan 2 husi tribunal distrital dili

Arguidu konsumedor droga tipu metovitomina “Sabu-Sabu” hetan pena suspensaun tinan 2 husi tribunal distrital dili Fevereiru 2010 - Arguidu AAL ne’ebé tama iha prizaun preventiva Becora durante fulan 8 ona tanba kaer toman lori droga tipu Metovitomina ka “Sabu-sabu” hahu Julga iha Tribunal Distrital de Dili iha dia 10 Fevereiru 2010. Prosesu julgamentu ne’e prezidi liu husi Juizes Koletivu no hamonu pena fulan 9 maibe ho suspensaun kastigu ba tinan 2 nia laran. Tuir akuzasaun ne’ebé maka Ministeriu Publiku akuza ba arguidu katak, arguidu involve faan droga iha Dili ho ema estranjeiru ida naran inisial BS iha tinan 2009. Akuzasaun ne’e mos hateten katak, PNTL unidade Investigasaun Krime nian maka kaer toman arguidu iha fatin Fumento, Dili. Iha momentu autoridade Polisia kaer arguidu ne’e sira hetan droga tipu Metovitomena ka “Sabu-sabu” 0,2 gr, aluminium pedasuk ida no osan US$ 70 iha arguidu nia bolsu. Tanba ne’e Ministeriu Publiku akuza arguidu halo hahalok ida ne’e ho konsiente no hakarak rasik maski hatene katak hahalok ida ne’e kontra lei.

Maske arguidu rasik uza nia direitu silensiu no la fo komentario ba akuzasaun ida ne’e maibe, tuir depoimentus testemuña ADM nu’udar ajente PNTL dirasaun investigasaun ba Krime nian depoimenta katak, sira kaer arguidu tanba iha informasaun husi fontes PNTL nian informa ba sira katak arguidu involve hodi konsume no fa’an droga ne’e. Testamuña kontinua depoimenta mos katak, sira tau matan ba arguidu durante fulan 6 antes sira kaptura arguidu. Testemuña ne’e hateten katak arguidu dala barak halo transaksaun droga ne’e iha “Bar” hanesan STAR BAR, MONALISA BAR. Bainhira testemuña kaer arguidu, arguidu nia kondisaun hanesan lanu maibe la iis tua. Haré hanesan bila’an. Depois kaer tiha arguidu, testemuña lori arguidu no materia evidensia sira ne’e ba iha esquadra polisía.

Atu hatene no deskobre materia evidensia hirak ne’e nudar ka tama ba kategoria droga ka lae, testemuña depoimenta katak, PNTL iha equipamentu ne’ebé fornese husi Embaixada Amerika ida Dili nune’e sira uza equipamentu ne’e hodi halo teste ka exame ba droga ne’e no hetan rezultadu katak droga ne’e tama kategoria tipu “antimetavitomena’ ka “Sabu-sabu” ho todan 0,2 gr.

Liu husi alegasaun oral ne’ebé maka aprezenta husi Ministeriu Publiku (MP), alega katak MP konfirmadu loloos ona no la iha dúvidas tan tanba, bazeia ba konfisoins arguidu, nia uza ka konsume duni droga ne’e tuir akuzasaun no depoimentus husi testemuña sira. Tuir faktus julgamentu ne’ebe deskobre iha julgamentu laran, testamuña aira depoimenta katak sira kaer rasik arguidu no arguidu lori hela droga ne’e iha nia bolsu falun ho tissue, daun no aluminium pedasuk ida hodi uza droga ne’e. Nune’e husu ba Tribunal atu kondena pena efektiva ba arguidu tuir artigu aplikavel iha akuzasaun laran. Tanba sé lae atitude arguidu nian ida ne’e bele afeita/da’et ba sosidade barak.

Entretantu husi parte Defeza hato’o ba tribunal katak, kona ba droga ne’e problema Internasional no liu fronteira ka linha teritoriu paiz hotu-hotu. Tuir defeza, Problema ida ne’e loloos responsabilidade Estadu RDTL nian atu evita no prevene rede droga ne’ebé agora tama ona Timor laran. Defeza mos kontinua argumenta katak, depoimentus testemuña nian laiha baze legal, tanba nia la haré arguidu konsume droga diretamente. Ikus liu defeza mos dehan katak, arguidu konsume droga ne’e tanba nia hetan problema iha nia uma kain laran (divorsio) no nia oan sira nain tolu agora hela dook husi nia iha Australia no Singapura. Nune’e husu ba Tribunal atu liberta ka absolve arguidu.

Depois rona hotu alegasaun oral, Juizes koletivu liu husi deliberasaun ho desizaun hamonu pena fulan 9 suspensa tinan 2 ba arguidu. Pena ida ne’e kma’an liu do que akuzasaun MP nian ne’ebé to’o tinan 20 tuir artigu 82 Lei Droga Indonesia. Haré ba pena husi artigu 82 husi akuzasaun MP ne’e todan liu tinan (20) nune’e substitui fali ho artigu 85 Lei Narkotika Indonesia ne’ebé nia moldura pena to’o tinan 4. Substituisaun lei refere bazeia ba Kódigu Penal RDTL.

Antes julgamentu ne’e taka, Juiz fo hanoin ba arguidu atu durante tempu hala’o pena suspensaun nian iha tinan 2 nia laran la bele repete tan ona hahalok ida ne’ebé arguidu halo no la bele komete nein hahalok krime sá ida deit. Karik arguidu komete tan krime ruma, arguidu sei tama kadeia hodi kumpri pena suspensaun fulan 9 nian no aumenta tan pena husi krime foun ne’ebé arguidu halo ikus.

Atu hetan informasaun kle’an favor kontaktu: Luis de Oliveira Sampaio Diretor Ezekutivu JSMP
Diresaun E-mail: luis@jsmp.minihub.org Landline: 3323883